Sorkar sum neih loh chhan hi

Vanglaini Editorial lama rawn ziah sorkar sum neih loh chhan tih khan dawn a ti sei hle mai. Kha tah khan sorkar sum hmuhna hrang hrang a rawn ziah kha mahni phak tawk tawkin ka lo chhui ve a, Covid-19 hi sum senna a nih rual rual hian sum hmuhna a ni tel tiin kan sawi tel bawk ang.

Kha thil kha han hai let ta ila, "Sorkar laipuiin Covid-19 dona atan budget pawn lam aṭangin ṭanpuina Covid-19 Emergency Response and Health System Preparedness Package (ECRP) aṭangin Mizo­ram sorkar chuan cheng nuai 2,879 a dawng tawh. Heng zinga cheng nuai 886 hi ECRP Phase-I aṭanga a dawn niin cheng nuai 1,900 chu ECRP Phase II aṭangin a dawng tawh.

Ziaka a lan dan chuan sorkar laipui hian ECRP Phase II hnuaiah hian cheng nuai 3,700 chu Mizo­ram tana pek turin a pawm tawh a, chuti a nih chuan cheng nuai 1,900 min pe tawhin nuai 1800 vel chu kan la dawn belh dawn niin a lang.

Hei bakah hian sorkar hian budget pawn aṭangin hripui dona tur sum hi hlawm lian tak takin a dawng nual tawh a, Northeastern Council leh National Health Mission leh hmun dang aṭangin sum hi a dawng tawh.

He mi piah lamah hian hri dona atana mipuiin an thawh khawm hi Chief Minis­ter Relief Fund-ah Rs. 30,22,49,878 (vbc. 30.22) hi August, 2021 thleng khan a lut tawh a, hei hi pung zel tura beisei a ni. Hei bakah hian a sum fai ni loin damdawi, khawl, test kit, PPE, mask, hand sanitizer leh thil dang ṭanpuina ṭhahnem tak Mizoramin a dawng tawh bawk," tih a ni ta a.

Pawisa kan dawn tawh zawng zawng hi hri pui hi leng lo se kan dawn loh tur a nih avangin Covid-19 anchhia kan lawh pawh hian malsawmna a lo keng tel ru ve khiau reng a lo nih hi.

Kan hri pui hian kan sum hnar tam tak hi a hnawh ping kan tih rual chiah hian kan sum hmuh ngai reng reng lohna turah sum a hai lut ve hiau hiau a, mipui aṭangin ṭanpuina a vaibel­chhe tel a lo lut a, heng te hi dik lo zawk malsawmna a ni.

Kan hri pui hi leng lo pawh ni se kan state sorkar hian sum thawh chhuah a neih loh avangin sorkar hnathawk hlawh a pek zawh hi chuan pawisa bang kan nei tawh mang lova sawi a lo ni bawk nen, tuna kan sum harsat chhan chu Covid-10 hi a chhan pakhat a ni.

A chhan lian zawk chu thawh chhuah nei lo sorkar, sum ren thiam lo sorkar, sum hnar nei lo sorkar, sum sem rual thiam lo sorkar kan neih vang a ni zawk hlauh em le?

- Malsawmtluanga