DAN PALZUTNA
Kum 10 zet kaltâ ah khan, Mizoramin Armed Police Bn pahnih leh District Executive Force (MRP) tlem chauh kan nei a. Chutih lai chuan kan ramah hel (underground) hrang hrang awmin ṭhenawm ram helpawl thlengin an tlangnel hle ṭhin. Heng vang hian central sawrkar chuan Mizo Armed Police dang (IR) Bn pathum din min rawn phalsak a nih kha.
Police (GD) ni tur hian Education qualification sang tak ngai lo mahse, physical fitness ṭha leh tawng sanzawng bithliah fel tak a awm thung. Sawrkar lam duhsak zawng ṭhenkhat official-ten measurement an lak hnua tling lote pawh an awm a nih hmel e.
"Ka pu i rawn recomend kha san zawngah a tling lo" tia Minister an hrilh chuan khatih laia Minister pakhat chuan, lo teh rawh u ka ti hlei nem, lo la rawh u ka ti alawm, a ti a ni awm e!
Covid hri leng vangin medical lama thawktu indaihlohna a nasa zual a. Doctor chu sawiloh, nurse leh technician te thlengin thiamna nei dëk tawh chu sawrkarin volunteer anga thawk turin sawmna a siam tawp mai a nih kha. Heng volunteers te hi a hming chuan lawmman (honorarium) pek an ni hlawm bawk.
Ramin harsatna a tawh lai chuan, khawvel hian ziak loh dan pakhat (ziaka dah pawh an awm) hman fo a nei. Sipai ṭan luih tir te thlengin ram ṭhenkhatah chuan tih ṭhin a ni. Chumi zulzui deuh chuan, Mizoram sawrkar pawhin hmang zamna a siam ve a, heng volunteers te hi sawrkar hna lak hunah duhsak bik tur an ni ang tih a ni.
Hetiang a nih mek lai hian ZMC-ah khum engemawzat dah belh a ni a, ICU siam belh nual a nih tak bawk a vangin nurse 50 lak belh na tur advertisement a chhuak ta. ZMC-ah hian nurse 103 zet volunteers thawk lai an awm laiin chung zinga mi 16 chauh chu lak an ni ta a ni.
He thil hi nikum lama Health department thuchhuah siam nena compare chuan volunteers nurse te tan chuan lungawi a har viau ang. Social media thu ṭhenkhat hi a dik a nih ngai chuan, he nurse la tura tih DP&AP lam official te pawh selection chungchangah an lu a hai deuh nge, an ralbang tih thawm te pawh a ri nawk a nih kha.
He nurse lak thuah hian, rulling party lam aṭanga recomendation thlawk lut a tam viau a nih hmel. Hna dil ve ringawt, intervew hmachhawn miah lo mi 3 ngawt lak an nih dan aṭang hian thu a chirî thawkhat tih chu a chiang mai.
Engpawhnise, kan ram hian, hruaitu ṭha leh party dang deuh roreltu a mamawh ta tih a chiang. INC leh MNF hi chu thil inang reng, hming chauh hrang mai a ni. Tuna sawrkar mek party President khan election campaign lai khan kan insiamṭha tawh a ti kha a ni sia, an insiamṭhatna zingah tun ang thil hi a tel ve lo a nih hmel viau. Anni pahnih aṭang hi chuan Chhura kothlak an sawi ang bak hmuh tur awm dawnin a lang ta lo.
Hnam tlem leh inthurual tham lek kan nih lai a, hetianga rualkhai lo taka thil kan ti ṭhin hian kan hnam hmakhua hi nasa takin a ti sukuk tawh a, kan lungrual loh phah viau bawk a ni. Insiamṭhat thuai kan mamawh hle mai.
- Vanlalhuma Kawlni