Ruling Bial min duhsak chuang lo
Tunlai chu Ruling bial leh Opposition bial chungchang Tuirial Bial Bye Election lo awm dawn avangin an zuar mêk a, keini chhim mipuite hriat chian zawng tak chu Ruling bial nih vangin min duhsak lo tih hi a ni.
Tuirial Bial pawh hi Ruling bial pawh rawn ni ve mah ula Rulng MLA junior ber bial in nih dâwn avangin kan beisei san pui vak lo che u tih kan han sawi lang ve hrim hrim ang e.
Ruling bial awm khawmna kan ni a, Lunglei mipuite hian keimahni tana min pek (donate) RTPCR khawl hi bun ngei hi kan phu a ni. Sorkar pawhin Laboratory din tum ang takin mithiam an rawn tir ve thlap a, June, 2020 ah kha chuan kan 'mithiamte' rawn kal khan Lunglei khawpuia RTPCR din thihna tur Laboratory siam kha a theih tih lam hawiin report an pe tih kan lo hria a. A document te pawh kan hotuten an nei a ni. Kum khat chiah chiah a liam a, Ruling Bial awm khawmna atana RTPCR an pek chu Laboratory min siam sak duh ta lova, Health Department hotute chuan mithiam an tirhte chu mithiam an ni leh si lo zuk ti duh a mawle!
Heti khawpa chhim mipuite min tham loh dan hi zir chuan, Ruling bial hi engmah a lo ni tak tak chuang miah lo.
Opposition Bial an nih avanga to ta ngawih ngawih bika Bial ṭhenawmte han awt ta em em sawi tur pawh kan Mizoramah hian a awm bîk si lova, Ruling leh Ruling lo hian awmzia a nei vak lo a ni.
Tuirial Bial te kan chah ve duh che u chu in Bial tana MLA ṭha ber tura in ngaih kha Ruling leh Opposition thliar lovin lo vote pawp mai teh u. Opposition MLA in nih pawhin keini Ruling awm khawmna aiin in ropui chuang lovang.
Ruling in thlan tlin pawhin Opposition Bial aia hmasawn na chhan tur in nei chuang bawk lova, MNF MLA dang pawh an chet theih bîk loh avang hian MNF MLA Junior ber bial nih pawh a sawt vak dâwn lo a nia.
Engpawhnise kan Chief Minister berin Ruling leh Opposition Bial inthlauh dan a sawi hi SEDP an sem hunah ti dâwn se, NLUP dawng tawh te pawh pek vek a tiam bawk si avangin Ruling leh ling loh hi Chhim lam aṭanga kan thlir dan chuan a danglam lem lo e.
- Lalmuankima