Kawng chhawng sawi a khat

Kum 2018 inthlan dawna sawi hlawh ber pakhat chu Aizawl khawpuia kawngpui chhawng siam tum kha a ni. A sawitu kha kan thlang tling ta nghe nghe a, Chief Minister a ni tawh a, CM a nih hnu pawhin kawng chhawng siam hi tih tak zetin a tum mai bakah amah ngeiin Vaivakawn velah pawh kawngpui chhawng siamna tur kha an tehnaah a kal ve tih social media (an chhuah hi a dik turah ngai ila) lamah kan lo hmu ve a ni.

Tun hnaiah hian kawng chhawng hi a ri khat ta em a, mipui hriata sawi chhuah leh hi thil ṭul tak nia a lan avangin sawi chhuah leh a ni ta a ni.

Engvangin nge kawng chhawng chu sawi chhuak a ṭul ni? in lo ti mai thei a, kan Politician te hian an thu intiam hi an tihhlawhtlin ngei ngei hma chu Mizo mipuite hian a nawrin kan nawr ngat ngat tur a ni.

Kawng chhawng hi mipuiin, "Min siam sak hram rawh u, min siam sak theih chuan kan thlang tling ang che u Ka Pute u," tiin kan au lawm lawm a ni hauh lova, anmahni zawkin kan dil pawh ni miah lovin pek min tiam a, a kawng chhawng siam dan tur a kalkhang rem dan tur thlengin tui takin min sawi khum hliam hliam zawk a ni si a.

Kawng chhawng mai pawh duh tawk lovin Sports Minister thar chuan Filed Chhawng min pek a rawn tiam ve leh bawk a. Hei pawh hi sawi a ri khat leh tawh tlat. Field Chhawnga inkhelh hi kan footballer te pawhin an chak viauin a rinawm a, sawi rik ṭan leh a ngai.

Kawng chhawng an tih hi 'Fly Over' a ni lo tih pawh sawi a ngai e. Kan hotuten kawng chhawng an siam hi khawi veng kawnah emaw Fly Over siam tum ang mai mai ni lovin kawngpui chhawng indawh zawm phei put a ni min tiam ni.

Bawngkawn leh Vaivakawn vela Fly Over siam tum an sawi kha kawng chhawng atan kan pawm lova, a ban phun dan turte pawh min hrilh tawh kawng chhawng kha kan nghak char char dawn a ni.

Kum 2023 mai hi term tawp a ni tawh a, a ban phun ṭan a hun tawh lo maw? tiin zawhna kan han zawt a ni.

- Lalrinmawia (Patea)