ZMC-A NURSE LAK THAR CHUNGCHANG KHA

Tun ṭuma ZMC-a thawk tur Nurse 50, ICU-a duty tur bik contract basis-a an lak thar chungchang hian sawi leh sel a hlawh hle a, ṭhenkhatin Health Minister demin ṭhenkhatin MOT Chairman an dem bawk a. Lawm aiin lawm lo an tam fe zawk a, mipuite'n thil kalphung leh awm dan dik kan hriat a ṭula ka hriat vangin, ka han auchhuahpui ve a ni.

Mizoramah Covid vei an pun zel avangin ZMC-a Nurse thawktute indaih lohna a nasat em avangin September ni 20 khan Health Minister kaihhruaina hnuaiah Chief Secretary, DP & AR, Finance Department-te nen meeting neih a ni a. He meeting-a thurel ang hian hemi ni vek hian ZMC ICU-a thawk tur Nurse 50 lak belhna tur advertisement chhuah nghal a ni a. He thutlukna hi Chief Minister pawmpuina thlapa siam a ni.

Mipuiin kan hriat atana pawimawh em em chu ZMC hi Society a niin, mahnia thuneihna hran nei, MSSSB kher ngai lo va, hna lak theihna turin amahin authority hran hlak nei a ni.

Nurse hna lak tur hi a hun a tepter a, a hmanhmawhthlak tawh avangin rang taka lak a nih theih nan Interview Board 5 siam a ni a. Board 1 aṭanga Board 5-ah khan interview-na hun leh hmun bik turte siam fel thlap a ni a, chutiang chuan interview-ho kha koh thlap an ni. Interview Board a tam chhan pawh interview a kal chak theih nana siam a nihna hi sawi nawn leh kher teh ang. Entirnan : Board khat ringawt kha chuan, ni khatah hna diltu mi 60 an ko hman ṭawk ang a, Board 5 chuan ni khatah 60×5 = 300 an ko hman tihna a ni a. Hna lak kha thil hmanhmawhthlak tak a nih avangin Board 5 lai an siam kha a àwm viau bawk e.

Interview Board-ah hian Secretary-te, Director-te, Nurse hna thawh lama hria leh thiam (expert member) bakah DP & AR aiawh an tel ṭheuh bawk. Board-a thute hian hna diltute certificate neihte endikin, recruitment rules (RR) in a phut angin Computer Certificate an neih leh neih lohte thlengin uluk takin an endik thlap a ni. Interview Board hian an interview laia an performance aṭangte leh an experience aṭangtein a tiṭha apiang thlangin Merit List an siam ta a ni ber.

Tun ṭum hna lakah hian Volunteer-a thawk sa tam tak chu lak ve an nih tak loh chungchangah lungawi lohnate an lantir hial tih kan hmu a. Mahse, thawktu 50 an lak zingah khan mi 14 zette chu volunteer-a thawkte lak an ni ta tho a. Kan hriat atana ka duh chu volunteer mi za chuang zette hian thla tin lawmman (hlawh) chu Rs.22000/- ṭheuh an la ṭhin a ni. Volunteer-a thawk sate hi an chhuanawm em em rualin, an lawmman lak pawh a ṭha thawkhat viau a ni. Tuna an lak thar Nurse 50-te hian thla tin hlawh cheng 28100/- ṭheuh an la dawn a, volunteer-a thawkte lawmman nen a inthlauhna hi cheng sangruk awrh bak a ni lo.

Hna lakah hian Volunteer-a thawk sate hian duhsak bik chu an phu takzet a, mahse, hna lak dan phung pangngai RR ang chuan duhsak theihna bik an awm chuang reng reng lo. Nurse hna diltu hi mi 1000 chuang nia sawi a ni a. Chuta aṭanga mi 50 chiah thlan chhuah tur a ni a, a bawm a tawt hle a ni. Nurse zir chhuak hna hmu lo tam tak an awm ve lai a, hna ruak zawng zawng 100% Volunteer-te tana hauh vek ngawt bik chu, Nurse hna zawng ve dangte ngaihtuah chungin thil theih a ni bik awm lo e. Chuti chung chuan Nurse hna lak thar zinga 28% lai chu Volunteer-te zinga mi lak an la ni thei erawh an lawmpui awm hle a ni.

Volunteer-a lak loh tam tak kha interview board-ah an tiṭha vek bik lo maithei a. Votunteer-te kha sorkar hnathawk ang deuh tho an ni a, thla hnih lawmman an lak theih loh zauhte kha an sawi lar hle a, Volunteer-a thawkte tih atan chuan a awm lo titu an tam khawp mai. Sorkar hnathawk nghet pangngai leh a nghet lote pawhin eng sorkarah pawh sum a khaihlak chang chuan, hlawh lak theih loh chang an nei fo a, sorkar sum a ziaawm hunah an la ve leh mai ṭhin tih kan hria. Volunteer-te kha kan demna ni lo se, engmah lawmman pawh nei lo, thih ngam lu pua thawk ang chu an ni bik reng reng lo. An chhuanawma fak an phu hle laiin, an thla tin lawmman dawn hi a chhe em em hauh lo.

Tun ṭuma ZMC-a thawkte an lak thar chungchangah khan Party/Ministry an inrawlh lo tih a chian em emna chhan chu, Health Minister ngei pawh a bialah pakhat mah lak an awm lo a, MOT Chairman bialah tling an awm hek lo. Chutih laiin Opposition ZPM bial, Aizawl South-1 ah chuan mi 6 lai lak an nih avang khan, kha hna lak kha a fair thawkhat viau tih chu a chiang a ni. Health Minister leh MOT Chairman-te khan an tlinna biala mite kha chu theih ni se, an la chak em em ang tih chu a chiang a ni.

Nurse lakna atana Recruitment board hian volunteer te kha duhsak chu an duh ve ngei ang a. Chutih laiin board 5 lai a awm tak siah chuan interview board-a thute thil phal dan a inchen si lo va, board pakhata thute khan an duhsak leh ṭha an tih zawngte pawh mark lo pe sangin inhre mah se; board danga ṭhute khan mark an pek aia sangin candidate-te kha mark an lo pe thei tlat a, hei vang hian volunteer-te aia sang mark hmu kha an awm fur thei tlat a ni.

Kha hna lakah khan sorkar hnathawk service chungchangah leh sorkar hna laka thuneihna sang tak neitu DP & AR kaltlanga felfai taka tih a ni a. Minister-te emaw rulling MLA leh rulling party worker-ten an duh duh basa ngamin la dawn ngawt se, volunteer te ngei pawh lo duhsak dawn ta se, DP & AR lam lungawi lovin lo in-withdraw ta mai se, ministry tan chuan mualphona zangkhua a sei thei hle ang. Hman ni deuha thuthang dik lo social media-a darh vak kha a ngai ngaiin tarlang tel hram i la, "DP&AR GSW AN IN-WITHDRAW : DP&AR General Service Wing hi ZMC-a hnathawktu tur staff nurse sawmnga (50) la tura sorkarin a tih an nih angin candidates zinga mite chu thlan chhuah an ni a. Sept. 28-30.2021 chhung khan hei hi an buaipui a. Heta board-in an mi thlan chhuahte hi MNF sorkar chuan kan mi duhsak zawngte in telh kim lo tiin an pawmpui lo a. DP&AR GSW-te chuan an thiltih sorkarin a pawmpui leh duh si loh avangin an inhnukdawk (withdraw) a ni. He thutlukna hi nimina an siam a nih thu ka dawng e," tih kha kan hmu ṭheuhin a rinawm a. Thu belhchian dawl lo thehdarh mah ni se; ngaihdan kan siam thiam thei vek em ang chu maw.

Covid len ṭan tirh aṭang khan tha thlah miah lovin Health department-a thawktute hian a thim a var pawh thlu lovin an la thawk mar reng a. Kha mi karah khan interview lo leh in-register lo hming pahnih khat lo lang tel palh kha chu clerical mistake lian tak a lo thleng palhah ngaih thiam pui ila, a hahdamthlak mai awm e. Computer-ah delete tur delete lo palh thil thleng a nih angin chawpchilh takin a siamṭhattir leh nghal a ni a, ZMC director chu explanation call niin insawifiah tura tih a ni. Department lam aṭang pawhin recruitment tihdana fel lo a lo awm a nih pawhin lo enfel a, a ṭul anga hma lak zel an tum niin thu dawn a ni a, a ṭha zawk a chhuah theih nan Health Department in hma an rawn la zel turah beisei ila.

Chuvangin, mi ṭhenkhat hna lak dan kalphung hre hauh lote'n Health Minister emaw, MNF Ministry leh hna latu Official-te kan tawng pawng dem vak vak a, thil kan hriat chian loh vang mai a ni a. Kha hna kha dik leh felfai thei ang bera lak a ni tih Zoram mipuiin i hre mawlh ang u.

- Laltluangkima, (Tluangtea), Ramhlun veng, Aizawl