Karimganj tlangvalte vrs Mizo tlangval

"Karimganj tlang­valte leh Mizo tlangvalte tukin khan Silchar-ah nasa takin an intualvuak" tih han ni mai se'ng chuan chhiar zawnga insehruh ṭeuh ngai tur niin a lang. Mahse, inngeih tlang dial dialin kan la khawsaho mek zawk a ni.

Ka sawi tum tak zawk chu taksa hriselna leh tisa damna lam ni lovin Mizo hnam damna lam ve thung a ni. Hnam inpumkhatna (national integration) tichhe zawng emaw chi inlakbingna (communalism/ communal feeling) tichhuak zawng ni si lova Mizo hnam damna hi a ni.

Kan Chief Minister zah­awm tak Pu Hawla'n kan rama Karimganj tlangval tam lutuk tharum thawh si lova tihtlem dan tur a sawi fo chu cement mistiri tur Mizo tlangval kan chher chhuah tam hi niin a sawi ṭhin a, a dik hlein a lang.

Thing mistiri (carpenter) lam chu Pathian zarah kan in todelh hle a; in tin deuh thawah thing mistiri kan awm emaw tih theih hial a ni.

Hetih lai hian Mizo cement mistiri erawh kan la tlem hle. Central YMA leh Synod Social Front-te ṭhahnemngaihnain a thlawnin Mizo tlangval engemaw zah chu cement mistiri chher chhuah an ni tawh a, mah se an la tam tawk loh avangin Karimganj tlangval an la tam belh zel niin a ngaih theih.

Tunge ṭha zawk?
Han tih lemah, hmelah ni lovin ṭhat dan (quality) zawngin a ni. Hmelah phei chuan Karimganj tlangval aiin Mizo tlangval an ṭha zawk mahna! Mahse, a entute mit azir pawh a ni thei ang chu?

Engpawhnise, thiam dan inchen rau rauah Mizo tlang­val chuan rem a hre zawk a, a thawk chakin a taima zawk a, mahse, kal hma leh haw tlai lamah dawh theihna a nei tlem a, tlemin thunun a har duh zawk tlangpui niin a lang.

Karimgangj tlangval chuan sum a hmuhna tur a nih phawt chuan eng anga vin leh ankhum pawh hrehawm tiru hle ṭhin mah se ngawi rengin dawhthei takin a sepui ruah tuar tlawk tlawk a; a tuar chhuak ṭhin.

Mizo tlangval hi thunun awl (flexible) ve phei se'ng chuan in sa apiang hian kan ruai duh vek zawkin a rinawm. Mizo tlangval cement mistiri zir chhuak tam takin chhawr zui an hlawh lohna chhan ber pawh thunun an ngai thei lo hi a ni thei.

Chuvangin, Mizo tlangval­in Karimganj tlangval cement in saka an luahlan theih­na awlsam ni thei chu dawh­theihna an neih a ngai a ni.

Tin, hei aia pawi­mawh ber zawk chu an nitin hlawh intam hleih hi a ni. Hausak dan a inchen lova, neih chuang liama a ruala in pahnih pathum sa thei an awm laiin 95% te hi chu neih chhun tak meuha In sa an ni tlangpui. Chuvangin, Karimganj tlangval ni khat hlawh ang tho hlawh hian thunun nuam taima tho siin thawk thei ve se'ng chuan mahmi Mizo pui chhawr kan tam tial tial ang a. A tawpah chuan Mizo tlangval hlirin anmahni ram Mizoramah ngei hian concrete building ropui leh nalh tak tak an sa ngaw khup mai dawn a lo ni.

Mizo tlangval hlir cement mistiri leh helper kan hman/ chhawr theih hunah chuan Karimganj tlangvalin thawh tur a hmu tawh lovang a; intual­vuak chiam emaw tharum thawh ngai lovin Karimganj lam­ah leh state dangah ei zawng turin an bo diak tawh ang.

Tichuan, Karimganj tlang­val vrs Mizo tlangval tih chhanna chu "Mizo tlangvalin hnehna a chang ta" tiin hnehna Darkhuang kan tum thei tawh mai dawn a lo ni.

- Dr. C. Lalrampana