Aia upa zah lo nge zahtlak lo?

Tun hnaia Lunglei Ṭhalai pawlin PWD hotu pakhat an elsênna nâ tak chungchang hian sawi a hlawh takzet a. Anmahni thlawptu an awm ang bawkin anmahni demtu pawh an awm bawk.

Thil a chinchhuaka hre hmasa zet lova ṭawngkam thlahdah tak hnam kan nihna a lo lang leh ṭhin. Aia upate zah thiamin an thute awihin zawm fo rawh tih sikula chhum hmin aia ba ba black sheep hmanga sawrkarin ṭhangthar a chhum hmin rahte pawh a ni mahna!

Lunglei Sub-Hqrs YMA lamin hna­tlanga Pukpui leh Tlawng inkâr kawng a chhiat luat vanga hnatlang an koh ṭum daih tawh khan PWD hotu hi elsên thamin a khawsa tawh niin an sawi a. Chu chu, kan kawngpui chhiat pawh a lo hre reng reng lo niin!

Tichuan, culvert ṭul miah lovin con­tractor pakhatin JCB hmangin a lai zui vak a, leivung hmangin kawng a tihchhiat belh chiam a ni ber! RTI hmanga a landanin pawisa tam tham tak he kawngpui siam nân hian pêkchhuah a lo ni tawh bawk.

Chuti chung chuan hna a muangin thawktu labour pali panga vel lek hian an vil a ni ber a. Chuti êma ngaihsak leh ngaih pawimawh a hlawh tak lovah Lunglei ṭhalai rualte'n hma an la ta reng a ni. Hma an lak tirh phat aṭanga thu mai hmanga intiamkamna chu nghakin an duh ang an nghak chhuak zo ta lova, mipui sawr­karna ram a nih angin an che ta a ni zawk.

Kan hnam nun mawi tak, aia upa zah hi a mawi ngaia la mawi rengin a duh­awm ngaiin a la duhawm reng a. Nimahsela, chu chu remchanga la a, thuneihna hmang sual zawnga khawsa chu a upat vang ngawtin an zah lem tawh lo tih vawi tam a lo lang ta mawlh mawlh a nih hi.

Kan ram hruaitu lû ber meuh pawh zirlaite'n 'Hawleka' an tih chinah te, thalai rualin 'Zirbawnga' an han ti ta maite hi huaisar zawnga ngaih dawn chuan rap­thlak tham khawpa zahtheih lohna kan ti ngei ang. Nimahsela, hetianga koh nawmnah phu khawpa an thiltih erawh kan sawi duh si loh chuan thu lai lakna reng a awm bik lovang!

Mahni fate sualna haider tlat thin mi te, mahni thawhpui an nih vang ringawta a dik a dawk thlu lova hrawk phiar khawpa lo tan chin te, thil tihsual sawibo nâna thil sual hailangtute dem zawk tlatna he kristian ramah hian, kan pawlitik bawlhhlawh uchuak tak hmangin kan kristianna hi eng chena rei nge kan la rahbeh dawn ni le?

- Lalremliana Pachuau