TRIBAL SUPER STAR III

Hlim ni leh lungngaih ni te a tahtawl te tein alo thleng ṭhin. Mi ram buaina tura kan ngaih ramri chungchang te hi kan buaina alo ni ve ta, dawhkan leh ziakfung hmanga chinfel theih thil a awm laiin chinfel a nih loh chuan a tawpa tharum leh ralthuam hman ngaihna te pawh a awm fo. 

Ramri kham fel tak leh ziaka dah nei ve ve in buaina kan nei ta a ni a. A tute emaw zawk zawk hian kan ṭanna hi kan tawlh a nih loh chuan buaina bulṭanna chauh pawh a la ni thei. Boruak reh deuh mah se, nakina buaina tur tho a ni a; mahse, thuneitu lamin ram hmangaihna nena hma an lak erawh chuan chinfel theih loh buaina a awm tak tak lo. 

Kan harh thar a ngai. Ramri buaina chauh a ni lo, eng emaw avanga Silchar nena kan inkalpawhna kawng a pin hleka ei leh bara harsatna kan tawh ziah hi vawi leh khata sut kian vek theih a ni lo. Ei leh bara intodelh chungchang hi kan sawi ngun tawh a, a tak taka hmalak kan ngai. 

State dang nena inkalpawhna kawng ṭha pawh nei fer fur mah ila, state dangin kan ram aṭanga an lakluh ve tur eng emaw tal thar chhuah hi kan tum ve tlat tur a ni. Hnam/ state danga mi chengte hi Pathian in ropui taka a siam bik avanga intodelh an ni bik lova, an thawhrim leh an ram leilungin a mil tur thlai te chinga taima taka hnathawk a, hlawhtling an ni. 

Hetiang hi keini Mizorama chengte hian kan theih loh bikna tur a awm lo. Kut hnathawh kan uar sauh sauh a ngai a, intodelh hi a thu maia hre lova a tak taka kan lanchhuah tir a hun. 

Mizote harsatna leh manganna hian min han tuam vel ṭhin bawk mah se, lawmna hian min kian san thei chuang lo a nih  ber hi. 

Zohnahthlakte ṭulna leh loh theih loh avangin kan chenna tlang a dang a, harsatna leh manganna kan tawh changin tumah inphatsan bik lova in ṭanpui tawn theia kan in kau reng mai hi ava ropui em. 'Sem sem dam dam eibil thi thi tih' tih a taka nunpuitu, hnam ropui leh hnam dangte laka zahpuiawm lo Mizo hnam inlungrual kan ni - kan va vannei em! 

Ramri chungchangah harsatna kan tawk a, zohnahthlak tlang hrang hranga awm ten min puih an inhuamna te, kan ke pen ruala ke pen thei tura an lo inbuatsaih te han hmuh hian zofate kan lungrual hle tih a lang. 

Ṭhenawm state hi ṭawngka chuan han ngam viau thin mah ila, pur kan chawkna an nih miau avangin chak zawk nih a har ṭhin a ni. Tin, an ni lam pawhin min zuam phah nite hian a hriat. 

Social media vela mifing kan tam ang ai hian mahni intodelh kawnga mi fing kan tlem a, internet bazara sum sen kan ui loh tehreng nen maian tel khat man a to dek dek a, kan phun leh ang lawi a! Mahni rama thil thar man to chu kan ngaisang leh miah lova, ram danga mi a man to deuh chu kan sawisel leh chuang si lo!

Hetiang hi, Tribal Super Star nun dan tur a ni dawm en ni?