Chakma Nation bawk kha

A tirah MNF-te kha kan han puh chhe hle a, an President an lawmna hmunah 'Vibrant Chakma Nation' an tiam a, mahse vanneihthlak takin kan ti dawn nge ni a lo hmu lo hlauh a nih kha, a mit a var lo khawp mai! Tunah zet chuan Chakma nation din loh hlau niawm takin BJP leh Congress chu an thawkho ta a nih chu mawle.

Inthlan hma khan Congress leh BJP hian thawh dun tumna reng reng an nei lo mai ni lovin India ram politics-ah chuan hmelma lian ber an ni. Tuna BJP-in an tum langsar ber mai chu India rama Congress nuai chimih a, a zung nen lama phawia phoro a ni a, hei hi Mizoramah hian an tum lo a ni bik lova, nimahsela Chakma huam chhunga rorel an chak awt awt em avangin BJP hian Congress pawh ni se an thawhpui hreh der lo a ni.

Hei hi a la ni mai lova, Congress hian lalna hi an atchilh a, an tuihal huam huam a ti tih lantirna ṭha ber leh eng vang pawha lal hrim hrim an tum a ni tih lantirna turin anni aia seat nei tlam zawk BJP hnuaiah an han kun duh tehreng a nih chu mawle! Hei hian Congress mentality chiang takin a pholang ta a ni.

MNF khan zah pawh dawn lovin Mizo nihna dah ṭha mai ni lo ‘phum bovin’ Vibrant Chakma Nation an tiam a, hnam pasalṭha Mizo thinlung pua thi tate pawh zah zo lovin Chakma vote duh vangin Mizo hnam party nia inchhal chuan Chakma national din an tum ta kha a nia. An tumna hi a hlawhchham ta hlauh mai a, hei hi MNF tan chuan lawmna tur a nih zawk ka ring a, an intiam ang khan Vibrant Chakma Nation kha va din ta tak tak se chu MLA inthlan lo awm turah hian sawi tur an nei lovang.

BJP thawhpui bawk, Chakma Nation din duhtu ni bawk tan Mizoram politics-ah hian men ngam a ni tawh lovang.

Thil nuihzatthlak tak tak a tam a, chung zinga nuihzatthlak ber pakhat chu MNF President-in kha banner intar a hmu ve miah lo leh Whatsapp lamah a lo hmu ve chauh kha a ni. Anni ang kum tawhah hi chuan Whatsapp lam­ah khan lo hmu ve miah lo zawk se a dik thlapin ka hria a, a hma lawka banner intar hmu lo thei kha chu Chief Minister atan phei chuan a tar ta deuh pawh a ni mahna le.

Thil lang chiang ta chu Chakma National dinte leh Hindutva tih angreng vel hi lalna kan chan dawn chuan engahmah kan ngai ta lo a nih hmel.

He hnam hian duh­thlan tur a nei a, chu chu vote hmangin tihlan theih a ni dawn a, mipuiin duh kan thlan fuh chuan Zoramin hma a sawn thei ang a, kan thlan fuh loh chuan Chakmate inlulin theihna tur sorkar, Hindutva rim nam rum rum pawh kan nei dawn a ni mahna le.

- Lalngaihzuala