Hawh u, entreprenuership lam hi i tuichilh ang u

Tun hma chuan lehkha thiam deuh (ti mai ila), matric pass chin pawhin sorkar hna an hmu zung zung a. Chuvangin, mi tam takin an fate hnenah pawh, "Lehkha zir ṭha rawh u. Kuthna thawka ei zawng loin, pen hmangin ei in zawng dawn nia" tiin an fuih ṭhin. Mahse tunah chuan a danglam ta.

Driver luck hun vanglai kha chuan 'Bawrhsap nge lal driver' te an lo ti hial ṭhin a ni awm e. Chung hun lai chuan driver-in khaw khat nula hmel ṭha ber a thur chhuak nalh nalh thei an tih ka hre ṭhin. Mahse tunah chuan a danglam ta.

Hriau leh pin sem tur hawn thei chin, sipai chhuṭi chuan nula hmel ṭha rim tur a tlachham ngai lo. Tunlai

ṭawngkam takin an tan nula hi a ngapin an ngap a ni ber mai. Tunah pawh nula ṭhenkhat tan an duhawmna chu la bo lo mahse tunhma ang em em kha chu an ni tawh lo. Tunah chuan a danglam ta.

Pro Pastor luck vanglai kha chuan KṬP, ṬKP etc. zaipawl vela nula zai ṭhinte pawhin pro pastor laka mark ṭha hmuh tumin an inla duhawm vel ta emaw tih mai turin Pro Pastor ni ve lo tlangvalte thik tham an ni. Pro Pastor tlangval neih avanga inkhawm ṭhulh duh lo nula pawh an awm mai thei le - tu khaw khain va chik suh. Mahse tunah chuan a danglam ta.

Tunah chuan officer, doctor, engineer te luck hun a inherchhuak a, mahse nula fingin chung ho chu an capture tlat a, an inchan lo. Mizo nulate daih tur officer tlangval, doctor tlangval leh engineer tlangval kan nei thei lo. Ṭhangthar ṭiau zat ral leh hnuah pawh an daih tur chu a awm chuang lo ang.

Khai le, entrepreneurship lamah kan tuichilha hna kan thawh tak tak a hun ta. Kum tinin ṭhalai lehkhathiam kan pung zel a. Mi hnuaiah hna zawngin kan vak kan vak a, a ṭha. Mahse hlawh a tam theih loh avangin leh kan hna hmuh chu innghahna a tling loh avangin leh nupui fanau chawm nan a tlak a, kan bansan leh mai ṭhin. Hna ṭha leh hna sang tak, hlawh tam tur chuan mi aia thiam bik, mi pangngai chin chung lam nih a ngai.

Chuvangin, beidawnnain min tuam a, kan hawi kan hawi tawh mai a nih hi. Tun hma chuan ei hmuh nan, sorkar hna hmuh nan lehkha kan zir ṭhin. Mahse tunah chuan hna sang lem lo 4th grade lak turah pawh B.A. mai ni lo, M.A., M.Sc. te hial an inrawlh ve zel a ngai ta a nih hi. Thla tina Employment Exchange-a hna zawng in ziak lut pawh ṭhalai sang chuang an ni. Ngaihtuah chian chuan a lungchhiat thlak zawk.

Mahnia sumdawnna bulṭan tura risk lak a ngai.

Bulṭanna tur nei lo tan sor­karin ruahmannate a siam thar a (i.e. Micro start up Capital Competition leh B-Plan Contest). Chu chu intihsiakna a ni. He competition leh contest-ah hi chuan Minister lehkhain awmzia a nei lo a; Idea neih ṭhat a pawimawh. Kan sorkar thiltih hi a tlai mah mah ka ti. Kum 10 liam ta aṭang khan tun ang hian hma lo la tawh chu nise a rah chhuah kan hmu nual tawh ang.

Ṭhalai lehkhathiam ten job seeker ni loa job giver nih kan tum ṭheuh chuan Mizoramah hian employment kan generate ṭeuh ṭeuh ang a, lehkha zir sang lote tan pawh hna a tam hle tawh dawn tihna a ni. Entrepreneurship lamah kan ṭhanharh a ngai. Sumdawnna chu risk a ngai, chutih rual chuan kan hma zawnah tak bang chhah mup awm tawn tlang tum erawh a atthlak. Mahse kawng tereuh te pawh a awm a, fiah vak loa a lang deuh che che chauh a nih pawhin risk laka theih tawp chhuah mai tur.

Khawi aṭanga hausa nge a nih, eng vanga heti taka hausa ta thut nge a nih tih pawh hriat loh, a thawhrim viau pawh kan hriat loh hausa ta thut ho hi awt ngai suh u.

Dik tak leh dan ang thlapa kan thawhrim rah kan seng hi chu a hlu bik a nia. A man a tam bik a ni. Hawh u, rim takin thawk ila, mahni ke ngeia din chhuah i tum ang u.

- Melvyn Vanlalhlimpuia