Zirlaite leh Dictionary

Zirlai chuan dictionary hi a kuah chawt tûr a ni. A lehkhazir dawhkanah a awm reng ang a, a keu tuktin zantin tûr a ni. Dictionary tel lova lehkha zir chu Thlarau thianghlim tel lova Pathian rawngbawl tum ang chauh a ni a, beih vak pawhin hna a sawt mawh hle ṭhîn.

Mizoramah hian zirlai kan nei ngah ve viau mai. Zirlai chu a zirlaia sapṭawng thumal zawng zawng awmzia zirtirtuin a hrilh vek hman lova, mahse a tan hriat vek a pawimawh tho si. Chutih huna amah pui theitu hnaivai ber chu dictionary ṭha a ni.

Eng dictionary nge zirlaiin a hman ang?
Zilai chu a zir san dan azirin dictionary hman tûr chi hrang hrang a awm a. Duhthusamah chuan 'English to English' Dictionary hi pawl hniam deuh aṭang pawhin hmang se a ṭha ber a. Pâwl riat aṭanga pâwl sawm vel an nih thlengin English to Mizo Dictionary hi hmang tel mah se a pawi hauh lo.

Pawl sawm aṭang chuan English to English dictionary hi rinrãwl berah neih tawh se a ṭha. A chang chang chauhvin English to Mizo hmang se. Hei hi Mizo ṭawng kan hnualsuat lam a ni lova, a siamtute an ṭha lo kan tihna a ni na hek lo; sãp ṭawng thumal tam tak hi pa ṭawngkam thiam theihtawp tan pawha Mizo ṭawnga lehlin fuh hleih theih loh a tam êm êm a, a ṭawng neitu sap ho ngeiin hriat thiam awlsam taka a mawl thei ang bera anmahni hman lai ngei thumal awmzia sap ṭawng vêka an hrilhfiah hian a awmze dik hriat a awl bik a ni.

Tin, zir san hle tawh hnu pawha English to Mizo dictionary hman reng chuan sap ṭawng hi han chhiar ila, rilru hian Mizo ṭawngin a let zut zut a, a leh hun chhung a rei avângin leh thumal ṭhenkhat lehlin fuh zaih hleih theih lohte avângin kan thu chhiar awmzia duh ang tawka hriat thiam kim a har ṭhîn. Ṭawng (spoken) lamah ngat phei chuan nal a har zual a ni.

Eng dictionary hi nge ṭha ang?
Dictionary hmanah hian fimkhur a ṭul hle. A theih hram chuan English to English dictionary pawh ni se ‘Pocket English Dictionary’ emaw ‘Concise english Dictionary’ angho hi hman loh a ṭha. A chhan chu thumal hrilhfiahna an ziak tawi thei lutuk a, dictionary bih ngial hnu pawha a awmzia varpawh chuang miah loh chang a tam duh êm êm a ni.

2010 kuma Harvard University-a researcher te leh Google ṭangkawpin an chhinchhiah dan chuan sap ṭawng thumal hi 1,022,000 a awm a; kum tin a pung reng bawk. Thumal an ngah em avang hian eng dictionary-ah mah a awm kim thlap thei lo tluk a ni. Tin, a awm kimna dictionary pawh awm mah se zirlai tam ber hian kan ṭangkaipui lem lovang.

Dictionary ṭha chu eng tin nge kan hriat ang?

Dictionary tha tehna:

1. Dictionary siamtu chu a ṭawng neitu (native speaker) a ni ngei tûr a ni.

2. Sap ṭawng thumal tam tak hi awmze chi hrang tam tak nei a ni. Thumal hrilhfiahna tlêm lutuk emaw, tawi lutuk emaw chu dictionary ṭha a ni thei lovang. Chuvangin, dictionary ṭha chu a bu a pan lutuk thei lo hrim hrim a ni.

3. Dictionary ṭha chuan thumal, awmze pakhat aia tam nei hrilhfiah nan number hran a pe thlap ṭhin.

4. Sap ṭawng thumal tam tak chu a hmangtuin a awmzia a hriat chian lehzual nan dictionary ṭha chuan example sentence a pe ṭeuh ṭhîn.

5. Sap ṭawng word tam tak hian idioms & phrase an nei a. Chutiang nei thumal chuan idioms & phrase an siamin awmze dang daih an nei fo ṭhîn. Dictionary ṭhaah chuan a thumal hrilhfiah mek kaihhnawih idioms & phrase a ziak lang ngei ṭhîn a. A awmzia a hrilhfiah nghal bakah example sentence a pe nghal bawk ṭhîn.

6. Dictionary ṭha-ah chuan thumal lamrik dan phonetic symbol (received pronunciation) a dah ngei ṭhîn.

7. Dictionary ṭha chuan a thumal hrilhfiah mek kha hnam dang ṭawng aṭanga lak a nih chuan eng ṭawng aṭanga lak nge tih leh eng kum velah nge sap ṭawngah hman ṭan a lo nih tihte thengin a tarlang ṭhîn.

8. Sap ṭawng thumal tam tak chu a thua sawia chiang lo, a lem nena entira fiah tak si a awm a. Dictionary ṭha chuan chutiang thumal hrilhfiah harsa zual hrilhfiah nan chuan a lem a dah tel ṭhîn.

9. Dictionary ṭha chuan thumalte a synonyms leh antonyms a ziak tel ṭhîn.

10. Dictionary ṭha chuan thumal hrilhfiah nan simple language a hmang hram hram ṭhîn.

Heng zawng zawng ngaihtuah hian Mizorama dictionary han lei mai theih zingah ‘Oxford Advanced Learner’s Dictionary’ hi a ṭha deuh berin kei chuan ka hria. Sawiselbo erawh a ni bik lo. ‘Longman Dictionary’ pawh a ṭha hle a, mahse lei tûr a awm vak tawh lo. Zirlai zingah ‘Thesaurus’ ho hi dictionary pangngai anga hman ching an awm zauh zauh. Hengho hi ‘Dictionary of Synonymns’ mai an ni a. Thumal awmze hrilhfiahna ni lovin, a awmze milpui thumal dahkhawmna mai a ni. Lehkha ziaktute tân a ṭangkai êm êm a; chutih rualin sap ṭawng thumal awmzia ngawr ngawr en duhtu tân chuan rinrawlah neih loh a ṭha. Idioms & Phrase dictionary pawh lei tûr a tam mai. Mahse, a siamtu kha ‘Native Speaker’ ni ngei zel se. Dictionary hi chu chi hrang hrang neih ṭeuh a him ber.

Tin, smart phone kan nei deuh vek tawh a. Playstore-ah lutin dictionary ṭha tak tak download tûr a tam tawh hle. ‘Merriam-Webster Dictionary’ hi a ṭha viau mai. Tin, online dictionary pawh ṭha tak tak a tam hle. Sap ṭawng thumal, a hman dan kan thiam chiah loh pawh google-ah a search zel theih. Entir nan, ‘innocuous’ tih thumal kha hman dan ka lo thiam ta lova. Google-ah ‘Innocuous example sentences’ tiin ka chhu lut tawp ang a, sentence tam tak min rawn pe mai dawn a ni. Chutiang chuan study material atân internet hi duh tawkin a hman theih a ni.

Dictionary en thatchhia zirlai chu a thiam a nghet lova, confidence a nei tlêm a, a thiamna pawh a ril tak tak thei lo. Dictionary tel lova lehkha zir fo hi hah thlawnna mai mai a ni e.

- Zomawia Khiangte, Biate