Secular state kan ni lo em ni?

Kan Chief Minister zahawm tak Pu Lal Thanhawla hian Hindutva leh BJP hlauhawmzia sawiin fimkhur tur leh an thanga awk lo turin Mizo Kristiante min chah lawm lawm ṭhin kha a nia. Hetianga sakhaw dang ngaihtheihlohna tilang zawnga Politics khelh hi Indian Secularism-in a duh loh ber a ni. Hindu leh Muslim Politician te'n sakhaw dang huatna leh ngaihtheih lohna tilang zawnga thusawi an neih vaih chuan kan ṭeu leh hle si. Secularism chuan sakhaw tih bik a nei lova, sakhaw hrang hrang te'n zalen taka anmahni Pathian an biak a, an chin ṭhin dan te an humhalh theih leh sakhuana inzahsak tawn hi a duh ber a ni.

Mizo Politician tam takte ṭawngkam leh chet dan hi chuan secularism a kalh fo tih kan hriat a ṭha awm e. India hi secular state ni lo ta se, Kristian te hi kan tlem si a, kan chan a chau teh ang chu. Chuvangin, secularism humhim mamawh ber chu Kristian te hi kan ni. Rilru zau tak pu a, sakhaw dangte nena inngeih dial diala awm ho tura an tih dan phung leh nunphung pawh kan zahsak ve a ṭha khawp ang.

Kan pu ber hian Hindutva hlauhawmzia te, Hindutva thiltum tihlawhtling tura BJP-in ram a lak chakzia te, chumi laka Mizo Kristian te kan inven fimkhur a ṭul thu te a sawi fo a. Kan berampute lah chuan an lo tuihnih ve zel bawk a. Mahse hei, Chakma Autonomous District Council (CADC) inthlan kan han nei chiah a, Party mala sorkar-na siam thei awm hek lo; kan pu ber chuan BJP chu sorkar-na siam turin a han mawngzawm pui ta chat mai chu a nia. ‘Hamlet-a’ thawnthu-a Awfeli’n a ‘u’ Laiṭis-a hnenah “Puithiam rinawm lo angin, a ṭha lam kawng zim leh bumboh min kawhhmuh zet siin, min zilhtu hi nawmchenna khurpuiah i tal lut ang tih ka hlau hlel love” a tih ang deuh khan kan pu ber hian BJP laka fimkhur tura min chah lawm lawm chungin amah ber hi a khawi ngamtu-ah a ṭang ta hlauh chu a nih si hi. Pu Hawla game-a tawlhthlu (?) berampute lah chu an ngawi leh ta hmak mai bawk si.

He thilthleng hian mipui thinlungah zawhna chi hrang hrang a piantir a; “BJP hian Hindutva hi an rawn chhawm tak tak lo em ni?” tih te, “Pu Hawla hian dawt leh thutak chawhpawlha mipui thluaksuk a lo tum mai mai em ni?” tih te, “A Hindutva chu eng pawh lo ni se, BJP hi Mizo Kristian te tan a lo hlauhawm tak tak lo em ni?” tih te, “Congress Party hian kumin Assembly inthlanah hian MNF, ZPM leh Party dang lo lian tur boruak vuak daih nan hrim hrim BJP hi a thawhpui em ni?” tih te, “Congress hian tlin an inring zo tawh lo em ni?” tih te leh zawhna dang dang te a piang nawk mai.

Hetianga tum loh deuha a intal-awh takah chuan kan pu ber hian “Hindu BJP chu an hlauhawm a, Buddhist BJP chu an hlauhawm loh,” a’n ti leh ta ngawt a, a hnawk chingchivet tawlh tawlhin in hre ve em? Heti hian han zeldin chhunzawm ta ila; Mizo mipuite hian Hindu leh Buddhist ho pawh tluk lo Politician kan hrawn hnem tawh a, hlemhletna leh rualawhna bak min hlui si lo. Chuvangin, system thar rawn keng ngam, eirukna do ngam, development tak tak min chhawp chhuah sak thei an nih tak hlauhin BJP hi i han sorkar tir ve reng reng teh ang tiin Mizoram mipuite hian BJP hi zui ta huk se. An MLA candidate leh Party worker tam ber chu Mizo Kristian ngei an ni dawn si a. Buddhist BJP an hlauhawm lo a nih chuan Kristian BJP phei chu an hlauhawm lo leh zual ngawt ang. Mizoramah chuan Political Party hlauh tur bik an lo awm miah lo a nih chu, kan pu ber thusawi aṭanga a lan dan chuan.

Kan Politician te hian anmahni nun leh thinlung sakhaw mi uk si lo hian ṭawngkamah chuan sakhaw mi ber awm ang zia zang hian Pathian thu leh sakhaw chungchang te hi Politics khelh nan an han hmang thla zen a. Mipui thluaksuk hi an thiam em em mai leh nghal. Mipui lah kan ‘a’ si, thil kan chik peih si lo, a sawi thiam thiam lamah kan thle dual dual zel a. “Eng ang pawhin kan ram hi develop dawn se, BJP Sorkar-tir ai chuan retheih ka thlang zawk,” ti hial khawpa Pu Hawla te thluak suk sak hi an kat nuk nia! Retheihna hi Pathian thuawihna a nih pawh ka hre chuang lo. Kan retheihna chhan ber chu sorkar kan hrawn tawhte’n kan chan ai an eiruk nasat vang leh an zawmthawt vang a ni ber.

Chutianga milian leh thiltithei, mi pamham te’n an nawm an maka an rahbeh reng tur chu kan ni bik lo asin, kan Kristianna nen pawh a inhmeh lo.

Mipuite hian system thar kan duh a. Milian leh thiltithei chauhte thuneihna pe lova, a fit fit, a taima ma, performance ṭha ṭha, eirukna laka fihlim hlim mawhphurhna pawimawh chelhtir a, eirukna a taka do a, hmasawnna tak tak min thlen tura theihtawp chhuaha an thawh dawn phawt chuan ZPM emaw, BJP emaw, PRISM emaw pawh ni se, Kristian, Hindu, Muslim leh sakhaw dang betute hian kan thlawp vekin a rinawm.

Kan Politician te hian facts & figure tel lo, an rinthu leh zeldin titi, dawt leh thutak chawh pawlh hmanga mipuite min bum kual an la tum fo reng mai hi Kristian Politician an inti a nih chuan sim teh se, Kristian sakhaw hmel an tibal. Mipuite pawh hi min zah lo lulai em mai. An tihtheih loh pui min tiam kur zut lo sela, an tih ngei tur chauh min tiamin an sorkar hunah pawh an thutiam chu tipuitling ngei turin dik tak leh ṭhahnemngai takin thawk rawh se. Mipuite hian thutak leh dawt kan thliar thiam tawh. Digital world-ah kan cheng tawh a, thingtlang kilkhawr ber aṭang pawhin internet hmangin miin a duh duh a enin a hre zung zung thei tawh, dawt hmanga bum kual mai mai theih kan ni tawh lo tih hi hre hlawm teh se.

A tlangkawm nan, secular state kan nih hi hre reng ila, ngam loh chala chilhnawm ang maia secularism kan tihnghin loh nan sakhuana hi Politics khelh nan i hmang lo hram ang u. Kan hman berah pawh sakhaw dang zuitu Politician te aiin kan sakhaw zuitu Politician te’n hna an thawk ṭha zawk a, an chhuanawm zawk tih theih tur talin hmang ila a ṭha viau ang.

- James Ramdinmawia