Rin aia hlauhawm chu

Lengzem chan­chinbu-a ‘anti’ tih hi ka chhiar hmasa ber ziah a, midang pawh hi an ni ve furin ka ring a, May thla chhuakah khan ‘Hindutva hi a hre chiangte’n rin aiin a hlauhawm ang an ti’ tih kha a inziak a, ngaihtuahna mu hnu a kaitho thar leh e.

Kei ve hi chuan politics lamah engmah sawi tur ka nei ve lova, sawi pawh ka tum lova, hman deuha kan mithiam rualte’n chanchinbu lamah pawh an lo sawi tawh ṭhin Hindutva siam tuma RSS-te ṭan lak dan leh chu mi phena an chakna thahrui chu BJP sorkar an nih thu leh BJP leh RSS hi thil kal kawp tlat an nih thu a sawi kha rilruah a lang nawn awn awn ta mai.

Politics thil a nih hi chuan kan kohhran ngei pawh kan sawisel duh a, kan hmelma lian ber pawh kan pawm duh a, politics hian sum leh thuneihna a ken tel avangin kan zavai hian kan dah chungnung em em a ni. Chu chu Vairamah hian a nasa lehzual a, chu tak chu RSS lam hian an man fuh chat avangin India rama Hindu sakhua a lo darh zau theih dan ber chu political party dinin a ni tih an hria.

Keini kan inhnial kan inhnial ngai lo hian BJP leh RSS inzawm dan, Hindu sakhaw tana din a nih dan hi chu khawvel hian a hria a. Wikipedia lamah hian Hindu fir/ tlawmngai/ firfiak pawl tia sawi theih tur RSS chanchin chu heti hian khawvel hriat theih turin an ziak mai a - “Rashtriya Swayamsevak Sangh, abbreviated as RSS... is an Indian right-wing, Hindu nationalist, paramilitary volunteer organisation that is widely regarded as the parent organisation of the ruling party of India, the Bharatiya Janata Party,” tiin.

BJP innghahna chu RSS an ni a, BJP hi RSS fa hrin ang deuh an ni. BJP hi eiruknaah an fihlim a, ro an rel

ṭha a nih pawhin thil makah ngaih loh tur a ni a, sakhaw mi tak tak awm khawm an ni a, keini sakhaw mi dan ai mah hian an titak zawk a, BJP hruaitu zingah hian khawvel thil dangte hawisana an sahua leh ram tana inpe ral ṭhak ṭhahnem tak an awm. Thil reng reng hi sakhuana nen a kal kawp tawh chuan mihring inpekna hi a thuk bik a, kan ngam huai bik a, kan inphal bik ṭhin an ti a, RSS ideology nena BJP chin ngat hi chuan an sakhua leh ram tan theihtawp an chhuah a ni.

Sakhaw tana kan ngam huaizia chu Mizoramah a chiang reng tawh a, kan in ṭha ber ber chu biak in a ni a, kan hmun ṭha ber ber pawh kohhran ram a ni deuh zel a, kan pawisa pek chhuahna tam ber pawh Pathian ram thawhlawm a ni a, kan eizawnna piah lama kan hun hman tamna ber pawh kohhran programme niin kar tluanin kan inkhawm a ni. Sakhuana nen a kal kawp tawh chuan thil hi a kal duak duak mai.

BJP hi a ṭhat leh chhiat sawi ve ka tum lova, an din chhan chu Hindu sakhaw tidarh zel tur leh chawi sang a, India ram hi Hindu rama siam hi an tum ber chu a ni tih thu ziak hrang hrang chhiar hian a chiang a ni.

- KC Vanlalpara