I MIT DUAT RAWH

Vawiin October ni 14, 2021 hi World Sight Day a ni. He ni hi kum 2000 aṭang khan Internation Agency for the Prevention of Blindness (IAPB) bul tumin kum tin October Ningani vawi hnihnaah khawvel huapa hman ṭhin niin, thupui (Theme) thlan bik neih ṭhin a ni. Kumina World Sight Day thupui atan Love Your Eyes thlan a ni.

Minute khat chhung lek chauh pawh han chhing chhin ta i la, mitdelte khawvel chu kan ngaihruat thiam mai awm e. Mitdelna hi zaah za ven emaw dan emaw theih ni lo mah se, mit hriselna ngaih pawimawh loh avanga mitdel phah an tam a ni. Khawvel puma mit ṭhatlohna nei mi tluklehdingawn khat vel hi an mit ṭha taka enkawl a nih chuan mitdelna pumpelh thei an ni.

Kan nunah hian a changtu ber kan ni a, chuti ang chiah chuan i mit duat rawh kan tih pawh hian mahni mit hrisel leh sel loh chungchangah mit neitu, keimah ngei hi mawh la hmasatu leh mitdelna pumpelh tura ṭanlakna kawngah pawh che chhuak hmasa ber tur ka ni. Dam chhunga khaw hmuh theih loh emaw hmu leh thei ngai tawh lo tur zinga kan tel ve lohna turin i mit i lo duat hle dawn nia.

Engtin nge mit kan duat ang?: Kumin World Sight Day hian mit duat dan tur chi li 4 ‘P’s an tih (P Pali) a rawn thlang chhuak a. Chung te chu -

Prevent : Mit natna tam tak hi kan nun dan (lifestyle)-a innghat a ni. Nun leh ei in fimkhurna hian mit na tur a dang (prevent) nasa thei hle. Ei leh in leh taksa enkawl ulukna hian mit hriselna tichhe thei, rih leh thau luat tukna avanga zunthlum leh thisen sang neih theihna nasa takin a dang thei a ni. Mit hian mei zuk leh zu in a haw hle a, thisen sang, zun thlum leh cholesterol sang nei ten a nih dan tur (normal)-a awm thei tura ṭan lak mar pat theih a ṭha khawp mai.

Protect: Nun uluk chuan a mit a duat a ni. Kan duh leh nuam tihzawng kan umna kawngah fimkhur a ngai hle. Tin, hnathawh emaw eizawnna kawngah emaw mit tihpalh theihna chance sang bik te pawh a awm a, fimkhurna leh invenna lam ngaih pawimawh hram hram a pawimawh. Ni sa hnuaia invenna tel lova rei tak awm te hi mit tan a ṭha lo va, kan hnathawh emaw thawhna hmun emaw a zirin tarmit dum (quality sunglasses) emaw mit tihpalh theihna veng thei (protective eyewear) vuah hram hram a ṭha.

Hmai hnawih (make-up) leh mit hnawih (eye cosmetics) te pawh hman fimkhur a ngai hle. Fimkhur loh chuan mit ro (dry eye) bakah allergy te pawh a thlen thei a ni. Hman dan him leh dik zawk hriat belh zel i tum ang u. Khawl thil computer, mobile phone adt (gadgets) tel lovin hna kan thawk thei tawh lo va. Chutihrualin, ṭul tak ni lem lo va kan hmang nasa tur erawh insum a ṭha khawp mai. Computer leh mobile phone hman nasat hian Vision Syndrome or Digital Eye Strain an tih mai mit kham, lu na, mit ro leh tihrawl leh ruh (musculoskeletal) natna a thlen thei a ni.

Preserve: Uluk leh zing thei anga mit entir hi mit hrisel neihna tur atana tihmakmawh a ni. A chin chhuak (medical & family history)-a kan dinhmun doctor-ten an hriat hian a enkawlna kawngah nasa takin a pui thei ṭhin. Inthlahchhawnna avanga natna nei kan nih leh nih loh te leh chhan dang avanga natna nei kan nih theih dan hriatchianna hian mit enkawl zuina kawngah kawngro a su thui hle.

Prioritize: Hun hman dan tur kan ruahmanah hun bi neia mit entir (routine check-up) te hi telh ve thei tawh ila a duhawm khawp mai. ‘I mit duat rawh’ tih hi chungkaw tinin thupuiah nei thei phei ila chuan a va ṭha dawn em. Mit pawimawhna leh mitdel hlauhawmzia te hi khawtlangah inzirtir uar lehzual thei ila, a hria leh thiam zawkte thurawn ngaihchanna chang i hre deuh deuh zel ang u.

Pawl 8 zirlai pakhat chu classroom-ah tlar hma lama a ṭhutin blackboard-a thil ziak a hmu fiah a, tlar hnung lama a ṭhut chuan a hmu fiah thei ta hauh lo mai a. A ṭhutna a hlat tak deuh avanga hmu fiah lo ni maiah a inngai a ni. Doctor hnena a inentir chuan mit ṭha lo, tarmit mamawh tak mai a lo ni tih an finfiah thei ta a ni.

Mit tana ei tur ṭha:

• Vitamin A - Thlai hnah hring, artui, alu, carrot leh maia Vitamin ‘A’ awm te hi mit chhungril leh pawn (cornea leh retina) hrisel nan an ṭha.

• Omega 6 & Omega 3 (fatty acids) - Sangha a awm hian mit ro (dry eye) a veng a, mit chhung lam (retina) a tihrisel.

• Zinc - Beans leh thlai rah (a bikin mu nei chi) hian mit chhungril (retina) a tihrisel.

• Vitamin C - Serthlum, nimbu, tomato leh strawberry-ah te hian a tam a, Vitamin ‘E’ hi almond, avacado, nihawichi-ah te a tam. Lutein leh Zeaxanthin hi broccoli-ah te a tam. Vitamin C, E, Lutein leh Zeaxanthin te hian kumina ken tel natna (cataract, macular degeneration etc) a timuang thei.

Eng hunah nge i mit i entir ang?

• Mit ṭha lo sa chuan doctor te thurawn angin emaw a zing thei anga inentir ni se. Doctor te thurawn zawm hram hram hi mitdel pumpelhna a ni.

• Insawiselna nei lem lo pawhin a lo berah kum hnih danah vawi khat tal inentir ni se.

• Kum 40 leh a chung lam tling chin chuan mit entir ngei ni se.

• Thlahtu lamah mitmu pressure sang emaw inthlahchhawn theih natna emaw nei an awm chuan a a khat tawka inentir ṭhin tur a ni.

• Zunthlum leh thisen sang neite chu a zing thei anga inentir a ngai.

• Meizuk hian mit lamah nghawng ṭha lo tak a neih avangin meizu mi te chu a khat tawka inentir ngei ni se.

• Tarmit power sang vuah mek te chu a zing thei anga inentir ni se.

• Mit thim ṭhut, mitmu na, mitmu sen rum leh eng (light) chhana chhimbal ang deuh hmu (colour halos) te chu a rang thei anga inentir vat tur a ni.

Mitdelna hi vanduaina kan tih te zingah pawh a runthlak pawla ngaih a nih avangin i mit i lo duat hle dawn nia. Love Your Eyes.

- Dr R. Lalrindiki, Ophthalmologist Synod Hospital, Durtlang