MIZORAM-AH INTHLAN DAWNA PIANGTHAR ṬHIN PARTY AN AWM!

A thupuia kan hmuh ang hian, Mizoramah hian party pakhat, inthlan dawna piangthar ṭhin party, mittui nena mipuite hnena ngaihdam dîl a, mipuite'n an chunga rinna an nghah sauh sauh hnua danglam leh daih si, sawrkârna an lak hnuah chuan mipuite engah mah ngai lova, ṭawngkam buluk tak taka mipuite ṭawngkhum ṭhin party pakhat an awm. Chu party chu hmanni lawka mipuite'n kan chhang kham, nasa taka Zoram mipuite leh chung lamin a hnuh thlak party, Congress party hi a ni.

Tuirial bialtu MLA duh­awm tak chu a lo boral tak avângin, a hmun ruak hnawh khah a lo ngai ta a. Party lian pathum (Congress, MNF, ZPM)-te chuan beihpui an thlâk nasa ta hle mai. Heng zingah hian Congress pawhin tun hmaa an ze ngai, inthlan dawna pianthar tactic kha mipuite hnenah rawn hmang lehin, 'Kan insiam ṭha nasa dawn', tih te, 'Mipuite hnena ngaihdam dîlna'-te chu a ri ring leh ta hle mai.

He ngaihdam dîlna thawm ang chiah hi kum 2008 inthlanpui dawn khan a lo ri nasa tawh viau a, mipuite'n ngaidamin sawr­kârna kan chantîr leh hial a nih kha. An sawrkâr hnua mipuite min sawp dan leh cheksawlh dan, an ṭawngkam thlahdah dan, 'Zu zawrh hi kohhran ho ṭawngṭai chhanna', 'Saipui kal lai ui tang rualin an bauh ding lovang', tih te, 'India hmarchhakah kan kawngpui a ṭha ber' tih te kha, lalna leh thuneihna an chan hnuah, ṭap chunga vote an dil, an mipuite hnena an ṭawng duh dan a ni. Seal lem siam avânga Jail tan ngai hial MLA te, MLA meuhin taxi driver kut a thlâk thawmte pawh hriat tur a awm zut ṭhin kha.

'Insiamṭhat' hmangin nasa takin Tuirial bialah rawn inzuar leh mah se, 2008-a ṭap chunga ngaihdam dila mipuite hnena vote dîltu, a hnua mipuite nasa taka cheksawlhtute tho kha vawiina Congress hruaitute hi an ni a, an danglam lo ang tih hi rin hriat theih a ni a, lo inbum nawn tir li turin Tui­rial bial mipuite kan chah a ni.

Tin, Congress party hian Central-ah leh Mizoramah hian tho chhuak leh tur chuan, kum 2018 aṭanga chhiarin a tlem berah kum 10 tal a duh ang tih hi tun hma aṭanga Zoram Politiks thli a tleh dan aṭangin hriat theih a ni. Kum 10 a vei hnuah pawh hmana buluk taka mipuite rorelsaktute bawk kha an hruaitute an nih dawn tho chuan Lalpa malsawm ram rim an nam lova, mipuite leh chunglam hian hriak an thih nawn leh tawh lo ang.

Mitin mizia a dang ṭheuh angin, party tin hian mizia an nei hrang ṭheuh a, Mizoramah pawh hian inthlan dawna piangthar ṭhin party chu an lo awm na meuh mai.

- J. Lalramnghaka (Jeru-a)