ZU, DRUG, DEPRESSION VANGA BUAI THIN BOXER ROPUI TYSON FURY CHU

Kum 6 kalta khan Ukrainian Boxer rothap, World Heavyweight Champion kawnghren pali (WBA, WBO, IBF, IBO) kawltu leh kum sawm vel chhung World Heavyweight Boxing thununtu Wladimir Klitschko chuan hneh loh a tawng a, a hneh loh chu Tyson Luke Fury a ni. Tyson Fury chuan World Heavy weight champion kawnghren pali chhuhsakin Klitschko a hneh a nih chu! Chu chu kum 2015 a ni.

Tyson Fury hi Dt. 12th August, 1988 a piang a ni a, tunah kum 33 a upa a ni. Tyson Fury hi thla kim loa piang niin a pian tirhah KG chanve pawh tling lo gram 450 vel chauh a ni. A nu leh pa, an chhungkuate chuan dam khawchhuak zo lo turah an ngai hial. A piantirha chutiang a nih laiin tunah feet 6 leh inchi 9 laia sang niin kg 123 lai a ni ta daih. A pian hun lai hi Boxer ropui Iron Mike Tyson-a lar vanglai tak a ni a, Tyson Fury-a pa hian Mike Tyson-a hming chawiin a fapa hmingah hian Tyson tih hi a phuah tel ve nghe nghe a ni.

World Champion kawnghren a hren hnu kum 2016-ah chuan mak tak maiin Tyson Fury chuan rilru buaina leh depression te neiin zu leh damdawi a khawih nasa mai a, dam thlahlel zo lovin mahni inthahte hial a duh ṭhin thu a sawi. Hetianga damdawi a khawih ṭhin avang hian British Boxing Board of Control thuneitute chuan Tyson Fury chu hremin a boxing lisence an tih tawp sak a. Kum 2017 a rawn her chhuah chuan Tyson Fury chu Boxing ring chhungah kir lehin a nunphung hluite kalsanin hma thar a la leh ta. Mahse Boxing thuneitute hremna a tawh avangin Boxing license tihnun thar leh a ngai. Hetiang harsatna a tawh vel avang hian Fury hian sum leh pai tam tak a sen phah nghe nghe a ni.

Kum 2017 December thlaah thuneitu lam chuan Fury-a thu­nunna lakkian a nih tur thu an puang ta a. Kum 2018 January thla chuan boxing luhchilh leh theih tura phalna pek a ni leh ta a, hemi kum vek 2018 kum tawp December ah Tyson Fury chu Boxer ropui leh hnek na em em Wilder nen an inhnek ta nghe nghe a ni. Mahse, hemi ṭum hian anni pahnih hi inhnehtawka puan an ni. Tyson Fury-a ṭantute chuan inhnehtawk anga endiktute thutlukna chu an sawisel nasa a. Tun thleng hian Tyson Fury a chak zawk titu tam tak an la awm!

Kum 2020 February ni 22-ah chuan WBC Heavyweight Title inchuhin a vawihnihna atan Fury leh Wilder te an inhnek leh a, hetah hian Tyson Fury a chungnung hle. Round 7 naah knockout (KO) in Tyson Fury a chak ta nge nge a ni.

Dt. 10th October, 2021 a rawn her chhuak a, a vawi thumna atan Fury leh Wilder inhnek kan hmu leh. An palianin an hmuhnawm thial thial hle. Round 12 khelh tur a ni a, Round 11 naah Tyson Fury chuan Wilder chu Knockout (KO) in a hneh leh ta a ni. He an inhnek hi khawvel boxing chanchina inhnek ropui ber berte zinga chhiar a tling phak ngeiin a rinawm. Hmuhnawm tak a ni.

Tyson Fury-a chanchina thil ngaih­nawm em em mai chu Isua a chhuang ber tlat zel hi a ni. Khawvel huapa Champion a ni chung pawhin ama mimal theihna leh chakna vanga ngai lova Isua Krista vang liau liau a ni a ti zel thei hi a ropui zualna leh a entawn tlak em emna a ni. Rilru lam harsatna leh ruihhlo vanga a buai hnua Boxing khel leh thei tura a kir leh theih chhan bulpui bera a sawi ṭhin chu Isua-ah rinna a nghah tlat vang a nih thu a sawi uar ṭhin hle. Khawvel mipui ngaihsan rawn Champion kawnghren hreng thei tura hnehna a chan veleha a sawi uar ber ṭhin chu, Isua Krista hi Pathian dik tak a ni tih te, Pathian vang chuaha hnehna chang thei a nih thute hi uar takin khawvel hriat turin a puang ṭhin! Ama theihna aia Pathian thiltihtheihna leh ropuina a dah chungnung zel mai hi a fakawm ṭhin hle.

Kum 2015-a World Champion kawnghren pali a hren hnu lawkah rilruah buaina neiin depression hial a nei a, mahni intihhlum hial pawh duh chang a nei ṭhin. Zu leh damdawiah nasa taka a tlan hnuin huaisen takin chona thar hmachhawn leh turin Boxing khawvelah a rawn kir leh a, tunah hlawhtlinna ropui tak a rawn chang leh thei a ni. Boxing khawvela mipui ngaihven hlawh ber a rawn ni leh ta mek. He boxer ropui khawvel mipui ngaihven mek hian Isua a ngaihven ve ta zel hi a ropuina tizualtu a ni ngei ang.

Khawvela mi ropui tak takte hian rilru buaina, manganna, ruihhloa buaina leh depression nasa tak an nei ve fo ṭhin. Keini pawh depression kan nei emaw, ruihhloah buaina kan nei emaw, kan nunah harsatna kan lo nei ve palh a nih chuan huaisen takin hmachhawn ila, midang ṭanpuina kan mamawh a nih chuan midang ṭanpuina dawng thei turin midang puihna dilin, midang puihna dawng hreh lo ang u.

Kan harsatna te hmachhawn ngam turin huaisen takin Pathian­ah rinna nghat tlat chungin ke i pen zel ang u.

- Lalhminghlua Nkb