SAWRKARIN HRIPUI A HMACHHAWN DANAH MIPUI KAN THINRIM PART-II

India ram British awpna hnuaia a awm lai, Indopui-I na hun tawp lam 1918-1920 khan Spanish Flu a leng a. British sawrkarin hripui leng a do dan leh health care lama India mipui a enkawl dan a chhe lutuk a. Kha hripui lenlaia British sawrkar nawr leh sawisel a, mipui thlavang hauhtu ber chu Mahatma Gandhi a ni.

Mipui tawrhna a rapthlak ta: Mizoram sawrkarin Covid hripui lenga hmachhawn dan pawnlawi lutuk vanga Mizo mipui tawrhna nasa lutuk tawh hi engtin nge kan sawi fiah ang? A rapthlakzia hi sawi fiah rual a ni lo. Mizoram sawrkar hi a muthlu lui nge, hetiang taka Covid do nana health care kalpuina chhia, sawrkar tan hei aia ṭha zawk hian kalpui theih nghal a ni tih hi, kei Mizo hmeichhia mawlmang tak pakhat pawh hian ka hmu chiang hle. Chu chu May thla chawhma lama chief minister open letter ka thawnah ka ziak vek tawh.

Mizoram dinhmun mangchhia a ni: Global village leh union of India chhungah hian nitin Covid 19 positive thar, dam leh thi zat data kan hmu a. India ram state pakhat Mizoram, Zofate chenna, mihring tlemte, society nunphung nei ṭha, mipuite pawh Covid 19 dona kawnga sawrkar thupek leh thuchhuah zawm ṭha, lockdown/restriction beh hnan rei ber kan ni chunga mipui tawrhna langsar zual hetiang hi a ni:

1. Mizoram hi ni 23rd August, 2021 aṭanga vawiin thengin NE state 8 zingah nitin hripui kai thar zat tam ber kan ni.

2. Mizoram hi hripui kai enkawl mek (active case) ngah ber kan ni.

3. Mizoram chu Covid damlo dama chhuak (discharged chak lo ber, India ram pumah pawh recovery chak lo ber kan ni.

4. Mizoram hi hripui vei hmuh chhuahna, RTPCR test laboratory pakhat chauh nei awmchhun, district 11-in Laboratory pakhat inṭawm awmchhun kan ni.

5. Mizoram hi India ram mipuite hriselna kawng (health care & medical) ngaihtuahnaa mithiam leh thuneitu sang ber ICMR leh prime minister leh health minister ten, “RTPCR hian 70% test kai rawh u, RAgT in 30 % test kai suh u,” tia thuchhuah leh ngenna ngai pawimawh duh lo ber kan ni.

6. Mizoram hi central sawrkarin, “state sawrkarten district zawng zawng (all districts 718) RT-PCR laboratory din vek rawh u,” tih ngai pawimawh lo ber kan ni.

7. Mizoram hi nitin Covid test dinhmun report, union health minister hnena 8:00PM hmaa pek ziah tur pe hman lo, a tuk 8:00 AM-a pe hman chauh ṭhin kan ni a. Hetah hi chuan kan anpui Ladakh an awm ve khiah! Heti chung hian data dik lo a tam hle a. Kolasib district phei chu tum tam tak za telin hrikai an tihpun sak a, 20/30 a tihsual chu tlemin a zia a, 200/300 laia bawksik fo an ni hi a dik lo. Camplaint an siam hnuah pawh an la tisual reng a ni. Covid test positive leh negative result data hi tihsual hi pawi tak a ni.

Hengte hi literacy rate sang Mizo mipui zinga tam berin kan hriat leh hmuh vek a ni. Kan state sawrkar hotuten an hmuin an hre lo a nih chuan, paper document nen kei hmeichhe mawl tak pawh hian finfiahna ka hmuh tir thei a ni.

Rikrum thilah Mizoram a ri rum rum ve lo: Covid hri leng hi rikrum thil, thil lo thleng thut (emergency) a ni a. Nunna chhan nana rik rum rum ngai a ni. World health organization (WHO) chuan 30th January 2020 ah public health emergency a puang a. 11th March 2020 ah Corona virus pandemic a puang. Covid hripui leng avang chuan Mizoram pawh telin natna leh thihna a thleng zawih zawih a. Rikrum thil a nih angin khawvel pum hi nunna chhan tumin a ri rum rum a. Outdoor leh indoor stadium-ah te, biak inah te leh a remchang a piangah damdawi in an din rum rum a, ICU khumte an dawh chawp a, Mizoram sawrkar chu vuaicha takin hetiang hian a che ṭial ṭial tih point-3 chauh ka’n tarlang ang e:

1. Covid hripui len aṭanga kum hnih dawn thaw, October 2021 ah health minister-in “rikrum thil tak meuh meuhin nurse 50 contractual-in kan la a, tihsual palh a awm chuan mipui hriatthiamna kan dil e” a ti.

2. Lunglei district-a RT-PCR Lab dinna tur building chhawng 5 sak tur a ni a, a hmun tur an lai chawp.

3. Champhai district-a RT-PCR Lab din tur pawh a drawing peih fel a nih thu bialtu MLA, medical operational team chairman ni bawkin a puang a, chhawng engzat tur nge a nih ve tih erawh a puang tel lo. ZMC ami khawl pakhat an phur chho a, a dahna an sawn kual velah a emergency viau lawi a. Chutiang phurh chhoh rum rum chu MOT chairman chuan “expert ten a dahna hmun tur an la endik ang” a tih leh diar diar lawi si!

Nunna chhan nan Private hospital ka ngen: India ram pumah central sawrkar leh state sawrkar enkawl hospital bakah forces (army) hospital thlengin Covid 19 hripui veite enkawl nan an buatsaih a. State sawrkarin private hospital te pawh ward & bed zat tukin Covid natna vei damlote enkawl nan a dah tir a. India ram pum pandemic, community spread a nih vangin health services lam chu nasa takin an thawkrim a. India sawrkarin ram pum, khawmual leh thliarkarah pawh Disaster Management Act 2005 hmangin Dan a lekkawh a, chumi hmang chuan state sawrkarin mipui a control a. State sawrkar dangte chuan mipuite hriselna leh harsatna tawh sukiang turin Disaster Act 2005 hmang chuan private hospital te pawh an control a ni.

Mipui lam nun­phung control nana Act 2005 chelek chiam chiam hi hripui dona damdawi a ni ber lo tih hi Mizo mipuiten kan hmu chiang tawh hle. Hetiang em ema Mizoram mipuiin Covid hripui kan tuar a, hrivei enkawlna ZMC hospital, Falkawn ringawt hian min enkawl seng lo tih kan hmu a, kan hria a ni. Covid damlo ZMC pantu kawng lakah an boral a, ZMC chhunga enkawl tura thleng tlai a nunna chan pawh kan tam ta. Doctor leh staff te pawhin Covid hri an kai hnem ta hle. An hnathawk rim lutuk taksa leh rilru hriselna pawhin Covid a do zo lo a, an kai awlsam ta niin a lang. An hnathawhna an hlawhte pawh hri kai invenna damdawi, ei tur ṭha lei nan an sengso nasa hle tih sawi ka hria. State dang Covid hrikai thar dinhmun hniamte thlirin, Mizo mipuite tan sawrkar leh Health deptt / ZMC hospital chungah beiseina leh thlamuanna a tlahniam ta hle bawk.

Mizoram mipuiten tuna kan beisei chu ZMC chauh ni lo private hospital te pawhin damlohna vanga an hospital pantute RAgT hmanga Covid lo test ve ngawt chauh ni lo, hospital-a ICU, ward leh khum eng emaw zat an buatsaih hi a ni. Hetiang bawk hian district tina sawrkar hospital te pawh buat­saih hi harsatna eng lai nge awm? State dangin an tih theih a, Mizoram state-in a tih theih lohna lai hi Mizoram mipuite tan hriatthiam reng theih a ni lo. Thla 20 chhung Covid hripui lengin min chenchilh tawh a, India ramah Covid 19 leng laka health Infrastructure nei ṭha sa nghal khawi state mah an awm lo.

Delhi sawrkar chuan DM Act 2005 hmangin private hospital 100 chuang 80% Covid damlo enkawl nan a reserved tir a. ICU khum atan 40% a hauh vek bawk. Tunah chuan ICU khum hi 25% ah tihniam a ni tawh.

Oxygen hi chu a awm mai a. Covid dam lo oxygen tawng khawp lo, ventilator a chhawk ngai engzat nge ZMC chang lo awm? Chan har vanga nunna hlu tak chan phah eng zat nge awm? An awm lo tih tu nge sawi thei?

Chuvangin, Mizoram mipuite kan thih puk puk loh nan, private hospital-te insangmar a, mahni mihring pui mai ni lo, mahni chipuite tana insiamrem turin kan ngen che u a. DM Act 2005 hmanga Covid damlo enkawl tura tihluihna hmanga sawrkarin a tih hun kher ngai loin, Mizo kan nihna leh Lal Isua ringtu kan nih vangin in hospitalte Covid damlo tana buatsaih turin hmingin kan ngen takzet che u a ni.

- Ruatfela Nu