Lunglei MLA-te'n bial mipui aiin party thu an dah lal zawk
Lunglei leh RT-PCR khawl sawi rik fo hi ninawm lamah a kal tawh a, chumi phena politics lama hmalak tum an lo awm chhen hi a ninawm na ti zualtu a ni.
Hetihlai karah hian Lungleia MLA te chet dan leh an chet duh miah loh dan ngun taka lo thlir hian, heng MLA te hian an bial mipuite aiin MNF an dah chungnung zawk a, anmahni vote tu zinga neutral te an thlep hnawp a nih pawhin kum 2023 ah chuan an tih dik loh hi an hre ve tawh ang.
Lunglei Hospital atana RT-PCR khawl petu chu tu pawh niin Pu Hawla emaw Pu Duhoma hial pawh ni se, heng khawl hi MNF beihna atana an pek ni lovin Lunglei mipuite tana an pek a ni.
Tunah hi chuan Lunglei mipui RT-PCR hmanga test mamawh tan chuan Falkawna kal vang vang a la ngai a ni. ZMC ah zing dar 9 leh dar 11 inkarah test nan hman tumin Lunglei District kil tawp aṭanga kal ngaiin a ṭhen tan chuan Aizawla riah chilh a ngai.
State dangah hian zirlai Hostel lut tuin RT-PCR negative certificate an neih kher te a lo ngai a, hna zawnga interview hmachhawn turin RT-PCR negative a lo ngai a, hmun pawimawh bika kal turin RT-PCR test pal tlang zel a lo ngai a, RT-PCR hi mamawhna a lo sang hle.
Hetiang khawl pek a nih hnuah Lungleiah an bun duh lova, chumi chungchanga Lunglei mipui tana aw chhuah ngam lo, MNF party pawisawi hlauh avanga Leitlangpui mipuite pawisawi hreh tawh lo MLA kan lo nei thluah mai hi Lunglei tlangval nihna angin a zahthlak ve zozai a ni.
He thu kan ziah hian ZPM leh Congress fak pawh kan tum chuang lova, Congress MLA in Lunglei Hospital tana RT-PCR a pek chhan dik tak te pawh hi a politics zawnga thlir chuan rilru hrisel 100% a ni bik kher lovang a, mahse chu lam chu politics a nih tawh avangin kan khel zui lovang tun ṭumah hi chuan.
MLA te hi mipui tana ding tura thlan an nih laiin Lungleiah chuan mipui mamawh em em RT-PCR khawl bunna turin kan MLA ten aw an chhuah ngam lova, an ding zum zui mai. A lungawi thlak lo lutuk.
Kan thinurna belchhahtu chu Laboratory din theih dan endiktu mithiamte pawh thiam lo ti duh khawpa RT-PCR khawl bun harzia min hrilhtute hian tunah District tinah RT-PCR Laboratory din an tum a. Champhai nen hian RT-PCR laboratory kan nei rual deuhthaw dawn niin an sawi. Hei tluka Chhim mipui hmuhsitna leh rilru na belhchhahna hi a awm thei dawn em ni le?
- RFA Chawngthu