NGAIHSAN TUR DIK

Mizo te hi, kan ṭhenawm ramte nena khaikhin chuan tlemte kan la ni a. Kan ngaihsan zawng leh kan vei zawngah chuan rem leh rem lovah pawh mite tihdan entawna ti ve mai zel hnam kan ni a, ramin a ṭhatpui em tih lamah erawh ngaihtuahna seng kan tlem hle awm e.

Hman atan tawh tun thlengin he kan ngaihsan zawng lak vung kan la ching reng. Hmanah sawrkarin Tung rah a hmanna a hria nia kan hriat veleh thingtlang pa chuan Tung huan an nei deuh fur a. Sawhthing rate a ṭhat ṭumin lo neih bansan ṭhakin sawhthing hmun kan siam mai. Nakin zelah eng nge a an ang tihlam ngaihtuah lovin kan bawh hluai ṭhin.

Idol, Icon boruak a nih lai chuan, KṬP, ṬKP, PYD, SAY adt. thlengin kan huam chhungah Icon leh Idol kan thlang a, MHIP Day-ah thleng MHIP Icon kan la ti! Kan ngaihsan zawng a inan chuan kan ngaihsan zawnga a top ni thei te chu chawimawi pawh an phu a ni.

Miss thlan kan uar leh ta. Hei pawh hi a ṭhat lohna sawi tur aiin kan ṭhalaite sukthlek en hian a ṭhatna lam a nasa zawk a ni ang e. Kan thlang tlut tlut a, miss-ah kan intodelh ta phian. Kan changkang zel a, tualchhunga sumdawngte pawhin an dawr bungrua fak tur pawhin, mi chung en deuh hlir kan zawng ve ta, chu chuan a hnampui ṭawng taka celebrity (mi challang) deuh nih chakna te pawh ṭhalaite zingah a tipung a ni mahna. Mahse, he kan lar chakna hian milar mahni pawha inchawm zo lo kan hring

ṭeuh ang tih erawh ka hlau.

Mizo idol, icon, sportsman, model kan ni emaw, khawi College, University Miss leh Mister pawh ni mah ila, khawtlang tan eng nge kan tih ve ṭhin? Hetiang kan nih hian mite’n kan chungah zawhna an nei nghal ṭhin, chu zawhna chu, mitthi lumen naah te, thlan lai nikhuaah te a kal ṭhin em? Khawtlang tan eng nge a theihna? Mite entawn tlakin a nung em? tih a ni.

Miss an ni emaw, fiamthu thiam an ni emaw, model lar leh zaithiam tak pawh an ni mahna! Kan ngaihsan zawngte te hian huap zau deuh se a ṭha ang em? Tu pawhin lehkhathiam nih kan chak a, mah se kan thiam vek thei lo. Ram hruaitu ṭha ni tur chuan lehkhathiam a ngai. Tunlaiah chuan rawngbawlna kawngah pawh mi hawi zau deuh leh zirna lamah pawh mi te chung en an nih chuan kan zah bik deuh awm e.

Kan ramah hian ṭha kan tih tam tak zinga kan ngaihsanna kan tihlan lan vak lo chu, lehkhathiam te hi anni mai awm e. Pawl sawm, pawl sawm pahnih, B.A., M.A., thlengin Topper ni thei te kan en danah hian duh khawp lohna a lian. Model, designer, zaithiam, ei siam thiam, hla phuah thiam, footballer te pawh TV-ah te kan kawm a, an hlawhtlin dan leh an thil tum te kan zawt a. Anniho stage kan siamsak thei a nih chuan kan lehkhathiam te pawh hi kan ti ve dawn lawm ni!

An thlalak leh an hlawhtlinna te hi media lamah pawh thailan tam ve an phu lo em ni? Nakin lawka kan ram hmel timawitu tur, kan ram hruaitu turte an la ni asin. Tualchhung milar te kan en ang tho hian en ila, an ni pawhin phurna te an neih belh ngei ang. Kan lehkhathiam te hian ram hmel an timawi zawk ang em! Ngaihsan tur dik tak kan lehkhathiamte hi a theih anga tam tilangsar ang u.

- Ramchhana Hmar, Phuaibuang