Covid dona phul lem phah
Hman deuhva an sawi lar tak, Sports Minister Pu Robert Romawia'n phullem phah chu Covid dona atan a ṭha tih lam a sawi tih hi ka hai chhuah tum ve dan a dik lo nge ka hmù thei tlat lo.
WhatsApp leh Facebook vela an tihelna lam chiah hi ka hmù thei a, engpawhnise a sawi tum tâk sawi tur lovin a bawp lawkah a thu hi an la kawi mai mai a nih ka ring ta deuh.
Politics boruak hi chu a chhiat em avangin kan Sports Minister hian Phullem phah vangin Covid a bo ang tih lam chu a sawi a rinawm lova, phullem phahah hian ṭhalaite an inkhel ang a, chumi avanga an hriselna hmang chuan Covid hi kan do dâwn, a tihna ni turah kei chuan ka lo ralkhat ngaih a ni.
An sawi chhuah dan en hi chuan Covid damdawi ah phullem phah hman tum ang zawngin an sawi a, hei hi chu Sports Minister sawi tum a nih a rinawm lo e.
A lo sawi tak tak a nih chuan MNF leh MNF intih mualpho tawnna a ni daih dâwn a ni. Health Minister-in Covid a do hlawhchham avangin Sports lam aṭangin kan rawn do ve thung ang a tihna anga lâk kawih theih a ni a, chu chu party chhung atan a dik thei lo a ni.
A sawina hmun hi Hnahthiala phullem phahna tur a endik ṭuma a sawi an ti a, chu chu Pu Thangtea bial a la ni zui. A lo sawi tak tak a nih chuan MNF Ministry hmasa zawka School Education Minister hi khatihlai a SSA enkawltu zinga Officer pakhat ni ṭhin tuna Sports Minister hian a dim lo hle a ni, an ti daih dâwn a ni.
Engpawhnise kan ram hruaitute thusawi hi a ṭhen chu an sawi ang ni tho si, an sawi zawng zawng sawi chhawng duh si lovin an duh chin chinah an rek bung daih a, awmze dang hlak te an neih tir a. Video pawh ni se an duh chinah an edit bung hmawk a, an sawi tur an ti lang kim tawh ngai bawk si lo.
Social media awm chinah hi chuan ram hruaitute hi an khawngaihthlak lehling tawh a ni. Sports Minister pawh hian phullem phah hi Covid damdawi ang chuan a sawi hi a rinawm loh hulhual a ni.
- Lalropuia