*ZORAM MEDICAL COLLEGE-AH COVID AVANGIN KA AWM VE*

Mihring hi tu mah inang leh kan damchhung hun hman dan inang chiah chiah a awm theih loh. Kan taksa pianphung leh kan taksa khawl hnathawh dan pawh hi Pathian hian a danglam vekin min lo siam a, natna hrik do theih dan pawh a inang lo. Doctor-te pawh hi an inzir thar ve reng a ngaihna chhan chu khawvela natna lo thleng ṭhin hi a danglam ve reng vang a ni. Hmanlai aṭangin thil hi a ngai rengin a kal lo va, darkar tin hian thil a inthlak chho ni hian a lang. Chuvangin kan hringnunah hian mi fimkhur leh nun pawlawh chu kan thil tawnah a danglam lo thei lo a ni.

Awle, kei,Pastor V.L Sanglura Ralte leh ka nupui chu he covid natna hrikin min man palh ve hlauh mai a. Kan velah vei an awm neuh neuh lai pawhin min kal kân zel a, "Tunah chuan in hun a thleng ve ta, ka luhchilh ve dawn che u," ti ni awm fahranin, kan kaina chin pawh hriat lohin min rawn chawk buai ta. Kar hnih in lama kan inenkawl hnuin loh theih lohin ZMC hospital lamah chuan Ambulance motor chuan zan thim karah min phur phei ve ta ruai ruai mai le. Ralkhata kan lo hmuh leh hriat, a awmte thusawi lawmawm tak leh beiseina lawmawm tak karah mi beidawng leh hrehawmnain a khuh tlatte au thawm chuan ka beng a thleng ve si. Ka huphurh ve khawp mai a, 'Engtin tak chuan in lamah kir leh ang i maw?' tih chu kan nupaa ngaihtuahna lo lut zut zut chu a ni.

A taka kan dai hriat ZMC-a ka awm ve chhunga ka tawnte ka han tarlang ve duh a.

1. Vairam lama hospital-a thawk labour leh nurse-te an vîn theih nen, kan zoram Kristian rama kan hospital-a hnathawktute an va felin an va dawhthei em! tih ka hmuh khan min tihlim.

2. A bik takin kan awmna ZMC a nih miau avangin ka sawi duh chu, kan doctorte leh nurse-te thawhrim leh dawhtheihzia, damlote min duat leh min ngaihsak (care) zia ka hmuh khan ka dam hma phah niin ka inhria.

3. Ṭawngkam mawi lo leh ngaihthlak hrehawm rilru tina tur, natna belhchhah thei tur chi ṭawngkam an chhak chhuak miah lo kha a va missionary em! ka ti rilru vawng vawng a ni.

4. Ni tinin kuang an rawn zawn lut a, thi an awm reng a, damlo kan lut nguah nguah a, dama chhuak tam tak kan awm laiin a ṭhen erawh chhan theih lohin an dam hun chhung a tawp ta tih chu mit ngei chuan kan hmu ve si a. Beidawn mai chu awl tak a ni.

5. Kan hospitala hnathawktute pawh ni danga damlote enkawl ang ngawt khan an damdawiin inthuam pangngaia an inthuam thei lo ringawt pawh hi tawrh hrehawm tak a ni ang tih hi hai chi a ni lo.

6. Thinchhia leh hrisel lo deuh, damsam mang lova thawk tan chuan dawhtheih a har viau ang.

7. Mipui zingah lo vui leh lo phunchiar tawk an lo awm lo thei bik si lo. Mahse kan medical department-a thawk hote an fakawm ka ti khawp mai.

8. Kan hmuh ṭhelh ṭhin, lar zawk si chu, dama chhuak tam tak ai khan dam ve zo ta lo, ni tina 3 & 4 vel awm hi a lâr zawk a, mi rilru a khawih a. Medical department lam dem a, inthlahdah vangahte kan puh mai duh thei ṭhin.

9. Kan bula thil ṭha tak, mi dam leh fel tak hmuh hmaihin fel lo leh dik lo, thil ṭha lo lo awm, rimchhia, thil rapthlak lo thleng hi a lar zawk ṭhin. Chu chu Setana pawhin mite tihbeidawnna hmanrua atan a hmang ṭhin a ni.

10. Mihringin a thunun theih loh chin a awm a, hnathawktute an thawhrimzia leh an indaih lohzia, an hahziate ka mit ngeiin ka hmuh leh ka tawnna aṭang hian Krista tel lo chuan heng hi thawh a harsa khawp ang tih hi ka hmuh dan a ni.

Lalpan Chakna leh hriselna, dawhtheihna leh finna, damlote enkawl leh damdawi dik tak chawh turte pein, Missionary thinlung puin, ZMC-a kan thawktute Pathianin awmpui zel se tih hi ka ṭawngṭaina a ni.

- Pastor V.L. Sanglura