Inthlan pawimawh tak a ni
Tuirial bial MLA zahawm tak Pu Andrew H Thangliana hun lo taka a thih avangin a bial chu bial ruak a lo ni ta, a hmun ruak hnawhkhat tur thlang turin inbuatsaih mek a ni a, political party-te an ṭang hle.
Tun term chhungin by-election ṭum hnih neih a lo ni tawh a, a hmasa zawk chu Aizawl West-I bialah niin, Pu Lalduhoma a tlinkawp vang a ni. Helai bialah hian MNF-in sorkarna an siam aṭanga hun rei loteah by-election hi neih a ni a, mi nawlpuiin an rinlawk ang ngei leh tun hma lam ang thoin ruling lai MNF candidate chiang taka thlan tlin a ni.
By-election ṭum hnihna chu Serchhip bialah niin, bialtu MLA Pu Lalduhoma hektu awmin, Speaker-in an heknate pawmin a ban vang a ni. Party hrang hrangin theihtawp chhuahin Serchhip bialah ṭan an la a, mahse a tawpah chuan bialtu MLA ngai Pu Lalduhoma chu inthlanpui aia chiangin thlan tlin a nih kha.
Tun ṭum by-election erawh a hma-a by-election neih chhan ang lo takin bialtu MLA thih vanga inthlan ṭhat tur a ni. Sorkarna chelh mek MNF chuan an term chanve aia tam an hmang tawh a, chuvangin inthlanpuia chak tum party tan chuan Tuirial bial MLA by-election hi thil pawimawh tawpkhawk a ni awm e.
Ruling lai MNF tan chuan term khat by-election pahniha chak lo chu thil pawi tak a ni ngei ang. Mi ṭhenkhat a bik takin eptu party lam aṭangin MNF mipuiin an nin thu an sawi ṭhin a, tun inthlana an chak lo a nih chuan eptu party leh mi ṭhenkhatte thusawi hi a dik a ni tih nemnghehna-ah ngai ila a sual lohna chin a awm thei awm e.
MNF hi tun inthlanah hian an chak lo a nih chuan an party mite phurna thlengin nghawng a neiin a rinawm a, chu chu inthlanpui atan thil pawi tak a niin a rinawm. Tin, politics ngaihtuah lutuk lem lote pawhin MNF an hmuhdan a dan phah a nga, an tan chuan inthlanpui hmachhawn a huphurhawm phah ngawtin ka ring.
Kan state-a sorkarna siam rei ber Congress party chu tunlai hi an chhiatlai tak ti ila kan sawi sual kher lo maithei. Tunah hian insiamṭhat tumin ṭan an la mek niin a lang. Mah se, an party mite au phur tur chuan result ṭha an neih a pawimawh dawn. An party ngelngheh tawhna leh sorkarna an lo siam tawh dante ngaihtuahin tun hnaia inthlan hrang hranga an result hi result lawmawm a ni hauh lo ang.
Tun ṭum inthlana hnehna an chan loh leh ngat phei chuan an party mi an phur lo telh telhin a rinawm. Hnehna an chan hlauh thung chuan Tuirial bial mai ni loa, rampuma an party mite an phur thar ngeiin a rinawm. Chu chu inthlanpui hmachhawn hun atan nasa takin a pui ngeiin a rinawm. Inthlanpui lo awm tura chetṭhat an duh chuan tun ṭum inthlanah hian an chetṭhat ngei a ngai awm e.
ZPM hi party naupang ber an nih rualin, tunlai na na chuan party phur ber an niin a rinawm. An party naupan dan ngaihtuahin AMC-ah pawh result an nei chhe lem loa, Serchhip bialah hnehna an chan nawn hnu phei chuan an phur thar hle. Tunah an bial ni laiah inthlan an hmachhawn leh dawn a, hnehna an chang zui leh a nih phei chuan phur lehzualin inthlanpui an hmachhawn thei dawn a ni.
Tun inthlanah hian an chak zo lo a nih chuan an party mite phurna a tlahniam deuh ngeiin a rinawm a, chu chu inthlanpui lo thleng tur atan thil ṭha lo tak a ni ngei ang. Thawm chauh lian, a tak hmuh tur awm si lo tia beihna pawh an tawn belh ngeiin a rinawm.
- Lalsiamthara