Kawng chhiat chhan CM unau

Mizoramah nikum khan ruahtui a tam lutuk vangin khaw hrang hrang kalpawhna kawng a chhe em em a, a enkawltu PWD tan pawha chetlak ngaihna awm lo khawpin ruahtui tla khan a tibuai a, kawng a chhe ta em em mai a nih kha. Ruahtui a hul hnuah chuan PWD lam pawhin ṭan an han la a, a ziaawm ta viau.

Kawngpui enkawl chungchangah hian tunhma MNF hunlai aṭang tawhin ministry-a a fawng vuantu leh buai ber Chief Minister-te'n an chang tlangpui a, tunah pawh kan sorkar hrawn meka CM Pu Lal Thanhawla chuan term khat hneh lo taka a enkawl hnuah a nau Pu Lal Thanzara a'n enkawltir leh chu a ni a, kawng chuan ṭhat vak ngaihna a awm lo.

ZPM-in Chief Ministerial candidate atana an puan tak Pu Lalduhoma'n kawng chungchang an zawhnaah, Chief Minister-te unau-in construction com­pany nen an inthlunzawm thuk tawh lutuk a, eng ang kawng mahin a ṭhat a rinawm loh thu a sawi a. Pu Duhoma thusawi aia dik hi thu dang a sawi leh tawh kher lo ang, a sawi hi a dik em a ni.

MNF sorkar lai khan term hmasa zawk chu Pu R Tlanghmingthanga'n PWD a chan khan kan kang deuh awk a, mahse term lehah chuan CM Pu Zoramthanga'n a enkawl leh a, hmasawn ai chuan kan hnungtawlh leh ta kha a ni a. Tunah hian CM-te unau-in an enkawl a, kawng kan nei chhe viau.

Chief Minister leh Minister dangte hi khuallianah an ṭang hnem ropui si a, mipui tana hnathawhna an nei tlem hle a ni. PWD ngat phei chu Chief Minister hian a hnua enkawltir loin Minister dang viak ṭha zawk enkawltir ngat se hei ai chuan hma kan sawn ngei a rinawm.

Kawng pawh fang ṭha hman lo khawpa khuallian leh thil tenau te te buaia an buai chuan engtin nge engineer ṭha kan neih theih tehlul ang ni?

Pu R Tlanghming­thanga hunlaia Seling zero point aṭanga Darlawn inkar kawng blacktopping hi en teh u. Kum 20 dawn a ni tawh a, a la mam han a ni. Pu Tlanga ṭhat bik vang em em ni lo mahse, a siamtu tur construction company an thlan fuh vang te, a enkawltu Minister-in a vil hneh vangah ka dah lo thei lo.

Chuvangin, kan kawng chhiat chhan fur ruahtui tlak nasat vang tih leh lei chim ṭhin pawh a zawh tawk baka rit phur motor lianin a zawh vang tih te, a kilhna an ruk bo vang tihte chu chhuanlam a tling lo. Mipui hi kan lung a awi tawh lo.

Lalna leh thu­neihna inpek bik a, mahni unaute duhsak ai chuan mipui ṭantu Minister ber nge thawk ṭha thei ang tih hi Chief Minister-in tlawmah la loin en chiang se, a enkawltu tur midang ruat vat teh se.

- Lalkhirhvela