Smuggler zalenna ramah kan cheng mek

Tun hnaia thu ziak hrang hrang ka chhiar te, Facebook lama thil che vel kan hmuh te, WhatsApp lama titi hrang hrang ka hmuh leh ka tel ve nate hi ka thlir a, Mizoram hi zalen taka smuggler-te tuallenna leh an in vai vungna ramah a chhuak ta mai em ni? tiin ngaihtuahna a kal ding vawng vawng mai a. He thilah hian kohhran hian tih theih a nei lo a, Police lam leh dan hre mite pawhin tih ngaihna an hre ngang lo a nih chuan dan lo deuha chet duh rum rumna rilru ṭha lote kan pu deuh ut ut tawh a, chu em chu thleng lo se a ṭha ang.

Thawnthu ang deuhin heti hian sawi ta ila. Mi/ nu pakhat a awm a, chu mi chu mi zawng zawngin mi pangngai ve mai angin an ngai. Mi hausa a ni lova, mi aia thiam chungchuang pawh a ni hek lo.

Chu pa/chu nu chu a hnathawh em em pawh hriat tur awm lovin a hausa ta thur thur mai a, a hausak dan lah chu Mizorama rei tak sumdawngte ai pawhin a hausa zawk a, lirtheite a neih mai bakah midangte ṭanpui thei tur khawpin a hausa ta tlat mai.

Tichuan, mi zawng zawngin rinhlelh enin an en a, khehpuam a ti a nih loh chuan rangkachak emaw silai emaw a tawlh ru a nih ngei an ring ru ṭhup a, smuggler angah chuan an ngai a, mahse pawisa a neih tawh avangin khawtlangah thlengin a larin a inhawlh lawr viau ta a. Hei hi a taka thil thleng mek a ni.

Sumdawng tam tak an awm a, pi leh pute aṭanga sumdawng nghet tawhte pawh vawi leh khata khum vek a, rawn nêk per lawp thei tur khawpa rawn lian thut thut hi eng emaw zat an awm. "Khawilam mi nge hmanah heng hi," tih tur ang mai khan hmana kan hriat lem loh, kum 30 chuang sumdawngte aia rawn lian thut thut hi he ramah hian tam tak an awm ta.

Contractor te pawh hi in lo chhut ve ngai em, tun hma aṭanga contract hna ṭha taka thawk ve ngar ngarte aia lian thut hi chuan ngaih an ti ṭha lo. Hna hmu thei em emte pawh hian ngaih an tiṭha chuang lo.

Ngaih ṭha si lo hian kan ngawi ral mai mai ang a, nakinah chuan heng mite hian politician nihte hi an la tum riau riau ang a, ram roreltu lamah hian mi ṭha lo lehzual hi kan dah fur lo ang tih a sawi theih ta lo - kan Zoram suk thlek thlir hian.

He ramah hian kan smuggler te an zalen em em hi a ang ber hian ka hria a, hei hi eng tin emaw kan tih loh chuan kan ramah hian heng mite hi an la inluling lehzual dawn a, Latin America ram i hre reng ang u khai.

- K. Lalzarmawia (Mawitea)