Bâwngkâwn Tarzan leh Mr. Thoma

Mi ṭha deuh mai pakhat kan neih chu Isua zirtirte zinga mi Thoma hi a ni. Lal Isua a thawh leh khan a ṭhiante chuan an ring vek a, Thoma erawh chuan a ring tlat lo! “A kuta thir khenna serte ka hmuh a, thir khenna serahte chuan ka kutzung ka khawih luh a, a nâka ka zen meuh loh chuan ka ring lo ang” a ti bur mai. Chutiang finfiahna hmuh hmasak zet hnua awih chauh nun hi kan entawn tur chu a ni.

Zofate hian ui kan ang tlat! Ui sa kan ei a nih pawhin ang kher lo ila. Ui pakhat chuan ramsa pakhat khuaa lo lûta tlân bo leh nghâl chu a lo hmu hman a, bauh leh ûm a rual a. Chutih laiin, ui dangte chuan an hmu hman lo. Mahse, a hmutuin a bauha a ûm avângin an bauha an ûm ve ringawt. Eng nge an bauha eng nge an ûm tih pawh an hre lo. Thoma hi ui ni se chuan chu ramsa chu ka hmuh phawt loh chuan ka bauh lo ang a, ka ûm bawk hek lo ang a tih ka ring.

Tunlai khawvêlah hian thil thleng chi hrang hrang media lamah kan hre deuh reng a, thil eng pawh thleng se a rang thei ang bera social media lama thawn darh hmasak nghal zel hi kan rawngbawlna leh mawhphurhna pawimawh berah kan ngai tawh niin a lang. A bik takin thil thleng

ṭha lo lamah hian thu inchuh a awm deuh tlângpui ṭhin.

Chu chuan chu thil thleng chungchâng chhiartute chu pâwl hnihah min ṭhen nghâl a, ṭanlam kan nei zui mai ṭhin.

Hetiang thil thleng a lo awm rêng rêng hian Thoma angin finfiah hmasa ṭhin ila a duhawm hle. Ui ang maia thil thleng hmuh loh leh hriat chian loh kan lo bauh chiam chiam fo hi a ṭha lo hle mai. Rin thu leh phuah chawp thu mai mai sawi chhuahte hi thil âtthlâk tak a ni. Thoma kha chuan tumah a tir lo a, amah ngêiin a finfiah hmasa phawt a, a awih chauh. Rorêltute’n finfiahna (evidence) an phût kher ang deuhin keimahni leh keimahni pawh finfiahna inphût hmasa ṭhin ila a duhawm hle. Aw ka thlarau, he thil thleng chungchâng hi hre chiang hmasa phawt la, chumi hnuah i comment chauh dawn nia te ti thei ila a va ṭha dawn êm!

Thoma kha chuan mi thu sawi nazawng a awih nghâl mai lo. A ṭhian hnâite ngei ngei thusawi pawh a awih chuang lo a, a chhûngte sawi pawh ni se a awih chuang lo ang. Amah ngêiin a fiah kher a ni. Keini chu ui ang maiin kan awm hmunah mi thu sawi a dik leh dik loh pawh hre hmasa hawt loin kan awih nghâl tawp zel a, kan bauh a, kan ûm a, hei vâng hian alawm chiahpuam tih vêla sum nuai tam lutuk kan hloh! Kan chhûngte emaw kan hmêlhriatte emaw sawi a nih ngat phei chuan kan awih nghâl a, kan duhsak loh leh huat deuhte chanchin ṭha lo a nih ngat phei chuan kan awih awlsam leh zual a, ṭawngkam chhe tinrêng kan lo chhâk khum nghâl mai ṭhin. Finfiah hmasa loa thu sawi, awih leh ngaihdân lo sawi mai maite hi mi mâwl thawmhnaw chhuak thar ber a ni. Mi fing chuan thu dik tak hriat hmasak a tum ṭhin.

Finfiahna nêna thil tih leh sawi hunah kan awm mêk tih hi kan hriat a ṭha. Rin thu leh zêldin thu ringawt sawi mai mai hi a chi tawh lo. Tlêm lai deuh khan Bâwngkâwn Tarzan tia hming lem an vuahsak, khâma riak ṭhin mi pakhat chanchin hian sawi a hlawh hle a, mi ṭhenkhat an lo inhnial chiam phah bawk. Finfiahna nei mang si loin mi sual, rûkru leh tualthattu a ni ang ti pâwl an awm laiin a

ṭhenin mi khawngaihthlâk tak, mi zakzum, in leh lo awmna tur pawh nei lo, TB vei tite-in an lo sawi khawngaihthlâk leh viau thung a. Hetiang thilah hian an sawi Bawngkawn Tarzana hian nihna dik tak a nei ngêi âwm si a, chu chu finfiah hmasak ni se.

Kan finfiah theih si loh chuan rin thu lo sawi chiam chiam loh ni se.

Finfiahna awm si loin rin thu-in Barrack Obama kha sakawlhah kan lo puh tawh a, a lo ni leh si lo a nih hmêl a. American sakawlh chu a pension ta dêr mai. Finfiahna awm loin Aadhaar Number kan lo hlâu leh êm êm a, kan lo ngai sakawlh êm êm a, a nih lohzia finfiahna chu kan hmu ṭan leh mêk niin a lang. Tunhnaia natna hlauhawm tak German sentût (Rubella) ûm bo tuma India sorkarin hri danna man to tak a thlâwna min pêk pawh kha finfiahna awm loin kan lo hlâu leh zêl a, a zia lo ṭhin ngawt mai. Ramhuaite pawh finfiah hmasa loin zu ngawlvei, dawihzep leh dawhehte’n a hrâng an tih mai avângin kan hlâu êm êm mai zêl a, fiah phawt ila ṭha tur. Finfiahna tel lo hi chu a ho tlat ṭhin.

Thil duhawm deuh mai pakhat chu tun hnai deuh

aṭang khan social media lamah thil thleng ṭha lo, inhnialna thlen thei thil a awm rêng rêng hian Thoma anga finfiah hmasak phawt duh, side A leh side B thu leh hla ngaithlâk ve ve phawt loh chuan ngaihdân ka sawi lo ang ti tlat kan pung tial tial hi a ni. Hei hi finna kawnga hmasâwnna duhawm tak a ni. Fing lehzual phei chuan side A emaw side B emaw hian dâwt a la sawi thei tih an hria a, finfiahna hi an duhtui hle. Miin kan bula tu emaw chanchin an rawn sawi paw’n finfiahna kan neih loh chuan awih mai loh tur a ni. Finfiahna nêna thusawi leh awih hi a dik ṭhin avângin i uar thar ang u. Mr. Thoma hi a entawn chi viau.

- Miltona, Vaivakawn