Bial ngahnawm
Vanduaithlak takin ṭhahnemngai taka Tuirial bial enkawltu Pu Andrewa chuan mual min liam san a. Bial ruak a nih takah chuan bial mipui inchuhna boruak a ṭang nghal at mai a. Bialtu MLA lawina ZPM lam sunpui nan kian mai ang aw ti mai lovin Tuirial bial inchuhna chu a kal chho ta a ni.
Thu uar deuhin, Tuirial bial chu bial sakei tiin sum pawh a lo berah nuai 300 vel sen a ngai te an ti a. Bial mipui tan chuan ngaihthlak a nuam vak lovin a rinawm, sum nasa taka chelek ngaihna bial nih chu a tlawmthlak reng a ni.
Kum 2013 MLA inthlan khan candidate pahnih ngaihnawm zeta in um an awm a, Pu Joseph L Ralte, ZNP leh Pu Hmingdailova, INC te an ni. ZNP candidate tan hna khirh zet a awm a, chu hna chu Unit muthlu kaihthawh a ni, ZNP kha nawi ve tak an ni. ZNP candidate khan bul a ṭan thar a ni mah zawk awm e. An candidate Pu Josepha kha a la ṭhalai bawk a, reiloteah phurpuitu leh phur thar an pung zel a. Mak angreng tak chu candidate sum chelek tur ngah lo tak si kha ṭhalai leh khaw eng hmu chin khan an bawr ta hle kha a ni.
INC candidate kha chu bial vawng mektu a nih bakah ruling lai kha an ni miau a, Unit nghet tak tak nei mek a ni bawk nen hah taka phit kual a mamawh lo. Chutah inthlan an ni ta a, INC candidate in vote 5119 hmuin a hnaih bertu ZNP candidate khan vote 4880 a hmu a, an inthlauhna chu vote 239 chauh a ni.
ZNP candidate khan vote a hmu ṭha zek mai a, he bial hi chuti ngawt a sum duh over bial chu an lo nih loh hi mawle an tih theih. Khami ṭum khan, INC chu ruhrel lian zawk leh ruling thiltihtheihna chhawm mek a nih miau avangin tlingah ngai ta ila. ZNP party te reuh te unit pawh din chawp hial ni si khan vote a hui hnem tlat a ni.
Kum 2018 MLA inthlan chhui nawn leh thuak ila, hemi ṭum hian Party pathum ZPM, INC leh MNF insu tawk taka intlansiak tura ngaih an ni. ZPM lam khan ZNP chakna kha chhawm zui tura ngaih an ni a, chutah MNF lamin an bial lo vawng tawh, mipui ngainat hlawh tak Pu Sailothanga an candidate a. INC lam boruak a rit hle a, standing MLA ai ah INC a mithar kum 2013 a ZNP candidate che ṭha tak Pu Joseph L Ralte official candidate-ah an puang thung a. Bialtu MLA, kum 10 zet Tuirial bial lo kurpui ve tawh chuti maia hnawl ni ta chu lungdam zo lovin NPP hmingin a ding zui ve ta zat a. INC boruak a chiri chho ta a ni.
Inthlan result kan thlir chuan ZPM in vote tla aṭangin 30.80% a hui a, MNF-in 29.36% huiin INC-in 26.31% a hui ve bawk a, chutah INC hawlh phirsitu NPP lamin 8.49% a hui ve bawk a ni. NPP kha inrawlh lo ta se INC kha invawrh nawlh thei a ni. ZPM lam kha uang thei an ni bik lo tih a lang a ni.
Kum hnih ṭha lam ZPM in a awp Tuirial bial hi tunah fiahin a awm leh dawn ta. MNF ruling lai, ZPM bial neitu chan chang mek leh election trend en a chhe bik lo INC inbei kual tur hi hmuhnawm thlirin lo thlir phawt teh ang aw.
- Rosangzela, Vh