Sorkar leh Police khawih thil pahnih

1. Kan hriat angin kumin kum laihawl velah nasa takin Assam nena kan inrînaah buaina a awm a, state pahnih police-te inbeihna (inkahna) hial thlengin, police thi te pawh an awm a nih kha. Kha inkahnaah khan kan state police-te chan a tha zawk a, Assam police-te an tlanchhia a ni.

Kha inbeihna kha a lansarh viau lai leh, Mizoram police-te chu hnehtu zawk nia an lan laiin, kha thil thlen hma te, thil thlen hnuahte erawh chuan kan police-te hi a tawlh zawk an ni tlangpui zawk niin a lang. Hei hi kan police-te ṭhat loh vang emaw, dawih vang emaw ni loin, state sorkar rilru vang zawk a nih hmel.

Nikum khan Saiha­pui-V lamah te, Mamit district lamahte pawh buaina neuh neuh a awm fo a; chu'ngah chuan Assam lam hi a nawrtu zawk leh nawr chhuah nei zawk an ni zelin a lang. Ramri dik tak hi tihchian awm lo mah se, Mizoram china kan ngaih kan luah chin pawh kan chân nual niin an sawi.

Nikum lama Assam mite'n Lailapur leh Vairengte inkarah in leh dawr an siamte hâl a nih khan, a hâltu leh Assam lam nawrtu chu sorkar/ police-te ni loin, Vairengte mipui an ni.

Vairengte mipuiin Lailapur lam mipui an nawr tawm a, Assam lamah eng emaw chen Mizoramin a zuk luah theih phah a nih kha. A hnu lamah kan police/ sorkar-te'n duty camp zuk siam ve bawk mahse Assam nawr tawmtu chu Vairengte mipui an ni e.

Kumina Vairengte lama buainaah pawh Mizoram police-te'n Assam police-te an kâp hlum nual tak nã a, ram luah chinah erawh Mizoram hi ram hloh ṭhentu zawk kan la ni reng.

Aitlang lamah Vairengte mi 20 velte'n huan/ thlai an neihna ram eng emaw zat chu Assam-in an la luah zui mek reng niin a lang a; Mizoram sorkar/ police-te hian nawr chhuak ngam/ thei tak ang maw? An nawr chhuah loh chuan kan ram an chán hlen dawn tihna chu a ni mai a.

2. Home/ Police department hi a lian a, thawktu, hmunhma leh lirtheite pawh department zingah a ngah pawl tak an ni mai thei. Motor bikah hian hotu lian lamte an invulh hle a, SP chin phei chuan motor ṭha tak tak pahnih aia tlem lo an kawl vek niin an sawi.

Dik tak maw? Chutih laiin, thing­tlang lama awm, police station-te leh outpost-te erawh chu an pachhe hle niin an sawi bawk. Motor hi sem rual deuh a, mahni huam chinah rau rau, hmun hla tak taka rikrum thila che chhuak ṭhin thingtlanga police station-te hi motor leh hmanraw ṭha zawka thuam an ṭul hle mai.

- Lalhriatpuii