TAXI LEH TWO WHEELER TAXI

Traffic Jam Free City siam tum sorkar kan hrawn mek a, khawpuiah traffic ti jam lo turin mimalin motor kan ken chhuah tlem a ṭul a, pub­lic transport kan hman uar a ṭul thu hi mitin hriat sa a ni. Mahse, kan public tran­sport-te hi mipuite tan uar zawka chhawrnahawm an ni tak tak em tih erawh sorkar thunei­tuten an enfiah a ṭul ta hle. 

1) An rate a to lutuk: STA-in an tlanna tur rate a bituk sak a, a bute pawhin a tichhuak. Mahse, STA rate hian zawm a hlawh lo vel vek a ni ber. STA rate a tlan tura inngen chu thil sawt lo a ni a, tlan ai chuan passenger dang zawn an duh zawk a, a chang phei chuan awki sang taka inhnial a ṭul a, kut inthlak duh mai awm hmel pua passenger-te hnial pung pung chite pawh driver zingah an awm zauh zauh. An insawithiamna chu ‘STA rate hi chu hman ngaihna a awm lo’ tih a ni a, STA chuan rate hman tlak lo a siam tihna em ni? STA rate siam chu a hman tlak a nih chuan engatinge an rate anga tlan lo te an hrem loh? India ram puma taxi chuan man sanna ber state a cheng Mizo mipuite tawrhna hi a namen lo khawp mai. 

2) Tlan duh bikna an nei: Hei hi thil mak tak a ni! Sorkarin permit a pek danah chuan Aizawl khawpui chhung hi chu an tlanna turin a huam vek a, mahse, tlan duh bikna an nei a, tlan duhlohna an nei a, mamawh ngawih ngawih mah ila an tlan duh miau loh chuan mipuiin tih theih kan nei lo. Permit petu sorkarin thuawih lote chungah dan hmangin hremna a lekkawh kan la hre lo a, an duh duhin an sapatal a, mipui lakah taxi leh two wheeler taxi khalhtute hi an inluling em em ringawt mai a ni. Taxi leh Two wheeler taxi khalhtute hian mipui rawngbawl (public service) an ni tih an inhre lo tawlh tawlh a, an polite lo tawlh tawlh a, Mizo tlawmngaihna an tlachham viau a, mipuite vui leh vaina ri a ring ta hle mai, tunge ngaihthlak sak dawn le? 

3) Motor fit lo: Danah chuan motor fit lo chu mipui tan a him loh avangin service tir tur a ni lo. Mahse, lirthei fit loh chhuanlamin tlan duhlohna an nei a, brake ṭhat loh chhuanlamin tlan duhlohna an nei fo bawk, passenger te hrilhhai takin an siam fo ṭhin. An lirtheite a fit lo tak tak a nih chuan a fit lo tih hre reng chunga khalh chhuak luitute chungah hian sorkarin hremna a lekkawh dawn em? 

4) Zu rim nam: Two whee­ler taxi khalhtute zingah zu rim nam vung vung chunga service ching an awm a, kut khur dur dur chunga two wheeler khalh khur der der 

ṭhinte pawh an awm. Mizote hian inhek hi harsa kan ti a, kan inkhawngaih a, chuvangin, hetiang tih ching hote hi kan khawi lian zel a ni ber. 

5) Bal leh rimchhia: A bikin two wheeler taxi khalh­tute zingah thawmhnaw bal tak tak inbel ching an awm. Hengho hi an taksa pawh a bal a nih a rinawm, rimchhe tak tak pawh an awm. Kan thawhpui nu chuan a two wheeler taxi hman khalhtu a rimchhiat lutuk avangin kawng tluanin romol a a hnar a hup thu a rawn sawi lut bawrh bawrh mai a, a zia lo lam hret a ni. Hengte hi traffic jam free city siam tum sorkar hian a hria em aw? 

6) Mahnia dan insiam chawp: Two Wheeler taxi te hi hmun ṭhenkhatah chuan passenger-ten an duhna hmunah an phar ding thei lo a, an stand pan zel a ṭul a, hei hi anmahni association dan siam niin an sawi. He dan hian anmahni hmangtu mipuite tana awlsamna a kawk lo a, taxi khalhtuten anmahni hma sial taka an siam niin a lang. 

Hetiang dan hi khawi ramah mah midangin an hman ve kan hre ngai lo. Anmah­ni hmangtu tur mipuite zah­lohna a tling a, mipuite tana khawlh­khamna siamtu an ni. 

- R. Lalnunmawia