Tuirial campaign thawm a rapthlak

Tuirial Bial By-Election neih tura party hrang hrang campaign dan thawm ral khat aṭanga lo hriat ve hi a ri a ngaihnawm lovin hriat a va han hrehawm em.

Heti reng reng hian kan ram politics hi a kal a nih vaih chuan Manipur leh Arunachal Pradesh angin pawisa nei chiah an in candidate ngam dawn a, an in lei tling ve ṭan dawn a nih chuan Mizoram siam ṭhat hi chu a hla deuh deuh dawn a ni.

Sports Minister-in a campaign naah Kawnpui ah phul lem phah sak a tiam dan kha, "MNF candidate in thlan tlin chuan," tih kha kan lo hmu ve a, Mizoram hmangaih lova MNF chiah hmangaih anga kan hotute an lang fo mai hi chu ṭhalai rilru hi a na dawn tlat a ni.

Chief Minister khan opposition thlan tlin chu an tihfuh loh tur thu vaukhan ang maiin a lo sawi tawh bawk a, ram hruaitu hi chu ram pum huap an ni tih hi kan pawm dan a nih laiin political party pakhat hruaitu chauh anga an la inngai leh mai ṭhin hi ram vanduai tak chu kan va ni em! a tih loh theih loh ṭhin.

ZPM candidate hi pa ṭha tak a ni a, pa hausa tak a ni an ti bawk a, a thil neih dan a declare kha en pawhin pa namai lo tak a ni ang. A campaign dan chi khat ka tih ve mai, kawngpui siam sak te, field laih sak te ang chi hi a ṭha lo chu a ni hauh lova mahse hetiang ti ve thei lo dinhmuna ding politician tan chuan han cho phak rual a ni lo.

Amah an duh chhan an sawi hrang hrangte pawh contractor lian a ni a, a pawisa neih hmanga thil ṭha a tihna lam an sawi tam a. Heti zel a nih chuan Tuirial Bial ah hian ding ve dawn ni ta ila chu kan pawisa neih loh vangin kan tla tawp dawn a ni.

MNF candidate-in candidate atana an puan rual in ambulance a han pe tawp mai bawk a, a pui rem rem e. A inthlan affidavit en chuan amah chuan motor a nei lawi bawk si lo a, motor pawh nei lo motor pe thei si hi Mizoramah hian a awm chhun pawh a la ni hial mai thei tih te rilru ah a lo lut.

Pakhat pawhin a hma daih aṭanga Mizofed Chairman a nih chhung aṭanga a lo tum rauh rauh a nih leh nih loh hriat lovin petrol pump a laih tur mek an ti a, hetiang dinhmuna ding ve lo tan chuan in candaidate ve chu cho rual a ni lo.

Congress candi­date hi mi hausa chhung­kuaa sei lian a ni a, RTP ro khawmtu a ni. Congress sorkar laia an sawiselna ve ber pakhat zu zawrha a zu dawr lian (warehouse) neitu kha RTP family hi an ni. Thil danga a sum lak luh chu lo dah ṭha ta ila Congress sorkara zu zawrh laia a sum ringawt pawh tam tham tak a ni.

MLA hlawh pakhat mah lak lova bial tana pek ral vek a tiam a, hei hi tling se a tih tak tak theih tur a ni. A campaigner te pawh an tal na hle an ti bawk.

Hetiang mi khing tur hian ram hma­ngaihtu leh mi thiam pawh ni se, pawisa nei ve lo tan tih ngaihna a awm lo a ni.

- Manuna