NAKINAH
"Nung turin ei la, ei tur ngawt chuan nung suh" - Sap Thufing
Nakin hun hi awm lo ni se, vawiin hun hi a nawm ka ring ngai lo va. Vawiin hun hi awm lo ni se - nakinah sawi tur kan nei nang i. Vawiin avangin nakin hun thlirin a hlu a, nakin hun avangin vawiin hi a ropui leh zual ṭhin. 'Vawiin' leh 'nakin' hun hi kan pahnih duhthlanna leh kan ta a lo ni.
Damchhan ṭha nei lova inhria-in ṭhenkhatin anmahni nunna em pawh zah zo loin hruihrual leh an ban phak hmanraw eng chi mai pawh leklam an hreh lo va, natna leh lungngaihna ina a rehchhum, an ngam loh natnain a changin hmun sáng lumlai a luah a, vanneihna leh vanduaina inlehthal chhawkna ramah kan cheng ho vek a. Nakin atan vawiinah kan cheng lailawk hlawm a, he khualzinna khawvelah hian...
Vawiina hlim avanga nuia ṭe chelchul te hi naktukah ṭahna in a buan leh a, hneh tura chakna mamawh ber berte chu mihringte hi kan lo ni vei reuh va. Chung te pawh chu hre eng ang mah ila, kan buan te chu tisa mai a ni ṭhin si a. Kan tawpna ni nakin hun tur hi a nghahhlelh awm ber ṭhin mai pawh a!
Mamawh ngah leh mamawh nei vak lo te-in kan hringnun zat ve hi an insulpel a, vàn nun nawmna leia tem pha ve tura mahni tak ngial pawh in hre chiang ṭha ṭhum lo te nen a, leia vaivut khu tak rah perh sawk sawk hi mihring mi tak zia a lo ni lah tak a. Ngam huai deuh erawh a ngai, phur tak anga phur lo zet chung chung deuh pawha ding leh ãwn deuh pawha rah luih a ngai hi a lo ni zawk zaw mah a. Chu chu kan man thiam si lo va.
Mamawh chhanna famkim hi ziaka lehkha puan hràwm nawk nawka hrual mûma dahin a him bik a; lei rualrem rap tura vawiina kan nun thuruk lairil te nen hian, a chhanna famkim pawh leiah hian a bik lehzual ṭhin.
Thluak hmanga ei-in inzawnsiakna, lansarh leh ropui, hausak duh luat avanga kan tlak hlum fo ṭhelhna leiah hian indawm kun renga lei rem rah tum lote tan khawvel hi a va duhawm lo em. Rual awt reng renga nung turin kan lo piang a, rual awt reng rengin kan tar dawn ta zawng a lo nih ber hi a - Nakinah!
Mizo mi hmasa ka mi ngaihsan, thu leh hla khawvela ka hmelhriat langsar tak James Dokhuma'na mihring nih hi vanduaithlak taka a chhal fona thu hla pakhatah hian, tihian a ziak, "Khawsa thei leh mualkil mi tlangchhuak leh challangte pawh hi awmlai leh hri chhiate chuan a kal pel mai bik lo va, rualawhna-in a kalsan bik hek lo. Eng ang pawhin hausa tawntaw mah se, a zar an zo hnuhnun ber thihna chuan thlanmual lamah a la kaihkuah hlawhtling tho tho ṭhin. Mi dang aiin kuang an chang ṭha deuhin, tuamna puan mawikhai deuha tuam an hlawh chauh a. An hausak avangin an nun a sei chuang lo va, an dam laiin an hlim chuang hek lo. Mi rethei aiin damdawi an ei tlem chuang lo va, an nui tam bik hek lo. Chuti a nih tho si avang chuan mihring nih hi vanduaithlak ka ti ṭhin," a lo ti a. Chik taka thlirin a va dik kumhlun si em. Kan tawpna dik tak, mi tin kan inan tlanna chu fit thum fit ruk mai lekfang hi a lo ni - Nakinah chuan.
Nakinah chuan heng; natna te, lungngaihna te, damchhung khawsak lungkham buaina te, thihna te leh lusun khawharna te hi tih ban a ni kumkhua tawh dawn si a - Nakinah.
Nakinah chuan tihian ka ngaihtuah fo va, leia vaivut rawng kai i nih avangin mual ila liam ve ngei ang; chutih hunah chuan leia i hmusit, engah maha i ngaih lohte hian kan thlan min la laihsak ang a, mawi takin lei vung senin an la chhilh leh ang. Nakinah thlan ko tlangah tu'nge i nih tih hi nula leh tlangval tlawmngai thlan laiten titi-in an la sawi chhuak dawn. I chanchin hi sawi tlak, hriatreng tlaka duhawm a ni chiah ang em?!
Titeh 'Nakinah' chuan 'vawiin' hi kan la ngai ber dawn tak asin. A tak tak lovah chuan e, vawiina a lema nung ringtute nen, a tak takin kan la thi ho leh an - Nakinah.
- LH. Hauheng, Nghilhloh Rûn