BJP thawhpui hi India thil mak!

Kan naupan zir­laiah ‘Khawvel thil­mak 7’ tih zingah India rama Taj Mahal a tel ve te kha kan chhuangin kan sawi kan sawi ṭhin a, hmuh ve ngei chakna pawh min pe.

Tunah hei CADC inthlan kan ramah zawh fel a ni ta a, party mal sorkarna siam thei an awm lo. Indian National Congress leh BJP ber kherin thawhdunna thuthlung siam a, hming an han sign ta mai hi chu India ram khawi state maha thil la theng ngai lo, thleng thei tur loh ni si kha, a thleng a ni. Hei ngei hi a ni dawn lawm maw ni ‘India thil mak (wonder of India)” chu?

Central lam han thlir ila, INC leh BJP-te chu party inhal ber, policy leh programme pawh inang lo, INC lah secular thupui bera neih, tih laiin BJP lah Hindu sakhua chauh duh, Pu Hawla phei chuan Hindutva tia min sawi ṭhaih ber kha a ni bawk si a. Han ngaih mai pawhin heng party pahnihte hi chu eng hunah mah an thawh dun a rinawm lo.

Hman ni lawk Parliament Session-a budget pawh sawi ho lawk thei lo kha a nih kha!

Kan CM phei hi chuan a thusawina apiang­ah BJP hlauh­awmzia a sawi tel deuh zel a ni. Kristian sakhaw tana a him loh dan pawh a sawi zing hle. Hei vang hian BJP hi mipui mi mir chuan kan hmu Setana viau! Mahse CADC inthlan result puan a nih zan khan DDK chanchin thar puanah INC chuan Mizoram BJP President hnenah thawh ho puia sawmna an thlen tih a sawi ta mai a. Delhi lamin an duh loh thu leh MNF hotupa biak an tum thu te sawi a nih kha.

MNF President chuan NDA-ah BJP chu an thawhpui a nih avangin sorkar siam theia awm loh chuan sorkar siam dun tur an nih thu leh, CEM erawh Legislatur Party thlan tur a nih tur thu a sawi vethung a. An ni MNF-te chuan lo thawhpui ta pawh ni se a ngaih thiam theih. INC erawh thung chu National party a niin, chutiang ngawt chuan helai kan ramah hian an hotuten an lo ti ve ngawt thiang si lo.

Chuvangin BJP leh Congress party thawkho tur hian nakin atan pawh thil hlauhawm tak a thleng thei awm asin.

India ram state dang pawhin an rin phak hauh loh tur, khawvel pawhin a rin theih hauh loh tur, India ram mipui mi mir pawhin an rin miah loh tur, BJP leh INC ber kher CADC a sorkarna siam tura an inbe fel mai leh, member nei tlem zawk, BJP-in a fawng an han chelh ta mai tur hi chu India thil mak, ‘wonder of India’ a ni chiang awm e.

Indian Army a ṭang lai kan naute phei chuan an ṭhian vai sipaite pawhin mak an tiin, min nuihzat lutuk zuk ti hlawm a mawle! Thuneihna duh luat vanga mawi leh mawi lo thlu lo party nih hi INC policy nen pawh hian a inmil ang em le?

- Patrick Z, Chhingchhip