HSLC & HSSLC result thlirna tlang dang aṭangin

Kumin HSLC & HSSLC Result MBSE-in a tih chhuahah khan lawm­na tur, a ṭha lam (positive side) sawi tur a awm nual a. Board-in kum dang angin result a chhuah hma a, pass percentage HSLC & HSSLC ah kum hmasa lam aiin a sang bawk.

HSSLC bikah a thiam ho mark hmuh a sang ṭha ve ta viau bawk.

Thlirna tlang dang aṭanga thlir a lawmawm zan lo, khawi forum emawa la sawi ngai nia ka hriat te kan tarlang ve leh teh ang.

1. Distinction a pass an tlem zawk: HSLC Result-ah nikum lam aiin kum­inah Distinction a pass 50 tak meuhin an tlem zawk. HSSLC result-ah Science subject bikah 26 in an tlem zawk bawk. Kan zirlai thluak ṭha group (top brain group/ cream of student) an hnungtawlh a nih chuan a ṭha hauh lo ang!

2. English sub­ject-ah fail an la tam: Fail tamna subject te thlirin HSLC-ah English subject chu pathumna a ni a, candidates fail zawng zawng 3787 zinga English a fail zat 2086 an ni. Social Studies (S.S) subject a fail (1216) in a dawt a, fail tlemna ber Mizo subject a ni. HSSLC-ah chuan fail tamna ber chu English subject a ni. Candidates fail zawng zawng (Arts and Science) zat 1945 an ni a, English a fail 822 an ni. English Medium School kan nei tam tual tual a, mahse English subject a pass mark em pawh hmu zo lo kan la tam phian zel tho si!

3. Internal Assess­ment mark: Ni­kum­ah khan HSLC result bu-ah Internal Assessment mark tih lan a ni a, sawi zui a hlawh hle a, kuminah a lang ta lo a, sawi zui ngaihna a awm ta lo. Internal Assessment mark chungchanga sawi

ṭul ta chu, zirlaiin an mark hmuh hi Board exam hmain an hre tur a ni dawn lawm ni? HSLC a pass tur chuan Internal Assessment ah leh External (Board Exam) ah an pass kawp tur a nih pawhin Internal a an mark hmuh hi candidate-in an hre tur ni awm tak a ni.

Internal Assess­ment a fail tan, fail sa-in Board exam-ah an ṭhu ve ngawt dawn tihna a ni. University leh College-ah pawh zirlaite hriattir an ni ṭhin (Mizoramah). Hemi chungchang hi fel zawka kalpui a ṭha lawm ni?

4. Pakhatna (topper): Topper a mi pahnih (join holder) neih nge ṭha ang, topper a nih ang ngeia pakhatna neih? Pakhatnaah pakhat chauh awm dawn ta se, mark hmuh inzat mi 2 awmah khan enge or eng te nge ‘deciding factor’ ah kan hman ang?

Heng ang chi leh a dang dang pawimawh (crucial) fu fu ho hi engtia settle tur nge ni ang? Eng forum-in nge rawn rel fel ang? Thu neitute chet a hun lo maw?

- Prof Lianzela