Khehpuam a rawn inlar dawn

Mizoramah MLA general election chu kan hma lawkah kan nei dawn a, party hrang hrangte a rukin an inpuahchah nasa ṭan hle. Hetihlai hian damdawi ruih nana hman chi, Khehpuam kan tih mai aṭanga sum lakluh a rawn inlar dawn, a hlauhawm dawn mang e.

Election hma­chhawn tur candidate-te chuan a lo berah nuai za aia tlem lo an seng ngei ṭhin a, nuai za chu a tlem pawl pawh a ni mahna. Chung khehpuama hausate chuan kan politician, tlin ngei tuma â but tawh mai si a. Sorkarna chang mek Congress party chuan kum 10 ro an rel tawh dawn avang chuti lutukin sum lamah buai lo turah ngai ta i la.

MNF kum 10 lai sorkarna chang tawh lo candidate-te hi sum lamah an ṭam dawn tih a chiang reng a, sum hmuh theih na tur ang angah chuan mawi leh mawi lo pawh sawi loin a nei fate chu an tlawn huam tawh mai dawn a ni. Chutia MNF candidate-te lo tling tamin, khehpuam sum hmanga an tlin hnem a an sorkar vaih chuan sorkar kha an thuhnuaiah a awm dawn tih a chiang reng. Hlauhawm tak a ni.

Chutiang bawkin Congress lam can­didate pawh an hausa le lu lo mahna, sum an rawp ve dawn tho dawn a, khehpuam sum aṭanga MNF candidate tling thup ang thoin; khehpuam sum thoin an tling ang a, an sorkar nawn leh thei bawk.

Aizawl leh Mi­zoram khawpui danga building ṭha pui pui hi an thawhchhuah ai chuan khehpuam aṭanga sum an hmuh a nih rin loh phal chi a ni lo.

MNF leh Congress kan sawi laiin ZPM lam pawh hi sum lama ṭam nasa an ni dawn. An tan sum a awm chuan chance a nei ṭhe ve tho turah ngai ta i la. Khehpuama hausa sum an hmang lo phal bik ang emaw? Pawisa nei si loa party candidate tan chuan thlan tur dang a awm dawn lo. Khehpuam hmanga hausate sum bak hmachhuan tur an nei bik dawn lo tih hi a chiang. Chuvangin, tun ṭum kan inthlang tur hi Mizo mipuite harh thar nan i hmang mawlh ang u.

Sumdawng taima leh lian tak anga kan ngaihte pawh hi lehlamah kut tling loa sum lalut ṭhin an lo ni tih hi a chiang reng. Aizawl khawpui veng hrang hrang han thlir i la, sorkar hnathawk lian tak tak building aiin sumdawngte building a ropui daih zawk zel. Chu ai ber chuan sumdawng nia kan hriat lem loh, zin kual mai maite hi hun a lo kal meuh chuan an rawn nei luah zel zawng a nih hi.

Aizawla sum­dawng inang ṭheuh ṭheuh, an thil zawrh pawh inang, zin chhuah ngai loa bank draft kaltlanga sum pawh inthawn mai theih ni si, mahni zin ngai tlat, a hnua rawn hausa luah sawi tur an tam mai. Chuvangin tun inthlanpui lo awm turah hian kan fimkhur a ngai hle mai. Party tinte pawh kut tling loa sum lakluh hmang lo turin kei mimawl hian kan ngen ve mai mai a ni e.

- Lalhmingliana