Finance department leh GPF

Sorkar hna-thawk­te'n an hlawh aṭanga sorkara sum an dahpun ṭhin, General Provident Fund (GPF) chu Mizoram sorkar hnathawkte pawhin an ṭangkai pui hle.

Bank-a savings account aiin a pung a sang fe zawk a, chuta chhapah an sum dah aṭangin sorkarin a la dolet zui a, an vannei hle a ni.

Tunhnaiah sorkar sum zem a ṭha deuh ni tur a ni, GPF lak chhuah pawh a awlsam phian tawh a, finance lamin an ngaih pawimawh chu dam lohna thilah te, naupang zir zelnaah te a ni a, in sakna atan dil erawh an tam ber. Chutianga dilna chu finance department-a an hotute phalna lak a ngai a, finance officer-te duhsak nih chu a nuam khawp ang a, mahni pawisa ngei la chhuak tur mah ni se hmelhriat nei ṭha lo tan erawh a sak deuh ṭalh ṭhin.

Sorkar sum hman dan leh khawl dan hi finance department kut vek a ni a, chu­vangin officer-te pawh an fimkhur viau. GPF hi finance department chuan khuahkirh chang a nei a, a khuahkhirh lai chuan hmelhriat nei ve lo chuan man chawia lakchhuah a ngai niin an sawi.

Finance depart­ment-a thawk mi ṭhenkhatte'n engzat percent-in emaw an buaipui nia sawi a ni a, mi ṭhenkhat phei chu an awmna sawn pawh an awm.

Finance depart­ment hian eng vangin nge GPF withdraw chungchang hi an kutah an dah vek bik tih chu zawhna awm thei a ni. Entir nan directorate lam emaw, police lamah battalion, SP emaw khan an naute mamawh dan an hre zawk fe a, chuvangin an dilna an hotute kaltlang tawh na na na chu ihe loin lo pass sak ve mai ṭhin awm a nia. Midang rawih emaw, hmelhriat neih ṭhat la ngai cheu hi hriatthiam a har khawp mai.

Nikum lam khan Finance Minister khan GPF withdraw hi a khawih vek a, a kalphung mak tak hi a hrethiam ve lo tan chuan a buai peih an ti hial a ni. Dilna lut zawng zawng a hawn a, zanah leh zingkarah pek tur leh tur loh, pek tur zat nen a mark a, finance department-in pek tura Minister-in ziah chauh an lo pe ta ṭhin a ni. Mahse tunah chuan finance officer-te kutah a pe a, Secretary-in pek chin tur bithliah siam a ni a, chutiang chuan an hnuaia mite pek tur zat bithliah a awm diat diat a ni.

Mahni sum dah, mamawh laia withdraw har em em mai ṭhin hi chu a enkawltu department hian in enfiah thei ta se a ṭha hle ang. Department hrang hrangah officer fel tak tak an awm a, chung mite kutah engemawzat dah mai ṭhin se an buaina a ziaawm ngei ang.

Department-in an pekchhuah zat kha lo monitor ta mai se a ṭhat hmel zawk e. Hna dangah an buai tho si a.

- Lalkhirhvela