BJP leh an Hindutva hlau tur khawpin lehkha ka zir

Tunlai hian Mizo lehkha­thiam inti zingah, “Hlauh ngah Mizote hian state dangin an lawm em em BJP-te kan hlau a...” kan han ti a, keia lehkhazir ve leh ka lo chhiar ve tawh aṭangin BJP leh an hindutva hi hlauh tur an ni tih hi ka ngaihdan chiang tak a ni.

BJP hi political party dang ang an ni lo tih hi hriat phawt a ngai. India ramah hian Muslim League an awm a, an hming tak chu Indian Union Muslim League an ni a, Kerala lama mi an ni. Mizote hian Muslim League-a luh hi kan duh lovang, a chhan chu Muslim an nih miau avangin. BJP hi Hindu party an ni lo tite hi chuan BJP-ah beisei an neih vang a nih loh chuan dawt an sawi vang a ni, BJP chanchin hi chhiar ula, a tawpa tawpa an tum chu Hindutva din a ni.

English hrethiam chin chuan BJP chanchin inziahna hi kan hmu ang a, “The BJP is a right-wing party, with close ideological and organisational links to the Hindu nationalist Rashtriya Swayamsevak Sangh. The BJP's origins lie in the Rashtriya Swayamsewak Sangh (RSS) and the Bharatiya Jana Sangh by Syama Prasad Mukherjee,” a in ti.

Hindu kal fawr pawl RSS nen an inzawm mai a ni lova, BJP hi RSS aṭanga piang a ni. Hei vang hian BJP zara pawisa hmuh beisei vang te, BJP an sorkar mial chuan he lamah hian ka zuang anga chutiang chu ka ni ve thei ang, tih beisei chunga lo sawi mawi ve chiam chi a ni lo. BJP hi tute’n emaw a hlauhawm lohna an sawi chiam avang hian an nihna hi a bo dawn chuang lova, BJP chu Hindu kal fawr pawl RSS-in India ram hi Hindu rama an siam theihna tura an din a ni.

RSS chanchin an ziahna­ah chuan, “RSS is an Indian right-wing, Hindu natio­nalist, paramilitary volunteer organisation that is widely regarded as the parent orga­nisation of the ruling party of India, the Bharatiya Janata Party,” tih a ni.

Kei chuan BJP ka hlau a, BJP-in Mizorama MLA an neih hi ka hlau hle. An tum chu BJP lam ṭang sorkar siam a ni. Tichuan BJP chuan an pawisa neihte an rawn lentir ang a, chutah chiah chuan pawisa duh Mizo ṭhenkhat hian “BJP a hlauhawm lo,” kan ti ang a, chumi tlukpui chu, “BJP leh an pawisa leh a ken tel thil dangte hi kan duh,” tihna ni.

Vai tamzia, Hindu tamzia leh Mizo nuai 10 vel lek kan nih hi hre chiang ila, Vai hovin Hindu rama India siam an tum pawh hi hre bawk ila. BJP in Mizoram an rawn luh chilh meuh chuan kan la inchhir khawp ang, tunah leh khuareiah.

- Lalmuanpuia