'Thar' tih leh Mizoram Politics

Congress chuan Tuirial By-Election remchangah hmangin 'Congress Thar' an au pui ṭan a, a au tute chu kum 10 chhung kan ram enkawltute kha an ni a, mihring ngai chiah chiah kha an ni. Chutihlaiin Congress hian 'Thar' hi an lo au tlin pui ve tawh a, NLUP an sem hmasak hnu khan MNF kha kum 10 chhung an tling a, chumi hnuah a Congress party tho a hruaitu ngai reng a hma 1998-a mualpho taka tla tawh kha 2008 ah ropui tak in NLUP thar nen an rawn tling leh nawlh a ni.

MNF hi 2008 a mipuiin an paih khan an han tlachhe em em khawp a, an mi challang chin chu an tla fai vek a ni. Chief Minister ber pawh kha bial pahnihah a ding a, a tla bawk a, a tawpah chuan an puh ber chu Electronic Voting Machine an tichingpen tiin thu awih awm loh muhlum chu mi mawl zawkte bumna atan an han sawi char char duh a. Mahse chu mite tho chu 2018 ah chuan thil thar zuarin cheng nuai 3 nen an rawn campaign chuan an tling leh hlawl mai.

ZPM hian anmahni an la sorkar ve miah hmain 'Kalphung Thar' tih an rawn zuar ve leh bawk a. ZPM hi chu ro an la la rel ve loh avangin an chhiatzia sawi tur a la awm lem lova, thil thar hi zuar kher ta lo mahse a thar chu an ni dâwn tho thova, mipui rilru hneh tumin Kalphung Thar an rawn zuar niin a lang.

ZPM an sorkar chuan eng pawh nise mi thar chu an han ni dâwn phawt a, sorkarna la chelh ve ngai lo an nih avanga an ṭhat leh ṭhat loh chu hun in a la hril ang a, a pawimawh ber ta chu an sorkar thei ang em? tih hi a ni leh ta a ni.

Sorkar tur chuan Chakma leh Tuikuk bial lamah MLA an neih ve a ṭul hmel si a (MP inthlana an candidate inṭawm kha Chakma leh Tuikuk ama bial zawng zawngah a hmù hniam fal hle) chu chu an neih theih loh chuan Mizo hlang awmna hi an hui fai viau loh chuan a harsa ve ṭalh thei asin.

Tuirial Bial lamah lut leh ta ila. Mizoram lo enkawl hrep tawh Congress in 'Thar' an han au pui leh ngam hi chu a mak angreng a, tuna thar ngai lo hian hman ni lawk khan ro an rel chhung khan lo thar ta mai se. Pu Hawla tel lova nung thei si lovin Pu Hawla sit em em ang maia '2023 ah chuan Pu Englova hovin Congress thar kan din dâwn,' an tih an tih hi Pu Hawla a dam lai ngeia hnawlna ṭawngkam a ni. Hei hi chu Pu Hawla camp lam tán chuan au hla ngeiawm tak a ni phawt mai.

MNF hi an rorel dan te, an chet duh dan te, Chief Minister leh Minister of State pakhat an in kawp tlat vang te hian ni maw mipui hian an paih ti tih tlat tawh a, By-election mi ve si ruling hian tlin loh zuk han hläu em em a. Rorel dan chuan zir se bel chhunga sâ niin an inchuh luai luai tur a nih laiin mipuiin an duh deuh beiseiin MNF ticket a ding turin Congress lam mi leh sâ ni reng ṭhin (a chhungte chu an la Congress a ni awm e) an han sàwm tlat mai hi a mak ve a. MNF pachal General Secretary rual ticket beisei ve reng te kal kana mi thar an seng lut ta mai hi thil mak tak a ni. Hei hi thil 'thar' a nihna chin pawh a awm a ni.

Engpawhnise Tuirial Bial By-election zet chu tlin inring pathum an awm a, thil thar zuar pahnih Congress leh ZPM an awm a. MNF lamin mi thar sàwm luh chawp an zuar bawk a, thar suau suau phawt mai se, nuih erawh a zà tet tet a ni.

- C Lalremsanga