Turial Bye Election ka hmuh dan

Inrinni (23rd October, 2021) khan MJA-a kan hotute hnungzuiin October ni 30-a Tuirial bial Bye Election neih tur boruak awm dan thlirin Tuirial bial khaw ṭhenkhat kan zuk fang kual a. Heng khaw hrang hrang kan tlawhnaa party worker-te leh mipui ṭhenkhat ngaihdan ka zawhkualna aṭanga ka ngaihdan tlem kan tarlang ve teh ang.

Kan hriat ṭheuh angin Tuirial bialtu MLA, Pu Andrew H. Thangliana chu vanduaithlak taka a boral avangin he bialah hian Bye Election hi buatsaih a ni a. MLA Term kal mekah tun ṭum hi Bye Election ṭum thum neihna tur a ni ta a, heng Bye Election-te hi neih a ngaih chhan a danglam ang bawkin inthlan boruak pawh a inang lo hlawm hle a. Bye Election hmasa ber, ZPM Leader ni ta Pu Lalduhoma bial chhuahsan Aizawl West I biala Bye Election kha chu MLA inthlanpui neih zawh hlim, MNF kaihhruai Sorkar din tirh a nih avangin tling tur inrinsiak ngai lovin rorel lai Candidate, Pu Zothantluanga a tling dawn tih hriat sa a ni a. Bye Election tum hnihna Serchhip biala neih pawh kha Pu Lalduhoma MLA aṭanga bantir a nih danah mipui lamin rorel lai MLA te thil tih dan an thlawp lutuk lo nia a lan avangin Pu Lalduhoma kha tling nawn leh tura beisei a ni a, hnehna sang tak nen a tling nawn leh ta reng a nih kha.

Tun ṭuma Tuirial bial Bye Election neih tur hi kan sawi tak Bye Election hmasa pahnihte nen a chhan a danglam ang bawkin inthlan boruak pawh a danglam hle a. Kumin kumtir lama Serchhip bial bye election-ah kha chuan Political Party-ten khawlai leh mimal chenna in-ah party flag an tar hmuh tur a awm mang loh laiin, Tuirial bialah erawh khaw tinah flag hi an tar nasa hlawm hle a. Khaw ṭhenkhata flag intar chu inthlan buaipuitu, election official lamin an lak thlak ṭhentir hial a, party ṭhenkhat flag phei chu khaw chhungah mai ni lo khaw inkar kawng tluana inzar hmuh turte pawh a awm hial a ni. Flag hmanga inbeihna (Flag war) piah lamah hian Serchhip bialah kha chuan political party-ten mi thar lawm lut ve bawk mah se, party hruaitu zingah mahni awmna party chhuahsana party dang zawm sawi tur an awm meuh lo a. Tuirial bialah erawh hi chuan, khaw tin deuhthawah party hruaitu party danga inlet thawm hriat tur an awm deuh reng thung a, hei hian kawngro a su dawn em tih erawh hriat a ni lo thung a ni.

Party hrang hrang worker-te leh mipui sukthlek aṭangin Tuirial bial Bye Election-ah hian Candidate 4 zingah Party lian pathum – MNF, ZPM leh Congress ten tlin theihna chance sang tak an nei vek niin a lang a. He biala bye election neih chhan hi a hmasa pahnihte aia a danglam avangin Political Party zingah dinhmun ṭha bik an awm sa chuang lo ti ila kan sawi sual tam lutuk a rinawm lo a. He biala rulling party ni lai ZPM chuan lusun chunga he inthlan hi an chuh avang leh an campaign au hlaah pawh mipuite chu ralna atan ZPM Candidate vote tling tura ngenna lam an aupui a. Hei hian inthlan puan tirh lam khan mipui rilru a hneh hman viau nia a lan laiin, tun dinhmunah erawh chuan awmzia a nei thui lutuk tawh lo niin a lang a. Hetianga kan sawi rual hian lainattu an nei ta lo tihna erawh a ni lo tih hriat tel a tha awm e.

Party hrang hrang worker-te sawi danin, Party lian pathum zingah inthlan puan tirh kha chuan Congress Party chu an dinhmun a ṭha lo deuh ber nia ngaih a ni a. Tunah erawh Candidate ṭha tak an neih bakah Headquarters lam hruaitute'n nasa taka ṭan an lak avangin tling thei dinhmunah an ding ta hial a ni. Congress party worker-te chuan an party member zinga kum 2018 MLA inthlanpuia an candidate vote lo leh chhan hrang hrang vanga an member hlate chu an pawt hnai leh deuh vek tawh niin an sawi a. Hei hi tlin an inrin chhan lian tak pawh a ni nghe nghe a. Hetihrual hian party dang aṭanga mi thar lawm luh nei bawk mah se, an ngah lutuk hran lo a, an member hla an hnuh hnaihte nen hian hnehna an chang zo ang em tih erawh ngaihtuah zui tham a ni.

MNF Party pawh rorel lai pawl an nih miau avangin dah tet theih an ni lo tih chu chiang takin a lang a. MNF party worker-te chuan an sorkar term kal mekah kum 2 emaw zet hun an la neih avangin bial mipuite'n he hun tawite chhung tal hi chu ruling bial nih an duh ve tawh tih an sawi a. Khaw ṭhenkhata an party worker-te chuan an khuaa vote awm zat aṭanga chhutin an party-in member inziaklut an ngah deuh ber niin an sawi hlawm a ni.

ZPM Party worker-te chuan Tuirial bial bikah rulling lai an nih miau avangin tlinna chance ṭha tak an nei tih an sawi ve thung a. An bialtu MLA boral ta sunpui tura vote tum eng emaw zat an awm piah lamah inthlan hmasa lam aṭangin kalphung thar siam duhtu Party-a inhmang lem lo mi tam takin ZPM chu a ruka an thlawp tlat avangin an zam lem lo tih an sawi a, tling turin member an ngah tawk niin an sawi bawk.

Tuirial bialah hian inthlan puan tirh aṭang khan sum leh therhlo hmanga vote zawn leh lei a tam hle niin sawi thawm a awm a. Hemi chungchangah hian political party-te chuan social media lama tlangthang ang em em chuan hetiang hi a awm an hriat loh thu an sawi hlawm a. Kawnpui khuaa mi rintlak tak pakhat chuan therhlo sem awm nia sawi chungchangah mipui lam demna ang lek leka thu a thang chu pawi a tih thu a sawi a, sum sem hi a awm a nih chuan mipuite'n candidate-te lak aṭanga an phut chhuah ni lovin, candidate-ten mipui an tiamna vang zawk a nih a rin thu a sawi. Inthlanna thianghlim leh felfai a awm theih nana hmalatu MPF pawhin Tuirial bialah hian theihtawp an chhuah mek a. MPF hian a tir lamah thil kalphung an man tawk loh avangin an hmalaknaah tih hmaih palh an nei ve nual a, tun dinhmunah erawh khauh taka inremna thuthlung kengkawhin, chak takin hma an la mek a ni.

Kan sawi tak ang hian Political Party tinin tlin an inrin theuh avangin tu nge dingchang ber dawn tih chu hriat lawk theih a ni lo a. Chutihrual chuan tu emaw ber chu an tling dawn tih a chiang thung a. Turial bial mipuite chu an bialtu boralta Pu Andrew-a aiawhtu tur MLA thar duhawm tak an neih ngei theih nan duhsakna ka hlan a ni.

- Samuel Lalruatsanga