Tuirial Bial Boruak
Tuirial bial by election campaign boruak sang tak han thlir hian mipui rorelna, democracy kalphung sawh ngheh zawngin kan kal nge, a sawinghing zawngin kan la kal zel aw...
Mipui rorelnaah hian political party ten programme leh policy an neihte an zuar ṭhin a, chu chu mipuiin lo bukin, chhia leh ṭha hriatna thiang tak nen an tana ṭha ber tura ngaih an thlang tling mai tura ngaih a ni.
Tuirial bial by election-ah hian party ṭhenkhat chuan an programme leh policy sawi aiin party dang beihna lamah an tui hle zawk a, an thusawi tam ber chu chumiah chuan an sawrbing a. Sum leh therhlo hmanga in thlemna pawh a nasa a ni ang, mipui nawlpui, chik taka thil ngaihtuah thiam ve lo leh hriatna zau lo zawkte chu an ti chiai hneh viau a nih hmel.
Tual chhung party hruaitute pawh an in thleng tawn nasa a, banna lehkha an thehluhte lah chu a dawngtu turin a dawn hmain social media lamah a darh chiam zel a. Banna lehkhaa an ban chhan an ziahte lah chu tuten emaw a na thei ang bera an elpui party-te beihna thiam taka an bilhtel sak a ni zel a. Anmahni kut chhuak tak tak a ni lo ang tih a hriat theih hlawm.
Ruling MLA neih loh vanga ro ta viau tur leh bial mipuite pawh sorkar laka inthlahrung ta viau tur anga mipui hmaa thusawite phei hi chu mipui rorelna kalphung kalh zawng a ni a. Mizorama MLA bial 40 awmah hian tuna by election neihna tur Tuirial bial chhiar telin opposition bial 13 a awm a, heng bial 13 ah te hian rorellai party candidate te khan vote tam tak an hmu ṭheuh a ni.
Opposition bialte hrek tur ang zawng leh an tana inthlahrunawm ang tur zawnga sorkar kalpui chu sorkarna siamtu Party tan anmahni duh bertu leh an tana vote petu mi tam tak thlauhthlakna a nih dawn avangin thil tih chi a ni lo a, an ṭhatpui pawh a rinawm lo.
Inthlan leha vote tam ber hmu thei tawh tur leh mipui rinna hlawh chhuak tur khawpin an chaklohna bialte chu an enkawl a ngai zawk tihna a ni mah mah zawk ang chu. Kan campaign thawm aṭang hian Zoram hian hmasawnna tur leh zir tur tam tak kan la nei tih a lang awm e.
- J Sawma Vanchhawng