Mizoram Investors Summit ka chhim ve
Mizoram sorkarin Mag-netic Mizoram Investors Summit a buatsaih dawn tih chanchinbuah ka lo chhiar khan chhim ve ka chak rilru hle a. Ṭhian ṭhenkhat hnenah ka sawi a, anni lah chuan chuti takin an lo ngai thupui lo a, ka rin aiin an tuipui lo, sawizui pui vak theih pawh an ni lo. ‘Va kal ve rawh, a duh apiang an sawm, inthlahrung loin va kal ve tawp rawh,’ te min ti vel mai mai a, ṭhiante fuihpawrhna azarah inthlahrung vak loin ka va tel ve ta rawih a ni.
Kumin January thlaah khan Kolkata New Town-ah Bengal Global Business Summit neih lai kha Kolkata a ka cham lai a ni a. A tuk maia Delhi pan tum ka nih avang leh tih tur dang ka neih nual avangin duh anga rei ka tel hman lo naa, Kolkata a ṭhiante zarah a hmun ngeiah ka va chhim ve hram kha vannei ka inti hle. Kawng engkimah kan dinhmun a intiat loh em avangin Bengal Summit leh Magnetic Mizoram Summit chu khaikhin pawh ka tum lo a, chumi rilru pu sa chung chuan Berawtlang lam pawh pan ve ka ni.
Zanah ina ka haw hnuin mut hmunah ngun takin Mizoram Summit ka va chhim ve tak ngawt chu ka ngaihtuah zui a, duh aia rei ka men phah. Ka rilrua lian ta ber chu ‘Mizoram tan engnge a hlawkna?’ tih lai hi a ni a, chu chuan ka ngaihtuahna a tibuai em em a ni.
Thu ṭha tak tak leh ropui tak tak kan va ngaithla a, state pawn aṭanga mikhual lo kal zinga thusawitute pawhin Mizoram min fak rawn liam liam ni berin ka hria. Mahse, a nihna takah chuan zep thu a awm lo, investor te hip lut tak tak turin Mizoram a la inpeih lohzia kha kan va hre thar leh a ni ta ber a, chu lah chu mi tinin kan hriat sa vek a ni bawk si. Kha Summit a lo kalte pawh kha an insawi ang khan kan state-ah hian rawn lut tak tak ta se rei an rawn awm peih ngut ang em tih hi ngaihtuah tham a tling. A chhan chu hetiang dinhmunah hi chuan an tan leh kan tan pawh hlawkna tham hna a thawh dun a harsa ngawt ang. An sawi ang kha ti tak tak turin kan state hi kan inpeih em? A dawh-thleng buatsaih hmasa si lovin a zikah kan thuai vel mai mai a ni lo maw tihte chu keimah leh keimah ka inzawt vel a.
Company liante lo hip lut ta pawh ni ila kan power supply te hian an khawlte chu a chawm zo ang em? Bungraw hrang hrang phurh kualna turin kan kawngin a zir tawk em? Internet service a ṭha tawk em? Hlawk khawpa hna an thawhna turin an himna (security) a pawimawh a, chutiang kawngah chuan investor te hamṭhatna turin dan (acts/ rules) ṭha kan nei reng em? Company lianin min rawn lem zawh mai lohna turin a chhunga chengte humhimna dan ṭha leh him kan nei em? Investor lian chuan an mamawh chu ram ruak ṭha, zau thawkhat tak a ni a, duhthusam tak a nih a ṭul. Kan state sorkarin ram ruak ringawt ni lo, ram ṭha leh duhthusam a pe thei ang em? Hnianghnarin tui leh eng a pe thei ang em? Kawng ṭha kan thlunzawm sak thei ang em?
Mizoram Investors Summit a cheng vaibelchhe 2100 hu MoU ziah anga tarlan kha mipui hian ngun takin i thlir zui ang u. Summit huaihawtna ringawtah pawh khan pawisa tam tak a kal ral tih a chiang a, MoU ziah aṭanga cheng tlemte tal kan ramah a lo let loh chuan thil lo thlawn mai a ni palh ang e.
- C.V. Lalnunhlua Bawitlung