Hinduism vs Mizo Kristian politics thlirletna

Ni 28.5.’18 Vanglaini chanchinbuah Dr. Zonuntluanga'n 'Hinduism vrs Mizo Kristian Politics' tih thu a ziahah khan, Hinduism hi hlauh chi a ni em? tih leh politics leh religion hi chawhpawlh chi a ni em? tih min thlirpuiin, rawngbawltute pawh hian party-ah hamṭhatna an dawn vanga Pulpit aṭanga politics sawi anga ngaiin, "Political party hlawk nan kan pulpit zahawm tak leh Kristianna hi kan hmang ta fo mai" tiin a rawn auchhuahpui a.

Political party hlawk nana kan pulpit hi hman a lo ni ngai reng em ni tih hi kei chuan ka hre ve lo. Engpawhnise, Kohhran leh politics hi chawhpawlh loh tur, a hrang hlaka kal mai tur anga min thlirpuina hi chu a dik ber lo maithei. Zawlneite khan khawtlang sualna te, ram rorelna dik lo leh an Lalte ngei pawh sawiselin, an hnenah Pathian thu dik an tlangaupui a, an chunga Pathian phuba lo thleng tur an auchhuahpui ṭhin; chutiang bawkin Kohhran hian thlarau chhandamna mai ni lo, kristian society din hi a hna a ni tel.

Kum 1977-1979 ah Latin America-ah te, 1972-ah Philippines-ah te ram rorelna dik lo dovin, sakhaw hruaitute an tho va, an nunna hial hlanin pulpit aṭangin rorelna dik lo an tlangaupui tawh asin. Medieval Period-ah khan Roman Catholic Kohhran chuan, kohhran chu khawvel roreltu aia thunei zawk mah turah an ngai. Tun thlengin England ramah Arch Bishop of Canterbury chu, House of Lord-ah a la ṭhu vung mai. Arch Bishop R.A. Kennedy Runcie chuan, “Kohhran leh Politics hian Pathian ringtute nun a khawih tel avangin sorkar kalphungah kohhranin aw a neih vena chin a awm tur a ni” a ti. Keini pawhin kohhran leh politics hi lak hran i tum bik lo ang u.

Tin, Dr. Zonuntluanga chuan Hinduism ṭobul te min chhuipuiin, “Hinduism chu thiang zau,… a duhin Sonia Gandhi biain, a ṭhenin Isua an be bawk a... an sakhaw theh darh turin an pathian pawhin a zirtir lo,… Hindu hi a hlauhawm lo a, ṭhenawmte uite pawh a hlauhawm zawk daih ang,… Hinduism hi theh darh chi a ni lo... Pu HT Sangliana Mizo pachal Kristian pa ṭha thlangtlingtu chu BJP an ni. Hawh u, Hindu kan pun theih nan Pu HT Sangliana hi i thlang tling ang u, an tih ka ring hauh lo,... Kohhran miten Pu Modi kan beih hian Rahul-a a lo hlawk daih tih hi kan ngaituah ngai em?” te a ti ta deuh deuh.

Hinduism chu thiang zau a tih hi a dik khawp mai. Ni e, keini Mizo ngei pawh mahni hnam sakhuaa let duhte chu, Hindu-ah an pawmpui a, hmanruaah an hmang ta reng a nih hi. Free Education hmangin phaiah Mizo ṭhalai mai bakah, North East mi tam tak, Hindu School-ah an luhtir a nih hi. Heng an thil tih hi Hindu-a leh an tumna a ni lo kan tih lai hian, tun aṭanga kum sawmah chuan, Mizo ngei hian Hindu sakhaw ṭhatzia an la tlangaupui mahna le. Tun apangin Hinduism sawimawina kan auchhuapui ta chu a ni si a!

Tin, a duhin Sonia Gandhi biain, a ṭhenin Isua an be bawk a, a ti hi chu ka la hriat ngai loh thil a ni. Hindu ho hi thil a pawmzamtir mah mah ka ti. Mi ṭhenkhat liberal tak chu an awm ngei mai, mahse engatinge Hindu firfiakten, Isua biak avanga Kristian Biak Inte an suasam? Missionary te ngei pawh Isua Chanchin an hril avanga an sawisak a, jail-ahte an khung? Chu mai duh tawk lovin Graham Stain te pafa pawh a nung chungin an hal hlum a ni lo’m ni? Hindu-te hian Kristian huatna hi an nei lian lutuk tih ti chiangtu chu, Kristiante nghaisak leh Biak In suasam piah lamah, an thuneihna hmangin tunah hian, Kristian Mission hmalakna a ṭhuanawp theih nan, Hindu pawl ngeiina an din, BJP sorkar a pian aṭang hian foreign aṭanga Mission pawl hrang hrangin sum an hmuh ṭhin pawh tih tawpsakin, tunah hian Mission pawl tam tak chu hma la hleithei lovin an awm tawh asin. Hmanni lawk pawh khan Bangalore aṭangin UTC Pricipal leh Registrar chu, an College project atana foreign aṭanga an sum hmuh tur an dansak avangin Aizawl kohhran leh mimal ngamtlakah kut an rawn dawh hial a nih kha.

Hindu hi thehdarh chi a ni lo a tih pawh hi thu belhchian dawl lo a ni. Theh darh mai ni lovin, Gujarat-ah te, UP-ah te Muslim mi hnuaihnung, sum hmanga thlemin ni khatah mi za chuangte Hindu-ah an la lut asin; tunah hian mi sang tel zet Hindu-a lak luh an nei tawh. BJP chuan India ram hi Hindu rama siam tumin ṭan an la a. Kum 1998 khan Prime Minister AB Vajpayee-in Nagaland Governor BP Acharya hnena a lehkhathawn leak out-ah kha, "Sangh Parivar member-ten Polo Bazar, Shillong-ah an milemte dahin, ramte an nei a,... hlawhtling takin an tum ber Lal Krista thinlunga an thir zum (trishul)-a vih chu an han hlenchhuak a ni" tih a ziak asin! Chu bakah Kristianna bawlhhlawhna (unholy Christianity) chu nuai bo a nih theihna turin, Kristian tamna state- Nagaland, Manipur leh Mizoram beih dan tur leh Assam, Arunachal leh Tripura-a Kristian awm chhunte beih dan tur ruahmanna siam a ṭul thu a ziak a. He lehkha hi Mid Day chanchinbu chuan a chhuah chuai chuai a nih kha. India ram sakhaw tih bik nei lo ram a nihna pawh tih danglam an chak hle tawh a nih hi.

Tin, Hindu kan pun theih nan Pu HT Sangliana hi i thlang tling ang u, an tih ka ring hauh lo a tih pawh hi, Pu HT Sangliana pawh Kristian ni chungin BJP a zawm thei, tia sawimawi a tumna lam zawk niin a lang. Ni e, Hindu pun nan chuan an thlang lo ngei mai, mahse ka sawi duh tak zawk chu, Pu HT Sangliana khan huaisen takin BJP thil tum dodal zawnga parliament-ah vote a thlak avangin, party aṭangin an hnawt chhuak hmiah mai a nih kha. Mi ṭhenkhatin, BJP-a luh sawimawi nan, party chhungah lut ila, siam ṭhat hna kan thawk thei ang kan lo ti a. Party thil tum dodal zawngin Pu HT Sangliana ang khan Mizo Kristiante hi kan ṭang ngam leh ngut ang em?

Tin, Kohhran miten Pu Modi kan beih hian Rahul-a a lo hlawk daih tih hi kan ngaituah ngai em? a ti hi, eng rilru pua sawi nge a nih? Kohhran hian, in hlauh em em BJP in beih hian, Zu zuar sorkar, in nin em em Congress hian a lo hlawkpui daih asin, tih sawi a tumna ni tak maw? Engpawhnise, Kohhran hminga pulpit aṭanga Pu Modi beih hi a lo awm tawh reng em ni? Party hlawkpui nan kan pulpit zahawmna kan hmang sual angin Kohhran a puh ta der mai si a. Kohhran chu eng party angin nge maw a hmuh le? Kohhran chuan rinna humhim hi a tum ber zawk a ni.

India ram hi sakhaw zalenna ram, kan Lal Isuan min zirtir anga khawvel zawng zawnga Chanchin Ṭha theh darh a nih theih nana hma lak theih hi Kohhran duh dan ber chu a ni. Chumi kawng dal mektu leh dal zel tumtu chu Kohhran hian a welcome thei ngai lo vang. India ram ngei pawh hi Kristian ram ni thei se tih hi Kohhran duh dan a ni e.

Dr. Zonuntluanga hi eng mi nge a nih ka hre lo, ani ang mi thiamin hetiang thu a phuh chhuak duh ta mai hi, BJP sangawi zawnpui a nih duh hmel mang e. Chutiang mi pawh lo nise, a thu ziak hi a ti lutuk mah mah ka la ti fo. Mizo Kristiante zingah BJP Party hi sawi mawi pawh lo ni se, party thil a nih miau avangin ka la hrethiam, party pawh ni lo, Hinduism sawi mawi a ni ve ta zel mai hi, ngaihtuah a va ti thui ta em. Zaram harh rawh, Hindu-na in a chim mek che.

- Lalrinliana Colney