A HAUTAK ZAWNG ZELIN MAW....

Pu F. Lalremsiama IPS, Ex MLA khan, MLA a nihna tura a campaign senso kha, cheng nuai khat pawh a tling lo angin a sawi a. Aizawl khawpui a nih vang nge mahse khawpuiah pawh mi rethei tak tak an tam tehlul nen!

Hmanah kan chhungte, thingtlang lama MLA in candidate chu amah ngei campaign-a a chhuah hmain, Block hruaitute hnenah campaign buatsaih nan cheng nuai sawm a pe chhuak a. Amah ngei campaign-a a chhuah ve meuh chuan, ka pu, pawisa tiin an lo dil belh leh nghal a ni awm e. A tling lo zui lehnghal.

Campaign lai chu pawisa indil hun: Election hautak zet mai hi tu mawh nge, mipui lam nge candidate te zawk? A chhanna chu 50-50 niin alang.

Candidate in vote hmuh nan mi tih lungawi tumin, puih tur a zawng ruai a, pawisa hmangin mi tih lungawi a awl ber a, semna tur a zawng ruai ve bawk a ni. Dam lo kanna pawisa te hi an phawrh hraw thei viau zel a, mi rethei khawngaih ngawih ngawihna a lo lian a, sem tam chu tlinna ni berin an ngai a ni awm e. Hmanah Youtube lamah candidate pakhat chuan, ka pawisa pawh ni lo, party pawisa, nuai sawmthum ka sem ral a tih ka lo hmu ve a. A nuihpui huau huau mai, a tling lo chiang khawp lehngal.

Mipui lam hian sum min pe ula kan vote ang che u kan ti vek lem lo na a, sum sem chak an awm tih kan hriat khan kan lo inti hlu vel ṭhin. Mipui kutdawhna kut ke ber chu, Party Unit hruaitute hi an ni. Candidate te hnenah puih tur an report taima ṭhin khawp mai a, an meng zek zek a, mi an pui an pui mai a ni. Mipui mi mir hi chuan direct takin tu hnenah mah pawisa kan dil ngawt ngai lo. Puih ngai kan nih hriaten, puihna min pek duh tlat chuan, kan hnar phal lo mai zawk a ni. Direct taka pawisa dil hi chu, zurui hawklak tlemte an ni. Puih ngai min titute chu Unit hruaitute an ni deuh zel.

Party Unit din hi min ti hautaktu a nih hriain Kohhran social front lam pawhin a ṭhat lohzia an campaign nasa tawh. Chu chu hriain party thar lo ding ZPM chuan, Unit din lova kal an han tum a, mahse a lo harsa hle tawh a ni awm e. Unit chu an din leh chur chur ta mai.

Campaign lai chu candidate te inphal hun: Tun ṭum Tuirial By-Election chu candidate ho pawh an inphal viau a ni ang, an tih theih tawk ṭheuhah hma an la nghal a ni awm e. An hma lak dan chu hetiang hian social media lamah kan hmu. Candidate te an tlin loha an hma lak dan tur, Zmp Tlau-in a sawi dan chuan.

MNF Kawnpui hmunah Petrol Pump a siam zawm ang. Ambulance a dah a la let dawn lo bawk. A bak chu MNF candidate a tlin chuan, tih deuh vek a ni.

Congress: Seṭhawn-ah ṭhalaite infiamna tur chhun leh zana hman theih turin a siam ang. A remchan dan a hmasawnna hnathawh zawm a tum a, bial vil zui zel a tum. A bak a hmalakna lian tham chu a tlin chuan tih a ni.

ZPM Kut hnathawkte feh kawng tur Link Road laih chhunzawm a tum. Bial vil zui a tum thu a sawi chiah lo na a, hmalak zui a tum thu a sawi. A bak liantham chu a tlin chuan, a ni.

Vanglaini chanchin bu-ah khan, candidate te chet velna a nasat em avangin, hetiang a nih chuan, mi hausa chauh lo chu, in candidate a ngamawm dawn lo asin ti zawnga thu ziah kan hmu nghal. Kan che hautak bawk a ni.

Tlin hnuah pawh a la hautak: Hmanah kan chhungte MLA a tling, dinhmun pawimawh tak chang ve phak kha, an inah kan leng ve zauh zauh a. Kan kal apiang hian chaw ei khawm dur dur tawk hi an awm reng mai a, chung mite chu an bial mi, Aizawl lo kal te an ni.

Pu Zosiama Pachuau te kha, an in kan kalpel ve fo a, engtiklai mai pawh hian an kawtah mi hi a ṭhu huang reng mai a, interview hun loah pawh an bial laih laih reng mai. Anni pawh kha an chaw bel a lian deuh reng mai a ni awm e.

Luai luai mai a!: Hetianga kan roreltute kan bawh buai luai luai reng chuan, an hlawh ringawt chuan a daih bik lo tawp ang. Campaign lai aṭang tawhin, an in hmang da tawh bawk si a. Mi ta puk te, hausa deuh ṭanpuina te, a let leh beisei rana pawisa lo thawhtu aṭang te khan, an rawn tling chhuak ve a. A hnu zelah pawh, bial mipuiten kan la bawh buai zel bawk si a.

Kan politics khelh dan hi a hautak zawnga kan kal zel chuan, ram ropui hi kan thleng tak tak thei lo ang. Mi ṭha tak pawh ni se, an insen nasat em avangin a rulh lehna kawng dapin, dik lo deuh pawh nise, sum lak luhna an melh ve ruai ṭhin a nih ber hi.

Kan zavaiin ram hi hmangaih tlang ila chu, hautak lutuk lovin roreltute hi, lal ṭhutthleng kan ṭhuttir thei tho vang mawle. Ram hmasawnna pawh a kal chak deuh ngei ang.

- Lalrinliana Colney