TUIRIAL BIALAH KAN RAM CHHANCHHUAKTU TUR VOTER IN AWM KA RING

Tuirial A/C Bye-Election atana cam­paign thâwm chu a ngaihnawm a, a ngaihnawm lo bawk. Party ruihchilhna boruak aṭanga thlir chuan a nuam miah miah ngawt ang. Mahse, Mizoram leh hnam hmangaihtu tak takte erawh awm hmunah an rûm tlawk tlawk ta!

Tuirial Bial chu a hming lemah 'Bazar bial' tih hial khawpin sum a leng nasa tih a chiang a. Thil ṭha duhtu MPF te an lainatawm mang e!

Tuirial Bialah poli­tics khelh dan tenawm ber chi kan hmu leh mêk. Chutihrualin Tuirial bial mipuite in entawntlâk leh tlâk loh te, ram in hmangaih tak tak leh tak tak loh chu in vote hmangin lantirin a awm dawn ta a. He ram hi siam ṭhat in duhzia hmuh kan beisei a, ram pum tana zui tlâk sulhnu ṭha tak min hnutchhiah ngei ang che u.

Sum hmanga inleitling MLA in neih chuan campaign laia a sum sênsô rulh chu a tum nasa dawn tih in hriat phâk vek kha. In biala hmasawnna lo kal tur tam tak chuan in hnen a thleng zo lo a nih pawhin in MLA chuan campaign laia a sum sên ral a chhût ang a, thiam a inchantir tawh tho ang. Hetiang mi, sum hmanga inleitlin ching politician te avanga kan ram hi khawvâr hmel hmu thei lo kan nihzia chu in man vek kha.

Kan ram hian chhan­chhuah a ma­mawhzia chu tuman kan hai lo. Tuirial bialah hian Mizoram chhanchhuaktu tur voter huaisen leh duhawm tak tak in tam ka ring! Chutiang voter-te chuan sum hmachhuana campaign ching te, ram politics aia party politics chauh la aupuitute chu an be chhe kher lo, sum zuar a nih phei chuan eiral sak tlâk a nihzia an hmu a, bum tumtu a nihzia hriain bum lêt ve sak a phu tih an hmu bawk a. Chutiang mite kutah chuan ram hruai hna an nghat phal tawh ngai lo.

Party hmangaihna leh party-a ruh tlatna hian kan ram a tichhe nasa tawh a, party aia ram hmangaih zâwk tawh turin ka phâk ang tâwkin ka rawn au ve a che u.

Tuirial bial mi­puite u, kan ram chhiatpui politics khelh dan ṭhing leh tenawm lutuk ata hi chhanchhuah kan nih theih nan entawn leh zui tur hniak duhawm min rawn hnutchhiah ngei teh u.

Politics tenawm lak ata kan ram chhanchhuaktu tur voter huaisen, kan ramin a mamawh loh mi tenawmte hnâwl ngamtu tur tam tak in awm kan ring tlat. Chutiang mite vote chu chhiar châkin kan lo thlir reng dawn che u nia.

- Mama Pa