Pu Hawla tihsualah an puh maw?

Mizorama rorel rei tawh ber Congress chuan tunlai hian au hla thar neiin Mizo­ramah Congress thar din an tum a. Chutah chuan Pu Lal Thanhawla hova kum 2023 inthlan hi chuh tawh lovin Pu Lalsawta hova chuh an tum a ni. Chutah chuan 'Ṭhat loh theih lohna bawm' an siam dâwn a, ṭha lo thei lovin an in khalh dâwn a, chu mi hmang chuan Tuirial By Election leh 2023 MLA election hi hmachhawn an tum a ni.

Insiam ṭhat duhna rilru neih hi thil lawmawm a ni. Congress-in insiam ṭhat an tum hrim hrim hi Mizoram tan thil lawmawm tak a ni. A lawmawm chhan chu Congress hi party mala member nei tam ber an nih hmel sia in siam ṭha thei tak tak se a ṭha ang.

Congress hi Restricted Tender pawh hmang uar em em, Vai supplier leh contractor pawh vulh thauva hausa taka siamtu, kan Mizorama project tam zawka kutthlaktu an ni. Hman deuh khan lo in siam ṭha se chu a lawmawm lehzual tur. Kha chen kha kan ram an enkawl a, an kal dan leh an party worker an hausak chak dan hi kan hmuh hmaih hauh lova, an lo insiam ṭhat theih mial chuan a lawmawm dâwn a ni.

Insiam ṭhat tuma an au hla hi chu Pu Lal Thanhawla hnawlna leh a chhia zawng zawng puhna a ni ta erawh hi chu Pu Hawla hi a lainatawm a ni. Thil hi ngun takin han thlir ila, "2023 ah chuan Pu Hawla a awm tawh dâwn lova, a tel lova kan awm chuan kan ṭha tawh dâwn a, ṭhat loh theih lohna bawm kan siam ang a, chu Congress chu Congress thar a ni tawh ang," tiin Pu Hawla an President leh an hotu lian chu an hnawl tihna a ni ta ber mai.

He au hla hi chu tu Party President mahin a dam lâi ngeia a telna party au hla atan kan duh lovang. Pu Hawla zara Minister ni ve thei, ama zara MLA ni ve thei, amah vanga ruling party member ni ve ṭek ṭek khan Pu Hawla tel lohnâ chu ṭha ta duak tur angin an han au pui a. Pu Hawla chu a dam laiin an phatsan a, vote an hmuh phah theih beiseina a nih chuan a hmaa an tlawn rawn Pu Hawla chu a chhia zawng zawng phurh tir an tum a ang hle a ni.

Congress hi MNF aia rorel rei tawh an ni a, MNF ai chuan an la zia hret zawk a, mahse tuna an au dan hi chu an Party chhung boruak chhia rawn alh chhuak ni berin a lang. Party chhung boruak sawi takah chuan Hnam Runa ṭhang khat lian General Secretary ngat ni tawh te aia Chief Minister-in party lama mi thar pawisa sawi chhuak thei deuh a dah pawimawh avanga vui thawm hi a ring tulh tulh mai a. Vice President aṭanga an bân hnu pawha Party chhuahsan duh lo Minister lah chu mualpho tir duhtu an pung zel a, he politics zet hi chu hmelma nena inneihna ai hian a chhunga inbeihnâ hi rilru paukhauh a ngai zawk ang a. Dawhtheih pawh a ngai zawk ngei ang, hei hi survive theih chuan party dang lama survive chu a harsa tawh lo zawk hmel a ni.

Tichuan, MNF lamah kan han peng kual ta duah a, Congress lam zawk hian an au hla hi uluk zawkin ngaihtuah se, in siam ṭhat an tum pawhin Pu Hawla hnawlnâ ṭawngkam an hman tam poh leh Congress Chhungkaw Buaina a zual thei tih an in ven a ngai a ni.

Mihring ngai reng ni si, campaign dan strategy zawng zawng pawh a ngai la hmang siin Tuirial Bialah Congress Thar an zuar ṭan a. Pu Hawla tana ngaihthlak hrehawm tur thu a ri tam ta hle a ni.

- Lalhlimpuia