TUIRIAL BIAL MIPUITE PAWIMAWHNA
Mizo upa in Kawi pawh a kawm a ṭhat chuan a rah a ṭha, an lo tih hi Tuirial bial result tur pawh a nih a rinawm. Thei leh thlai tinreng hi a kung a ṭhat loh chuan, a rah a ṭha thei lo, a kung ṭha zawng zawng erawhin rah ṭha an chhuah vek chuang lo.
1. A chunga tehkhin thu khi, political election-ah hian a ngialngan chuan a dik vek lo ang, a tlangpui thu chuan a dik a rinawm. Party lian chuan member bakah bawrtu dang a ngah a, chu chuan vote tam tak a pawt.
2. By election neih hmasak berna (Azl West 1) kha ZPM bial a ni chungin, MNF party chu hneh takin an tling. Hei hian MNF sawrkar chu Zoram mipuiten ṭha an ti a, an duh ber tih a entir.
3. Kum 2008 aṭanga INC a sawrkar chhan kha sawrkar tûk aṭanga NLUP sem nghal leh kum nga chhunga sem zawh vek an tum thu an sawi, mipuiin kan awih vang a ni. An thutiam ang ni lovin, kum hnih hnuah ruahmanna an siam chauh a, renchem takin an pet lawr a, kum thum chhung khan hmabak tam tak la neiin, a dawng hmasa zingah final installment beisei mi tam tak an la awm bawk avangin, term hnih an sawrkar phah. Tunah hian, sawrkar chuan, nakum aṭanga SEDP an sem tur thu an sawi chhuak ta. MNF hian Congress sawrkar sulhnu hi veikhawr ang reng takin an copy zel a ni ber mai. Congress NLUP chhunzawm hreh siin, MIP an duang a, an mualphopui hle. Tunah hian SEDP hmathehin sawrkarna an chang mek a, eng tak ang zel ang maw!
4. A kum khaw thua kan lo hriat ṭhin ang lo taka Tuirial bial by election (sawrkar ti danglam thei pawh hlei lo) ram pum huapa kan buaipui luih luih mai hi chu a zia lo hle.
State sawrkar pachhe tak, state Treasury a ruah mai hlauh vanga contractor/ suppliers leh sawrkar hnathawkho (pension) pawisa vaibelchhe 800 zet hreng khawtlaitu, Health Care (MR bill) vaibelchhe 43 zet pe thei lo mek, Sawrkar hnathawkte pay arear kum hnih zet hreng khawtlai chunga GPF puk/ withdraw theih loh nana an statement pawh tichhuak thei lo leh sawrkar hnathawk hlawh kum khat chuang a hun taka pe thei tawh lo, RBI pawhin sum puk tura a rin zawh tawh loh (nia sawi) sawrkar hnuaiah hian, mipui hian engnge kan la beisei cheu? Tuirial biala Party dang hruaitu MNF zawmtute hian engnge an ngaituah ber ang!
MNF sawrkar tirha by election-a MNF tlin chhan kha sawrkarah rinna kan nghah vang a ni. Kum hnih hnua Serchhip by election a MNF tlin loh chhan erawh chu sawrkar thiltihdan pawmpui lohna leh Pu Lalduhoma/ZPM lainatna vang ni thung ta se. Tuna Tuirial bial by election erawh hi chu, 2023 a sawrkar tura kan duh ber ni thung tawhin a rinawm.
MNF kan thlan tlin chuan, intiamkamna thawheng leh ṭawngkama ram rawngbawl kan duhtawk tihna a ni ang. INC kan thlan tlin thung chuan, Pu Hawla aiin Pu Lalsawta hova, ṭhat loh theihlohna huang hmanga ram siamṭhat kan duh tihna a ni thei ang. ZPM kan thlang tling a nih erawh chuan, Sawrkarna siam tawhtuteah rinna nghat lovin, mi thar / kalphung thar kan duh ta tihna a ni ngei ang.
Politics hi ram siamṭhatna kawng hnai leh awlsam ber a ni a, rilru fim taka vote thlak a pawimawh hle a ni.
- Vanlalhuma Kawlni
Ramhlun South