Anthurium Festival Thunawi

Virtual Anthurium Festival hmangin Online Tourist kan zawng nge mamawh phur lut tur pawh dan beh an nih laiin kan lo huau huau a (online huau huau). 

Sawrkar hnathawk hlawh pek tur kan neih mumal loh laiin LADC inthlan dawn vang nge nuai 12000 chuang project kan hawng rup a. KISCE (Khelo India State Centre of Excellence) atan Rajiv Gandhi Stadium chu thlan niin state dang aia tam deuh nuai 1152 lawih min pe a, chu pawh kum 4 atan. Tam tih tawh naka laiin State Centre of Excellence aia let sawma changkang kan din dawn nge a let sawm aia tam sum hi tunge min pe ta ang? A khawnpui ami a ni leh mai ang chu. 

Kan Sports Minister hian budget pawna mi a ti fo a, nikum Sports Dept-in sum a dil belh (Supplimentary Demand) kha nuai 1796 lai niin an sawi chhuak leh thei lo nge central aṭanga lo kal chu nuai 144 chauh a ni a. A dang zawng khi state sum, kan leibat tam phahna a ni ta a ni. 

Hrileng vangin kan buai em em a. Mipuiin nuai sanghnih chuang an thawhkhawm hmangin khawl te, a mamawh dang hmanrua leh test kit te kan lei chungin mipuiin test man kan chawi a. Dan bawhchhiate hremna tlingkhawm pawh nuai 95 zet a ni tawh. 

NEC-in hrileng dona tur nuai 300 min pe a, a hmanna turah inchuh a awm deuh nge ni kan buai phah hat a nih kha. Health Dept chu Surprise Audit kan neih phah rum rum ni te in kan lo hria a. Hei mai hi a lo ni lo, Ministry of DoNER aṭangin NESIDs hnuaiah Covid vanga kan health infrastructure hmasawnna tur May thla khan nuai 1616 lai an rawn sanction leh a. Sum pawh nuai 647 zet an rawn release tawh nghe nghe a ni. Kan hospital bed te, kan ICU, Ventilator leh hospital ten an changkan phah em chu ka la hre lo. 

Anthurium Festival chu a hranpa a sum kan dawn a nih vanga hman loh theih loh nite in sawi a awm a. Kumin Budget kan en chuan Promotion of Fairs & Festivals ah cheng nuai 100 dah a ni a, State tum tura dah a ni. Hei bakah hian central hian kum tin festival a hman tur hi state tin hnenah nuai 50 aia tam lo a pek ṭhin thu Tourism Dept Minister-in May thlaa E-Book a chhuahah a inziak. Chutih laiin kan beisei lo nge Grants for Organizing Festivals/ NEA-ah chuan central sum kan beisei chu tarlan a ni lo thung. Emergency-in kan dawng thut turah ngai ta mai ila! 

Sum hi a nihna tura hman thlap a pawimawh. Jal Shakti Minister, Sekhawat a chu kan CM-in a sawi lar hle a nih kha. Jal Jeevan Mission hnuaiah Mizoram thingthlang khaw 655 te chu kum 2024 ah in tinin tui mahni ina an herh haw theihna tur program niin kum 2019-20 khan in 23000 (sing hnih sang thum) chuang connection pekna tur Vbc 39 zet min pe a. Mizoram sawrkar hian In 15000 (sing khat sang nga) chuang zet connection hi pe hmanin kan tih ṭhat em avangin Performance Grant vbc 30 lai min pe leh a ni. 

Kuminah in 31000 zet target nei lehin central hian vbc 79 min pe leh a ni. Hetih mek lai hian sum min pek belh pawh kan la hmang zo thei lo va, November ni 1 khan Union Minster hian hmang thuai thuai turin min rawn tur nghe nghe a nih kha. 

Kuminah hian State matching share nen vbc 122 lai mai keini thingtlanga chengte pawhin tui kan herh haw ve theihna turin sum a awm a. A hmanna turah erawh kan hmang thei lo niin a lang. 

Ngaiteh, kan budget kan tih ve aṭang a za zela 90 zet mai central-in min la rawn tum sak a. Thawh chhuah nei lo ber mi pakhat zelah kum tin nuai khat dawn min la pek reng lai hian a thawk chhuaktu state te chuan an thawh chhuah aṭanga an hmuh let chu mi pakhatah cheng 3000 vel chauh a ni asin. Chawm hlawm a huaisen theih loh a, sawi chhuah hi intih theihna chi a ni lo. 

Article 370 ti bo a J&K ṭhenhrang ngam hian keini state inhungbingna te hi an la hmu tai dawn chauh. Ṭhalaite u, harh a hun tak zet a ni!