TUTE NGE NI ANG AW!
Vanglaini October ni 23, 2021 (Inrinni) a chhuak phek hmasaah khan “Congress khan an zu zawrh sawi mawi turin Pastor ṭhenkhat an hmang,” tih kan hmu a, tute nge an hman leh eng kohhran Pastor nge an nih hriat a chakawm hle mai!
Zu zawrh chung changah hian 1987-86 vela boruak leh tun Congress hun hnuhnunga zu zawrh thuah hian Presbyterian Kohhran hi a rel/ sawi nasa leh inkhawmpui lianah leh Executive Committee-ah pawh vawi tam zawrh duh loh thu passed ṭhin kan ni hial awm e.
Kan Pastor-ten kohhran duh loh danin ṭan an lo la ve a nih chuan a pawi hle dawn a, hria ila zilh hial tur ni awm tak a ni.
Mimal ngaih dan sawi mai ni lova, zu zawrh sawi mawi tura party-in a hman em turah chuan rin phak a har khawp mai. Chiang taka sawi tur awm si lova khualthuthang emaw titi phungleng emaw aṭanga hriat mai mai emaw a nih chuan hetianga kohhran duh dan kalh zawnga che anga kan sakhaw hruaitute, kan Puithiam ve chhangte sawi mualpho hi kan phal lo khawp a nia.
Kohhrana hruaitute leh rawngbawltu hrang hrangte pawh hi kan rawngbawlna huang zau takah hian, rul anga fing, Ṭhuro anga nunnemin fimkhur taka kan kal pawh a ṭul awm e.
- Thangkima Ralte
Vaivakawn, Aizawl