Scholarship dil a hun leh ta

India rama awm ve, hnam tenau (minority) kan nih avangin Mizo zirlaite tan sorkar laipui chuan scholarship dil theihna remchang min siam sak a. Online a dil mai theih te a ni a, a awlsam thei ang berin a diltu school naupang bank account ah an rawn thun mai ṭhin. 

Scholarship hi mi nazawng dil theih a ni lo, Mizo Tribal, hnam tenau ka ni tih vang ngawta dil theih a ni lo. A dil thei chin chu - kum khat chhunga chhungkaw sum lak luh cheng nuai khat aia tam loten an dil thei. Cheng nuai khat aia tam lalut thei chin tan scholarship hi dil ve loh tur a ni. 

Scholarship hi a dil thei awm chinte chauhin dil tur a ni a, a dil thei awm nih hi sum lalut tlem tihna a ni. Chuvangin, a dil ve thei lo, kum khat sum lakluh cheng nuai khat aia tam chinte chuan dil ve loh tur a ni. Hetianga mi harsa zawkte scholarship tur mi neinung zawkten an lo dil ve zel hian dawt hmang sum lakluhna pawisa lo a, hlemhle taka sum lak luh an hreh lo tihna a ni. 

Scholarship hi a dil thei awm chinte chauhin dil tur a ni. 

Mahnia ti thiam lo tan common service centre ah dil dan kimchang zawh mai theih a ni a, a ti thiam lo chuan tihtir nghal theih a ni.

Scholarship dil theih hi ngaihven peih tan chuan a awm nual mai -  tribal scholarship leh merit scholarship te pawh dîl theih a ni a, mahse a dil thei chin chauhin hengte hi dil tur a ni. 

Kristian ram kan ni kan ti reng chunga BPL ni lo tur BLP a awm tlat duh ang chi te hi Pathian duh loh zawng a ni. Income dik lo ziak a thil dil hi sim ila, a dil thei chin, sum la lut tlemte chauhin dil tur a ni. 

Scholarship dil thei loten kan lo dil ve hian a dil thei leh hmuh phu ngawih ngawih khawpa zirlai harsaten an dawn loh phah fo thei tih hria ila. Keini aia mi harsa zawkte tan kian ngam bawk ila a duhawm khawp mai. 

Thil chi hrang hrangah hamṭhatna tur quota te pawh kan nei ve ṭhin. Hengah te hian mahni ta lo tura lo chuh ve chiam ṭhin hi corruption a nih avangin Pathian nung biate chuan tih ve loh tawp tur a ni.