Zan curfew tih tawp ni thei se

Tunlai hian Covid-19 dona atan kan Aizawl khaw­puiah ngei mai kan sorkar chak tak chuan zan tin zan curfew chu dar 8 aṭangin a puang chhun­zawm mup mup a, hei hi veng danga ngaih­zawng nei tan chuan thil pawi tak a ni.

Ka thu ziak hi fiamthu anga chhiar tan chuan a nuihzatthlak ang a, mahse kum hnih dawn zan lama nula rim thei lo tlang­val tam tak tana ka ziah a ni zawk mah, a behbawm dang tam tak a ken tel avangin zan curfew hlih rawtna ṭawngkam pakhatah min lo ngaihsak zawk dawn a nia.

Zan curfew hi human rights bawh­chhiatna chi khat ni thei maiin a lang. Tunah hian pande­mic kan tih chu chhun lamah kan hlau tawh lova, bazar pawh a ngai ang angin a function tawh. Taxi leh bus pawh an service tawh a, chawhmeh pawh an zuar tawh a, hei bakah hian an duh tawkin an inkhel thei tawh a, lui an kal thei tawh bawk a ni.

An picnic thei tawh a, chaw ei khawm pawh dar 8 hmaa an haw hman chuan phal a ni a, mahse zan dar 8 ah curfew an la tih chhung chu tlangval Aizawl kawngpui lun lai pal tlang ngaia zanah chiah nula rim na hun nei tan chuan dan anchhe dawng ta hial mai.

Zan curfew hian zan lama eizawng tam tak a tih buai dan hi kan hotute hian an chhut lova ni. Tute nge zan lama eizawng chu? tiin kan zawt a ni thei a, mi tlemte eizawnna ang lekah kan lo ngai a nih pawhin chu mi tlemte zingah chuan lo tel ve ta ila, kan eizawnna function ṭha thei lova kum khat leh a chanve aia rei min hrengtu dan hian kan human rights a kalh tlat tawh lo maw? tih hi mimawl tak zawhna satliah angin ka han zawt ve duh a ni.

Chhunah invenna pakhatmah kal pui a ni tawh lova, kan zan curfew ve dan lah chu Bawngkawn to Kulikawn inkara motor tlan tur chiah kan dang bawk si. Chawnpui mawng leh Bethlehem Veng, Ramthar Veng leh Edenthar lamah te chuan zanah dawr inhawng hiau huai pawh ni se vengtu an awm chuang lova, zan curfew dar 8 hnua chhuah theih loh dan an hman dan hi chuan min ti buai takzet tawh a ni.

Zan curfew kan tih hi a hlih theih tawh lo maw?

- Marinawma