BAWLHHLAWH PAIH DAN BAWK HI

AMC inthlan dawn khan, Party tinin bawlhhlawh paih dan mumal taka kalpui an tum thu an aupui vek a. Tu party pawh chak se, mipui hah loh zawkna tur, ruahmanna thar an rawn siam ang chu tia kan lo thlir laiin, engmah thil thar a la awm lem lo.

MI RAMAH CHUAN

India ram khawpui hmun hrang hrangah kan lo khawsa ve tawh. Bawlhhlawh paih dan hi a inang vek lo, ṭhenkhatah chuan motor-in a hnuh sawn theih chi hi kawng sirah an dah a, a khah hunah an hnuk sawn mai ṭhin. Hmun ṭhenkhatah chuan a phurtu lo kal hun huna an rawn lak turin, kawng sirah mipuiin an lo dahkhawmna tur hmun an siam a, a khah hunah motor-in an rawn phur mai. Bawlhhlawh paihnaah hian mipui tan harsatna an siam ve ngai lo.

AIZAWL-AH CHUAN

Bawlhhlawh chi hrang hrang paih ni siam a ni a. Eng tikah nge motor a lo kal dawn a hriat loh, thinrîk an rawn thin hun hun a ni tawp mai. Thinrik hre chiang phak lova awm tan chuan, "Bawlhhlawh motor a lo kal e..." tih pahin, hmanhmawh takin bawlhhlawh khai chungin an tlan dawr dawr a, motor tlan liam va hmu hman hramte an awm ṭhin.

Mi ṭhenkhat bawlhhlawh motor lo kal nia lo châng ve hman lo an awm bawk a, an chân hman loh chuan lo dah lawkna tur kawng dang a awm ve lo. Kawng sirah lo dah ve ringawt se, ṭhenawm khawveng lakah a inthlahrunawm tlat, a chhan pawh thil dang a ni lo. Motor lo kal hunah khan, bawlhhlawh load-tu indaih an lo kal ngai loh avangin, bawlhhlawh neitu apiangin mahni bawlhhlawh pe chhovin, a chung sang aṭanga lo la tur pakhat chiah an awm ṭhin si a, mahni bawlhhlawh mi dang load tura lo dah lawk kha, a i thlahrunawm ṭhin si a ni.

Nimin mai pawh khan, kan bawlhhlawh paihin ka inkhai cho ve pur pur a, hemi ṭum phei chuan Driver chiah a lo kal a, "Ti nge nangmah chauh i lo kal a," tia ka zawh chuan, "An hman lo leh ṭhin a lawm maw le," a ti ringawt mai. Kan in namnul mah mah ṭhin chu a ni.

ENG NGA TI NGE PAWISA
KAN CHAWI A NGAIH

Delhi AAP sorkarin Tui bill litre 20000 hnuai lam an free a, Electric bill rate an hman lai zatvea an tihhniam bakah, unit 200 aia tlem hmangte tan bill an free thei a. Bawlhhlawh paihna phei chu man chawi tur niah mipuiin an ngai reng reng lo.

Keini chuan kum khat atan Rs. 600/- kan chawi a ngai tlat mai a. Ka hriat sual loh chuan AMC motor indaih loh vanga motor dang hman man niin an sawi a, mahse AMC motor hlir a lo kal bawk si. A enga pawh chu ni se, heti em ema sorkar sum indaih lo mai hi a mak a ni. An indaih lo viau emaw kan tih laiin, ṭhenkhatah chuan dim lo baksakin sum an hmang leh bawk si. Kum khat atana Rs. 600/- pek chu harsa tak a ni lem lo, mahse sorkar chu mipui phurrit chhawk tura din a ni a, mi ramah bawlhhlawh paihna sum thawhkhawm a awm ve loh laiin, Aizawl mipui chuan kan la chawi reng mai si a. Kan pawisa hman chhuah ṭhin dante mipuiin kan hre ve zel tho si a, rorelna fel lo deuh hi chu a awm niin a lang.

RAWTNA:

1. Bawlhhlawh paihtu hi, mipui tan a zangkhai theih nan, Driver bakah a hnuai aṭanga pe chho tur leh a chung lam aṭanga lo la chhawng tur mi 2 tal chhawr ṭhin ni se. Hetiang em em hi chu sorkar tan a harsa lo tur a ni. Chutiang a nih chuan, mi ṭhenkhat bawlhhlawh paih motor lo kal nia hna dang nei tan pawh, lo dah lawk a inthlahrunawm tawh lo ang.

2. Bawlhlawh motor lo kal hun hi, stand tinah darkar khat tal mipui lo inrin lawk nan, hun ruat thlap ni se, thinrik hre ve phak lo tan pawh hun ruat chhungah a lo chân theih ang.

MIPUI DUAT SORKAR SIAM
I TUM ANG U

Hawh u, mipui zângkhàina tur hi ngai pawimawh ila. Gas laknaa intlar put put ngai ṭhin te, bawlhhlawh paih changa lo din ṭhup te, Tui leh electric bill dik lo pek chhuah fo vanga mipui buaina siamte hi sim i tum teh ang u. Tum chuan kawng a awm asin.

Hmanni khan Delhi-ah bawk. An tui bill dik lo, mipui lamin an complain vangin, Delhi Jal board Vice Chairman Raghav Chadha chuan a hmunah a tlawh riap mai a, bill reader a ban nghal a, an ZRO pawh a hmun ngeia kar khat chhunga bill check vek turin thu a pe hmiah mai asin.

Mite chuan mipui an duat khawp a, an tan minister te an ding chhuak a, an thlavang hauhvin sorkar officer te, hmun leh hmunah an hau a. Mipui thlan lal an nihzia a hre chiang teh asin. Mizo mipuite hian thil thlawn pek kan ûm ngawt lo. Min duattu sorkar kan duh ve tawh a nih hi.

- Lalrinliana Colney