Covid-19 hripuia kan dinhmun hi CM-in Pathian ṭih vang a ni zel em?
Nikum lam khan Minister of State Pu T.J. Lalnuntluanga'n 'Tun dinhmunah Covid-19 laka kan him theihna chhan hi kan Chief Minister-in Pathian a ṭih vang a niin ka hria,' tia a sawi kha a lâr hle mai a. Chumi kal zelah chuan a sawitu hian Assembly House-ah pawh nasa takin a mualpho phah nghe nghe a nih kha.
Tunah hian Mizoram chu India rama Covid-19 hluar berna state pathum zinga mi a ni ta reng mai a, thla thum vel chhung chu hmarchhak state zingah a zâwna hripui vei hmuh chhuah tam berna state a nih tawh bakah, India ram pum huap pawhin hun rei tak chhung hripui vei hmuh chhuah tam zualna state panga zingah a lang ta zat zat mai a ni.
Kan sawrkar hotute'n an chhuah em em ṭhin, 'Covid-19 vanga thi tlemna state' tih dinhmun pawh kha kan hloh nasa tial tial a, keini aia dinhmun ṭha lo zawka awm reng state-te pawh a tahtawlin kan lehpêl chho ta zel mai le.
Tuna Covid-19 chungchanga kan ram (Mizoram) dinhmun hi 'CM Pathian ṭih vang' a la ni zel tho ang ang em? Nge, 'CM Pathian ṭih tawh loh vang' a ni ta zawk?
June ni 1, 2020-a MNF party press release, Memo No. MNF/Media/01/2020/46, MNF Media & Publicity Secretary Pu R. Lalhmangaiha hminga tihchhuahah chuan Minister Pu T.J. Lalnuntluanga'n Mizoram chhim lama khaw ṭhenkhat a fannaa a thu sawi tarlan a ni a.
Heta a thusawi an tarlan zinga pakhat chu, "Tun dinhmunah Covid-19 laka kan him theihna chhan hi kan Chief Minister-in Pathian a ṭih vang a niin ka hria. A hun takah Pu Zoramthanga leh a thawhpuite hi Pathianin a hung chhuak thin... Lal berin Pathian a theihnghilh hi a pawi thin em em tih Bible-ah pawh kan hmu a. Kan Chief Minister Pu Zoramthanga hi chu a ṭawngṭai tam a, Pathian rawnin mipui ngaihdan a la thiam ṭhin hle a ni," tih a ni.
Covid-19 chungchanga kan dinhmun a ziaawm viau laia kan ziaawm chhanah 'CM Pathian ṭih vang' a nih chuan, tunah hian kan dinhmun chu India ram pumah a ṭha lo berte zinga a lo ni ta si a. Hetiang kan nih tak chhan chu, 'CM Pathian ṭih loh vang' a ni leh tawh mai ang em? Minister Pu T.J. Lalnuntluanga thusawi hi kan pawm dawn a nih chuan, tuna kan dinhmun hian ngaihtuah a tithui viau mai.
Engpawhnise, Pathian ṭih leh ṭih loh lam chu sawi chiam aiin, thil tihah a lang chhuak zawk ṭhin a. Kan Minister-in a lo sawi tawh hi chu kan sawrkar hotute hian dahṭhain, Pathian ṭihna tak tak nen kan ram hi kaihruaiin hripui hi min dopui se, tiin duhthu ka'n sâm ang e.
- RL Hlanpuia Kawlni